為了實現媽媽遺願，我成為了女兒國唐僧: 190

鄧：「你咁講即係乜意思？」
我：「哎呀，真係唔關我事㗎，我乜都唔知，我唯一做嘅嘢係俾佢喺度住㗎咋，我唔係佢監護人。」
鄧：「Queenie，妳而家拍緊拖？」
Q：「嗯…」我完全感受到QQ喺度抱怨緊我踢爆佢同男朋友做埋晒啲茍且之事。
鄧：「呀爽你可唔可以行開先…我想同Queenie兩個出去露台度謦下。」
我：「哦，好呀，咁我去打下機先。」
然之後Miss同QQ就行咗去露台度私片。
※※※※※※※※※※
鄧：「Queenie，呀爽講嘅係咪真㗎？」
我：「Miss，我有私隱，應該可以唔答妳係咪？」




鄧：「妳知唔知我好擔心你哋㗎…」
我：「唔使擔心啦，我知自己做緊乜，我唔係細路女嚟…」
鄧：「點得，妳得十四歲㗎咋，妳知唔知做嗰啲嘢個男仔會犯法㗎？」
我：「當然…知啦，我唔係傻㗎…」
鄧：「妳明知唔可以，咁點解重要咁做呢？」
我：「有時啲嘢…唔係乜都可以我話晒事㗎…」
鄧：「呢啲嘢唔到你哋話事㗎，法律白紙黑字寫晒喺度，妳聽Miss話啦，好唔好？」
我：「Miss妳讀書嗰陣無拍過拖嘅咩？」
鄧：「咁…呢層…等到十六歲先拍拖囉。」
我：「唔拍都拍咗咯，我都無辦法㗎…」




鄧：「就算拍拖，都唔一定要做嗰啲嘢嘅啫，係咪？好好珍惜自己啦。」
我：「我無糟蹋自己呀…我唔會做唔係自願嘅事㗎，至於男仔諗乜，妳唔好扮唔知啦。」
鄧：「一個咁都忍唔住嘅男仔會係好男仔咩？」
我：「Miss妳唔好迫我啦，我唔想諗呢啲嘢…」
鄧：「妳而家唔諗，到出咗事嗰陣就太遲㗎喇。」
我：「妳係驚我出咗事，妳喺學校會好麻煩咋掛？」諗下都知…就算要我退學已經夠煩。
鄧：「出咗事嘅話，妳一定煩過我囉。」
我：「係，所以我一定唔會出事，每一次都好安全。」
鄧：「唔好咁硬頸啦，Queenie。」
我：「知喇…最多我盡量避免啦。」




死人交叉仔，俾Miss知道我哋一齊住已經夠晒煩㗎啦，重要講埋晒啲無謂嘢，無嘢搵嘢嚟搞，係咪嫌我同埋Miss Tang唔夠頭痛呀…我望住Miss Tang望住我，兩個都一面無奈咁，唉。
鄧：「妳一路拍拖…一路同呢條友仔一齊住？」
我：「咁我男朋友就梗係唔知啦…知道咗重得了嘅。」
鄧：「諗到你哋咁我就想嗌救命…」
我：「當唔知咪算囉，明明一開始唔入嚟就乜事都無，而家重衰過一屋大麻喇。」
鄧：「唔好呀，大麻重驚，我講下笑㗎咋。」
我：「咁不如妳都當我哋兩個同你講緊笑囉。」
鄧：「可以嘅話我都想…妳同佢住，真係無問題？」
我：「又真係無乜喎，本身都好擔心㗎，結果無事發生過。」
鄧：「但…妳啲底衫褲咁樣掛晒喺度…」Miss一路講一路指住掛喺露台上面嗰啲Bra。
我：「嗯，有乜問題？佢幫我洗埋晾埋添啦。」
鄧：「妳唔介意咩，會唔會唔係幾好？」
我：「呢啲都介意重點一齊住呀，無乜特別啫，佢都唔係細路仔嚟啦。」
鄧：「乜意思？即係佢而家又拍緊拖？」
我：「據我所知就無喇，係有啲EX咁啫。」




鄧：「妳唔係諗住同我講佢同啲EX乜嘢呀…」
我：「唔知妳想問我乜嘢，但妳最驚嗰啲咩嘢應該就唔會再發生。」
鄧：「吓…點解妳咁肯定？」
我：「因為佢應承咗佢媽咪囉。」
鄧：「但…明明佢媽咪已經…」
我：「嘻，唔緊要啦，佢媽咪會喺個天昅實佢㗎嘛，最多我都幫手睇住佢。」
鄧：「好無信服力喎…一個會搞到男仔…衰十一嘅女仔，去睇住佢等佢唔會衰…」