為了實現媽媽遺願，我成為了女兒國唐僧: 187

唔通係老竇見我成績好咗買玩具畀我？！嘩唷！但諗諗下其實都無可能，就算係使命必達嘅FEDEX；一路成就所託嘅DHL；珍惜所託，一如親遞嘅UPS，外加埋我嘅收禮物之歌魔咒都無可能十二個鐘內就送到貨嚟，我唔係天真嘅小朋友嚟…
唔通係房署上嚟查牌？信唔信我扮狗吠嚇走佢。
於是我喺個電眼度䚎，點知唔䚎由自可，一䚎！
我靜音跳咗上QQ張床上面，跪喺佢身上伏喺佢胸前，完全忘記咗男女授受不親嘅規則喺佢耳仔邊講：「係Miss Tang…」
QQ轆大隻眼望住我，應該一時間佢都唔知點好。
Q：「咁…扮無人。」
「叮噹！叮噹！叮噹！」
好想攞個槌仔打爆個噹噹，實在係嘈死人，但如果我咁做即係同人講間屋有人啫。
由於我同QQ都好緊張嘅關係，我哋喺佢張床上面不必要咁黐到埋一埋，佢隻手重捉實我嘅手臂添；QQ放心，我一定會盡力守護我哋呢個五星級的家嘅！
等咗一陣門鐘終於收咗聲，呢個Miss真係太好毅力，正當我以為倆口子嘅頹廢生活可以重回正軌之時…冷不提防一個突然！




「鈴，鈴鈴，鈴鈴鈴！」
屌，臭Miss竟然打我手提電話，張床重要喺門口隔籬，啲聲今次實俾佢聽到嘞…
鄧：「呀爽起身喇！咪再瞓呀！」話口未完Miss已經透過氣窗嗌咗入嚟，無可奈何之下我唯有聽佢電話，試圖打發佢走。
我：「喂…呵嗯…」我扮到未瞓醒咁。
鄧：「起身喇，Miss嚟探你呀。」
我：「嗯…點解妳嚟我夢入面呀…我要去玩…」
鄧：「唔得閒同你玩，快啲開門畀我！」
我：「好啦…咁我返去個夢入面聽書啦…呼嚕…」
鄧：「爽爽爽爽爽！起身呀！」
原來，由氣窗傳入嚟把聲，同喺聽筒傳入嚟我耳仔把聲，係會有時差嘅。




無計可施下我唯有起身，但我無諗住開門畀佢入嚟，因為如果佢見到QQ喺度之後實好麻煩。
咁其實門都係要開嘅，只不過係唔開閘咁囉。
我：「呼嚕…Miss Tang早晨，做乜喺度嘅，唔通妳蕩失咗路？」
鄧：「我無蕩失路，我係嚟探你呢個死仔包。」
我：「我爹地唔喺度喎，妳琴晚咪搵咗佢囉。」
鄧：「係呀，但我琴日問咗佢，佢都同意我上嚟睇下你過成點。」
我：「咁客氣做乜啫，我唔好意思㗎，好多其他同學等緊妳嘅關心，快啲去下一個地址啦。」
鄧：「開門呀，呀爽，我企到腳軟喇。」
我：「陰功，家訪實在太辛苦喇，妳睇下，我而家咪過得好地地，妳已經完成任務，我哋星期一見啦，我會準時返學㗎喇，有乜到時再講。」
鄧：「喂！你係咪喺間屋入面進行緊啲為非作歹嘅勾當，你好快啲重實招來。」




我：「傻啦，Miss，我間屋三百呎都唔夠，妳望入嚟已經一眼睇晒望到出露台，好明顯我就係一個奉公守法嘅乖小朋友嚟啦。」
之前已經提過，Miss Tang係一個好後生兼隨和嘅Miss，加埋都幾靚女，個表情成日都一面無辜咁，啲再曳過我嘅男同學都唔捨得激嬲佢，而佢又真係會用心對我哋…所以我先夠膽同佢喺度咁磨，畀著其他先生我一定唔知點算。
鄧：「喂！快啲講，你係咪收到一屋鹹碟驚畀我發現？」突然之間Miss嘅眼神變到成個柯南咁，唔係柯南道爾嗰個柯南，而係可以喺火車軌踩住滑板同火車鬥快兼同一時間踢個足球打爆條橋樑嗰個柯南，因為Miss個樣真係好細個…重要矮我幾cm。