thriXt Qantasy 純文字安眠之作 (New: - U2K - 一直上架): 193

我：「早就叫你唔好浪費時間喺我間屋度㗎啦，快啲過去招呼下位同學喇。」
鄧：「咁我走喇，bye bye，當我無嚟過啦。」
我：「噢，Miss Tang咁就走咗。」
Q：「唉，呢個班主任真係…」
我：「估唔到佢真係會由得我哋，乜事都無。」
Q：「我諗係因為佢應承咗唔會攪到我哋嘅生活掛，畢竟都唔知我媽咪同你爹地點諗。」
我：「乜原來先生都會重視對學生嘅承諾㗎？」
Q：「又或者佢只係怕事唔想處理。」
我：「佢咁樣算唔算一個好老師？」
Q：「嗯，佢一定會做到個好老師，就算而家未必係。」




我：「點解咁講嘅？」
Q：「最差嘅老師就係自以為是，不思進取，同時代脫節，唔去明白學生，只顧自己教書嗰啲，佢一定唔會係咁嘅人。」
我：「唔知我哋會唔會喺呢間學校睇住佢變成好老師呢。」
Q：「點睇喎，佢剩係教初中咋嘛，唔通你下年走去問啲低form佢教成點咩。」
我：「是但啦，反正而家無事就好。」
然後我又爬返上床諗住繼續打機。
Q：「起身呀！重玩，你要做功課喇！」
我：「嘩呀吖！做乜…扭我耳仔！痛！」
Q：「你今晚同聽晚都要返工，而家唔做幾時做呀？唔好次次都諗住抄我得唔得？」
我：「而家中午咋嘛，大把時間。」




Q：「你重要煮飯我食㗎！」
果然…係一個惡毒嘅女人。
然後話咁快又到咗星期日嘅夜晚，我已經完全適應咗呢份工，時不時都會見到嗰一兩枱阿叔留喺度睇波，有啲我都開始認得，而家我甚至會主動行埋去問佢哋要唔要藍妹。
馬：「交叉仔過嚟吖。」
我：「係，喺度。」
馬：「我哋酒樓平時係第一個禮拜出上個月嘅糧嘅，咁我都出埋畀你先啦，咁無理由剩係出上個月嗰兩日咁少嘅，所以就包埋呢個禮拜三日，呢度係支票…」
我喺馬叔叔手上接過支票，咁大個仔第一次見到有張支票係寫住自己個名，而下面個銀碼係港幣捌佰伍拾元正，雖然唔係話好多，但已經夠我望住張票雙眼閃閃發光。
我：「多謝馬叔叔！」
馬：「唔使多謝，係你應得嘅，以後繼續畀心機！」