為了實現媽媽遺願，我成為了女兒國唐僧: 188

我：「Miss妳係乜年代㗎…今時今日無人睇鹹碟㗎喇，㩒兩下制打個番號就有得睇啦，唔通重要係咁換碟等loading咩，而且而家啲電腦連個CD位都無埋咁滯，你唔係同我講妳男朋友重睇鹹碟呀？」
鄧：「我…無男朋友…」佢真係可愛得交關，竟然認真答個學生自己無男朋友，明明咁靚女…
鄧：「唔講呢個！你係咪喺屋企度種大麻？」我十分之佩服呢個Miss嘅想像力，如果我識做呢啲大生意我就唔使讀書啦。
我：「你望都望到啦，我間屋燈都唔多盞，烏燈黑火黑鼆鼆點種大麻呀，你話我喺度怐荷蘭毒菇都合理啲吖。」
鄧：「咁既然你無做壞事，咁乖仔，就開門畀我啦。」佢重要伸隻手入嚟穿過鐵閘摸我個頭，最慘係其實我高過佢…
我：「我有睇警訊㗎，獨留在家嘅小朋友係唔應該亂咁開門俾人入嚟㗎。」
鄧：「你當我係乜呀！我係你班主任嚟㗎！我唔係陌生人，唔係壞人嚟㗎。」
我：「我都知…不過Miss Tang，我哋都企咗喺度謦咗咁耐啦，妳又見到我咁精靈戙咗喺度，間間公屋都係咁㗎啦，入嚟無嘢睇，不如就當家訪完好唔好…」
鄧：「唔好，你太可疑，我一定要入嚟睇睇！」
我：「Miss妳咁夾硬嚟嘅，我怕醜呀。」




鄧：「呀爽你到底喺度玩乜？今日唔係返學，Miss可以陪你慢慢玩，我都係關心你，開門俾我入嚟先好唔好，你有乜問題嘅話我只會幫你，你明唔明？」
唉…又會咁鬼硬頸都有嘅。呢個時候QQ喺門嘅另一邊望住我，用口型講咗句『算啦…』。
我：「真係有乜問題都只會幫我？」
鄧：「咁梗係啦，我似係會害學生嗰啲人咩？」
我：「你應承唔會影響我嘅生活先。」
鄧：「我做乜要影響你喎，我只係想你好，就算你做錯咗我都只會引導返你去正途，如果我入到嚟見到大麻我都唔會報警好未？最多同你一齊燒咗佢當無事發生過。」
我：「嘩…Miss妳學林則徐虎門燒煙呀？唔得㗎，一燒大麻就成屋毒煙，係咪妳自己想吸咋…」
鄧：「講啫，我知你唔會種大麻嘅。」
我：「咁如果我成屋鹹碟呢？」
鄧：「呢啲…都正常嘅，你咁嘅年紀…一齊睇下，輔導下你都可以嘅…呢個都係先生嘅職責…」




望住面紅紅嘅佢，我真係唔覺得佢識輔導學生。
我：「咁如果我喺屋企養毒蛇同毒蜘蛛呢？」
鄧：「你唔係講真呀…咁我望一眼就走人…」
原來係咁，早知我一早就同佢講呢樣嘢啦。
我：「總之…我間屋有乜都好，唔準講出去㗎。」
鄧：「得啦…有乜都私下解決，好未？」
唔知喺幾時，QQ已經神不知鬼不覺咁戴返個Bra喺件衫入面，而我都終於打開道門放Miss Tang入嚟。
Q：「Miss Tang…早晨…」
鄧：「！…。」佢個樣重驚嚇過見到大麻。