為了實現媽媽遺願，我成為了女兒國唐僧: 198

Q：「吓，我Facebook好正常㗎喎，全部都係學校正經活動相，唔覺有乜男仔煩住我，有咪唔好理佢囉。」
係囉，係IG好睇啲囉，不過唔係個個都follow到妳咁解啫，而且妳全部平台都無disclose過自己status，應該唔多唔少都收埋咗少少預備兵嘅。
健：「咁，睇完可以畀返部電話我嗎？」
真係得意，對住我用條女曬命就咁大口氣，對住個真女神就陰聲細氣，如果有個女仔出到嚟畀你溝都唔知你點應對。
Q：「唉，同你講呀，網絡上好多嘢都係假㗎咋，唔識游水就著比堅尼去沙灘影相，五線譜都未學曉就坐喺部鋼琴前面，條腰可以P幼，塊面可以美白，條女分分鐘呢世都唔敢用真面目嚟見人，你呢啲咪永遠都約唔到人哋出嚟而俾人玩囉。」
嘩，右女神講到咁狠呀，唔通…妳係想令阿健呢個傻仔死心，不過睇嚟就無咁容易。
健：「咁Queenie妳會唔會做埋呢啲事情？」
Q：「吓，我喎…我使唔使呀？而且我識游水，鋼琴都有六級，個樣見得人，做乜要咁無聊。」
Queenie叉住條腰講，一副信心滿滿嘅樣子，而我又望一望佢嗰幅沙灘相條腰，好似又真係幼過我平時望住嗰條，明明我重摸過幾次添，記憶中嘅手感係有啲肉哋，唔通女神都係P出嚟嘅？
健：「不過…我都係相信Kuromi，佢一定唔會咁對我嘅。」佢一路講一路惜咗個電話屏幕上面嘅Kuromi背脊一啖，望到我毛管都戙埋，唔知此時此刻QQ佢會有幾心寒呢，定係作為女神嘅佢一早就慣咗呢啲狂蜂浪蝶嘅變態行為。




Q：「你…唔係對住幅咁嘅背多分都J得落呀…」
健：「乜…而家啲女神講嘢咁open㗎咩？」
Q：「妖，你個樣都出賣咗你啦，關我乜事。」
健：「嗯，等我慎重考慮下先啦，我唔想污辱咗心愛嘅Kuromi小姐。」
講完佢又惜多一下個電話屏幕然後返埋去自己位，睇嚟…呢個男人真係無藥可救，我有啲後悔第一次嗰陣邀埋QQ同佢一齊打傳說。
我：「恭喜妳又多咗隻會J妳嘅兵。」
Q：「我先唔恨呀，通街都J我㗎啦，包括埋你。」
我：「咁點同喎…」
其實都無乜唔同，只不過我可以望住佢真人J…
我：「但妳畀咗呢個Facebook佢驚唔驚呀，怕唔怕佢會搵到妳出嚟？」




Q：「應該唔會掛…諗落呢間學校都無乜人有我呢個account，就算Yvonne我都無add，係可能認得嗰兩幅相啫，加上我又private咗個friend list，唉，唯有希望佢唔會攞住幅相太招搖。」
我：「妳搞到佢咁，睇下妳點收科。」
Q：「無㗎，反正我咪就係呢世都唔會出嚟囉。」
我：「但咁樣拖住佢…其實佢都幾可憐…」
我都好可憐，如果唔係妳，我就唔使每個周末都要返工，可以晚晚約細蚊出嚟玩，捉佢返屋企嘿咻嘿咻，過返以前荒淫無道嘅糜爛生活。
但係我犯賤，我就係願意付出所有畀妳呢個右女神，比起阿健更泥足深陷。