thriXt Qantasy 純文字安眠之作 (New: - U2K - 一直上架): 185

我一路執枱一路喺度諗，其實細蚊都唔係咁差啫，就算佢當時畀帽我戴都只係因為我唔夠惜佢；對我嚟講，追女神或者只係一個遙不可及嘅夢，可能好快有一日，佢唔再坐我隔籬，唔再同班，返返去佢屋企唔再同我一齊住，咁我就乜都唔再係。
如果我追返細蚊，我哋應該會幸福？佢都鍾意我嘅話…
過咗陣細蚊佢哋都埋單，我同佢以及佢屋企人揮揮手講再見，呀細佬仔都幾得意㗎喎，識望住我笑，唔知道佢識䚎家姐沖涼未呢？
執完張枱之後馬叔叔嗌咗我過去，希望唔係嬲我同個女仔講咗咁耐嘢啦。
馬：「交叉仔，係咪就放年假喇？」
我：「係呀，返多三日學我就放假喇。」
馬：「咁就好，新年呢，我哋初一初二就休息嘅，但前前後後都會好鬼死忙，如果要你年廿九，年三十，初三到初五都落嚟幫手有無問題？」
我：「當然無啦！只要我放假就一定得，可惜我唔識落單啦，如果唔係返足全日都得。」
馬：「對客呢啲過兩年先啦，你想做實有得你做；係呢，咁新年會返多幾日工，年三十同初三四都有得雙計嘅，講定畀你聽先。」
我聽到即刻雙眼發光，橫掂我新年都無嘢做嘅，返三日工就有一千蚊，實在係太幸福喇！




我：「多謝馬叔叔！」
馬：「記住邊日打邊日呀，寫喺月曆度啦。」
實在係太好，呢份工同M記簡直係無得比。
Q：「傻瓜交叉仔返嚟嗱？」
我：「嗯…妳又重未瞓嘅？」
唔通傻豬QQ又等我呢個返工搵錢養佢嘅男人返屋企？真係有我心嘅啫，好想攬住嚟惜，啜啜啜啜。
Q：「今晚有無嘢食呀？」
我：「…有三件椰汁糕，如果妳啱嘅話…」
睇嚟我諗多咗…呢個女仔純粹係因為為食豬，而唔係關心我對佢嘅養育之恩，我而家比較想將佢推落床，拉低佢條面褲同唔知有無著嘅底褲，大大力打落佢pat pat啲嫩肉上面，發出啪啪啪的聲響，直至紅卟卟為止。
Q：「嘻嘻，我好叻呀，我今晚專登唔擦牙住。」




佢一路講，我就一路用叉將其中一塊椰汁糕小心翼翼咁一分為二，因為如果我唔咁做嘅話，佢肯定就會食晒兩嚿。
嗱，唔係因為我做完嘢有啲肚餓呀，而係我膽心眼前呢位絕世美人嘅姣好身段會俾呢啲不知所謂嘅卡路里填滿脹壞咋，到時唔好怪我。
我：「係嘞，QQ，新年酒樓會好多嘢做，我要返多幾日工…」
Q：「嗯嗯…估到吖，畀心機返工，多謝你養我…嗯，好味道…」又話無資格要我養佢，而家佢食到個樣開心到吖…不過我係想睇到佢開心嘅。
我：「初一二放假，其餘年廿九到初五都要返。」
Q：「嗯，你唔使食團年飯咩？」
我：「咁我返九點幾，食完之後先趕去返工都得啦，妳呢？都係留喺屋企？」