為了實現媽媽遺願，我成為了女兒國唐僧: 189

鄧：「Q…Queenie，點解…妳會喺度？」
我：「我都唔知呀，妳問佢囉，我唔想妳入嚟就係唔想妳自尋煩惱咋嘛。」
Q：「喂！間屋你㗎，而家係家訪你唔係我！」
我：「Miss妳拉我啦，我係拐帶未成年少女返屋企嘅被獨留在家嘅兒童。」
鄧：「Queenie，妳係嚟呀爽屋企玩嘅？」
Q：「唔係呀…Miss…」
鄧：「無理由㗎喎，我啱啱先同妳阿媽視像會議完，佢明明話妳朝早要去補習所以唔喺屋企，係妳逃課無去到補習走咗過嚟？」佢問得好鬼認真。
Q：「唔…唔係呀…」
我：「唔好成日懷疑我哋呢啲小朋友啦，大人都可以講大話㗎嘛。」
鄧：「咁點解…Queenie妳會晨早流流出現喺佢屋企度嘅？因為要謦project？」




我：「你見佢頭又未洗，妝又無化，就知道妳諗多咗啦，女神係唔會咁見人㗎…」
Q：「Miss Tang…我而家同佢…一齊住。」
鄧：「乜話！你哋兩個同居？！」我諗佢而家目定口呆個樣比起見到毒蛇更驚嚇。
我：「冷靜啲啦，唔係妳想像中嘅咁。」
鄧：「你兩個…一齊咗？」
我同QQ不約而同一齊擰擰頭以示清白。
鄧：「咁點解你兩個會住埋一齊？」
我：「其中一個原因睇怕就係因為妳將我哋調埋一齊坐喇，嗱，唔關我事，詳情妳問返佢啦。」
鄧：「Queenie，妳哋好細個㗎咋，點可以同一個男同學同居㗎？」唔通大個就可以？
Q：「Miss…有得揀我都唔想…」




鄧：「咁點解妳唔返屋企呀？係咪同媽咪鬧緊架？使唔使我同妳哋謦下？」
Q：「唔好呀！Miss，千祈唔好同我媽咪講呀…」
鄧：「點得呢？妳得十四歲㗎咋，點可以唔返屋企，妳媽咪又會由得妳嘅，有無搞錯！」
Q：「唔好呀…妳話過唔影響我哋㗎…」
我：「如果佢有屋企返，又點會留喺我呢度喎。」
鄧：「點解會無屋企返？妳咪搵返妳媽咪囉。」
Q：「Miss…我屋企…出咗事…爹地賣樓走咗佬…」
鄧：「吓！？咁…咁…妳媽咪呢？點解會分開住…」
Q：「Miss妳唔好問啦…」
鄧：「妳搵返媽咪先啦，點都好過住喺個男同學屋企吖，如果俾人知道好麻煩㗎。」




我：「Miss妳信下我哋啦，佢真係無屋企返先留喺度㗎咋，如果唔係佢媽咪都唔使講大話呃妳啦。」
鄧：「真係無其他選擇？都無理由同個男仔住…」
我：「一係Miss妳做好人收留佢囉，咁嘅話應該理想啲。」
鄧：「我屋企都無位，而且我同屋企人住…」
其實以老師計Miss Tang真係傻豬豬嚟，同佢講乜佢都會答我哋嘅。
我：「所以…暫時嚟講都係無其他辦法㗎喇。」
鄧：「咁你兩個一齊住咗幾耐呀？」
Q：「都有個幾月喇，Miss。」
鄧：「咁…你哋相處得還好嘛？」
Q：「幾好咁啦，已經習慣咗，無乜大問題。」
鄧：「我想問下…你兩個一齊住無做啲乜奇怪嘢吖嘛…即係嗰啲…」
Q：「黐線！我點會同佢做埋嗰啲嘢。」
我：「放心啦，Miss，就算佢有咗都一定唔會係我經手嘅。」
Q：「喂！死人交叉仔！」
呢個時候Miss Tang已經滴晒汗，外加幾條黑色嘅直線掛咗喺佢額頭上面。