為了實現媽媽遺願，我成為了女兒國唐僧: 183

蚊：「唔使你呀！唔勉強你，你分明已經俾嗰個女人迷咗去，送上門畀你都可以唔要，唔鍾意你呀！」雖然唔知佢係咪堅想同我做，呷醋就梗㗎喇，但見到佢咁樣我又好唔捨得。
我：「細蚊…對唔住…唔好唔開心啦…」
蚊：「哼，係我自己戇居，畀帽你戴，如果唔係我實而家即刻扳扯個女人走呀。」
我：「細蚊…」
蚊：「係嘅，Queenie佢又靚女，身材又好，我呢啲平胸妹邊比得上吖，而且人哋知書識禮，出身又好，你識咗人哋重邊識我吖，唉，心淡喇。」
我：「唔好咁講啦，我好重視妳㗎，細蚊。」
蚊：「唔使講喇，鍾意人就快啲追佢啦，我睇好你㗎。」吓？做乜跳tone跳得咁快嘅…係咪個個女人都係咁㗎呢？
我：「點追喎，咁易追到咩？」
蚊：「唔係掛，同人一齊住由朝對到晚都追唔到，乜你咁失敗嘅咩，最多咪喂佢飲Somersby囉。」
我：「哎呀，嗰啲係叫夾硬嚟囉，我咪同妳講過，Queenie係有一個穩定拍咗好耐拖嘅男朋友㗎。」




蚊：「乜你咁怕事㗎咩？唔似你喎，搶佢返嚟咪得囉，人哋都已經喺你間屋度。」
我：「妳估佢係妳咩…」
死火，講完先醒起自己講錯咗嘢，雖然呢個都係事實嚟，但無理由喺個女仔面前提起㗎…
蚊：「係囉…我都知我cheap得滯。」
細蚊帶住抱怨嘅眼神回敬返我。
我：「唔關事嘅…佢男友睇落都唔差，有送禮物畀佢，又餐餐都係佢請，我諗Queenie都唔捨得。」
蚊：「唓，多數咪又係敗家仔一個，你而家識自己搵錢喎，點同！」
我：「欸…我一個禮拜嚟做十粒八粒鐘㗎咋，搵唔到幾多錢，都係夠Queenie佢食飯，而且我都重未出糧，唔敢諗呢啲嘢住…」
蚊：「犀利咯，如果無咗你女神會無飯開，你簡值係佢嘅再生父母呀。」雖然都係一半事實。
我：「傻啦…邊有咁誇張。」




蚊：「唔咁誇張，即係你包起咗佢，咁佢好應該做你條女啦。」俾著以前嘅我一定會咁做…