為了實現媽媽遺願，我成為了女兒國唐僧: 184

我：「唔好啦…我唔想咁。」
蚊：「你都幾忍得㗎喎，日日養住條自己鍾意嘅女去溫其他仔仔都可以處之泰然嘅？」
我：「有乜辦法喎，又唔係佢嚟到背住我走去識其他男仔，唔通我同佢講，住喺度嘅條件就係飛咗條仔咩，加埋我又無錢同佢拍拖…睇到佢開心我都開心嘅，總好過叫佢陪我落中心打康樂棋吖。」
蚊：「咁你就畀心機搵錢喇…係呢，佢重係咪處？」
我：「妳覺得呢？」
蚊：「睇個樣唔似。」女人嘅感覺果然銳利。
我：「的確唔係。」
蚊：「咁等到佢分手咪有得食囉。」
我：「真係等得到先算啦，可能換第二個呢…」
蚊：「吖，你做乜長他人志氣，滅自己威風喎。」




我：「咁我真係一個清貧屋邨仔嚟，又無乜長處，讀書又唔係叻。」
蚊：「唔係呀，我覺得你好好喎，如果我有嘢可以幫到手嘅話即管開聲同我講啦。」
我：「可以…幫到啲乜…」
蚊：「唔知㗎，喺佢面前讚下你囉…重有呀，出咗糧記住請我食嘢呀，枉我以前對你咁好。」
係嘅，喺佢無聲無息送頂帽畀我之前一直都對我幾好，就算係而家都唔差，只不過…我個心入面已經俾QQ侵佔咗，我都無能為力，感覺呢樣嘢係呃唔到人，就算QQ佢乜都畀唔到我。
我：「放心，我一定會…係嘞，妳話同我…做愛，係認真定係講笑？」
蚊：「我做乜要搵呢啲嘢嚟講笑？」
我：「但係妳明知我而家個心已經唔喺…」
蚊：「唔重要吖。」佢一路擰頭一路講。
我：「咁都唔重要？」




蚊：「你上次咁幫我，已經夠我唔理其他嘢，為咗你而付出一切啦。」
我：「都係舉手之勞嚟啫，我點可以容忍一個仆街仔咁樣蝦妳。」
蚊：「你嘅舉手之勞，令我第一次感受到嚟自一個男人嘅愛。」
我同細蚊互相對望，帶住少少靦腆同尷尬…即係話我同細蚊喺埋一齊嗰幾個月佢都無感受過愛，只係做咗好多好多次愛；而直至到佢派帽畀我分埋手成為咗EX，佢先至…不過而家已經太遲，好可惜，都係因為我唔好…
我：「多謝妳，細蚊…」我鼻頭一酸，眼紅紅咁。
蚊：「嗯，總之你有需要搵我就得㗎喇…」佢嘅眼眶都載住好多水咁，好似好唔捨得我。
我：「我會…係呢，條仆街無再煩妳吖嘛？」
蚊：「無喇，聽聞Carmen姐姐之後都搵人再嚇驚咗佢，而家佢好似連呢條邨都唔敢入…喂，有人埋單喇，快啲去執枱啦，唔好賴我累你無咗份工呀。」講完佢就返埋去自己個位度。