為了實現媽媽遺願，我成為了女兒國唐僧: 192

我：「呢層，自從我做咗獨留在家兒童，就一直都顧掂咗自己㗎啦。」
鄧：「夠喇，我真係怕咗你哋啲怪獸家長，點解可以咁㗎，等個仔女自生自滅都得嘅…」
我：「Miss，其實只要睇開啲，無乜嘢話係一定唔得㗎咋，定係，妳想要另一個極端嘅怪獸家長，日日嚟學校煩住妳，去PTA度開file投訴先生？」
鄧：「拜託，千祈唔好，我只係想安安樂樂返工。」一早就知佢係好怕事嗰啲先生嚟。
我：「放心啦，我呢個乖學生盡可能都唔會增加妳嘅工作量。」
鄧：「…，咁，你讀書情況OK吖嘛？」
我：「算係咁啦，今個學期都叫有進步。」
鄧：「係咪終於肯勤力溫書喇？」
我：「嗯，如果唔溫書，就會俾呢個惡毒嘅女人毆打㗎喇…」
Q：「講乜呀！係你自己應承阿媽會畀心機㗎！」佢一路幫我打機一路反駁。




鄧：「如果可以，你就同Queenie一齊用心讀書啦，佢應該可以幫到你嘅。」
其實…家訪都無乜特別啦，平時喺學校都已經日日見，只係而家再講多次叫我認真學習唔好顧住玩，唔好學壞，唔好加入黑社會，唔好掂毒品同種大麻，唔好亂搞男女關係。
因為實在太煩喇，所以就唔詳細講嘞。
鄧：「咁…你兩個…就好好一齊生活相親相愛喇。」
我，Q：「嗯嗯。」我哋兩個乖學生一齊點頭。
鄧：「呀，唔得，你哋相親好喇，唔好相愛。」
Q：「Miss，妳教中文㗎，唔好攞啲四字詞嚟玩啦…」其實我都唔知相親同相愛有乜分別，但望文生義嘅話，相親即係互相親熱，親熱而不相愛，實乃有性無愛，唔通Miss Tang想我哋做SP？咁…呢層我當然OK啦，雖然有埋愛就更好。
我：「唔相親相愛囉，妳想我哋打下架都得㗎…」
Q：「打你個頭！」佢真係一嘢拍落我頭殼頂。
Q：「邊個俾你同我打架，只有我可以打你。」




鄧：「認真呀…同埋你哋兩個一齊住呢件事…千祈唔好俾其他人知，如果有人講閒話我都驚會好麻煩，雖然學校其實管唔到啲乜，但到時就要睇下你哋家長有乜反應…」
我：「放心啦，我哋重驚過妳啦。」
鄧：「就算…你兩個會出啲乜嘢事，記住留返下個學年呀，知唔知，到時就唔關我事…我對你哋好，你哋都要對返我好。」唉，邊有先生咁哀學生㗎。
Q：「無事呀！呢世都唔會同佢有事呀！」
QQ…嗚嗚嗚嗚！做乜要咁講，就好似用一把利劍插穿咗我嘅心臟咁。
鄧：「嗯…就咁啦，呀！死火！有個未接來電！下單嗰位阿媽打過嚟添。」