為了實現媽媽遺願，我成為了女兒國唐僧: 186

其實，我係想同QQ一齊食團年飯嘅，雖然我哋兩個日日都對住…年三十晚，如果佢無地方去，我都想買少少特別啲嘅嘢同佢食少少先，再留返畀佢自己解決…呀，唔知我會唔會有啲好嘢攞返嚟同佢再食多餐呢？等我實行騭肥呢個女人，到時佢條仔就會飛咗佢，我再餓返瘦佢就搞掂，一於咁話。
Q：「我唔會自己一個去食團年飯喇，雖然阿公阿婆應該想見到我…睇下我媽咪點囉，佢去我咪陪佢去，又或者可能佢想同我兩個撐枱腳。」
我：「妳媽咪…過得好嘛？」
Q：「佢都唔理我啦，我又可以點理佢喎。」
我：「但係聽日就見家長…」
Q：「是但啦，我嘅成績同操行見唔見都罷就啦，我媽咪咪又係哦幾句，好好好，跟住收線。」
我：「咁又係嘅，我諗Miss Tang都搵咗我老竇㗎喇，唔知講咗啲乜呢…」
Q：「你老竇唔會同返你講嘅咩？」
我：「如果無乜特別應該唔會嘞，加埋進步咗幾分，睇怕由得我就算。」
Q：「咁你就靠自己啦，大個仔喇。」




食完椰汁糕，閒話家常完，我哋就一齊擦牙，然後我自己沖涼…再一齊瞓喺唔同嘅床上面；而我竟然覺得咁樣好幸福，就算我唔會掂佢，唔可以喺佢身上攞到啲乜；正如細蚊感受到我嘅愛，唔係因為我同佢口頭上嘅關係，更加唔係因為做愛…
瞓醒第二朝，星期六放假，例牌我哋都會攤喺床上面磨爛蓆做下廢青先；我就喺度轆下心儀嘅AV女優有無新作，或者有無啲大單嘅港女流出，而QQ今日無拖拍應該就會同男朋友喺度瘋狂send message。
我：『係咁chat唔厭㗎咩？』
Q：『成日上鹹網唔厭㗎咩？』吓…佢估到定睇到？
我：『一時時啦…又唔係成日上。』
Q：『咁得閒就過嚟啦。』
我：『過嚟做乜呀？』
Q：『有嘢益你。』
我：『我怕醜呀…』外加一個面紅Emoji。
Q：「叫你過嚟就過嚟啦！粉腸！」佢大吼。




原來…又係叫我坐住佢隻腳等佢做sit up。
『叮噹！叮噹！』咦？係邊個呢？！