為了實現媽媽遺願，我成為了女兒國唐僧: 177

Q：「咁快啲話我知啦。」佢轆大隻眼望住我，即係同我講如果唔從實招來我休想有得專心打機。
我：「妳咁八掛做乜，呢啲無乜特別嘅陳年往事，就連我自己都唔係太想記得。」
因為唔係太開心嘛，而且之後就俾架車洗晒腦。
Q：「女仔不朽都咁八掛㗎啦，我又未網戀過。」
我：「乜妳而家唔係網戀緊咩？」
Q：「咁係條傻仔網戀Kuromi，而唔係我網戀佢。」可憐嘅小健健，真係教人聞者心酸…
我：「重以為妳好enjoy網上面flirt仔添。」
Q：「又唔係唔識，都無遐想啦，而且現實已經有太多仔黐埋嚟，所以唔覺得有乜分別…」
我：「Queenie，妳屋企管得好嚴㗎，有我呢個監護人睇住妳，妳唔使指擬有得偷偷拍拖。」我扮到義正詞嚴咁同佢講，串㞗佢喺人哋面前扮到清純乖乖女咁，背後就經常性送外賣攪到善良又淫邪嘅哥哥係咁衰十一。
Q：「屌你啦，總之你快啲講多啲畀我聽先。」




講真…如果佢只係用手指捅我pat pat嘅話，法官大人，我願意…我係犯賤嘅小男孩。於是我就泊好架大卡車喺油站，再停車熄匙，歐洲啲空氣咁好，正常人都唔捨得污染佢囉。
我：「咁我見同佢喺隻game入面都玩得差唔多，互相用老公老婆咁叫咯，有時重一齊謦下淫嘢，咁咪出嚟囉；就好似妳咁講，佢都係一個乖乖女嚟，要六點鐘返屋企食飯嗰隻，又住得幾遠下，可以出嚟嘅時間唔多，第一次出嚟同佢去咗間日式樓上cafe食芭菲…」
Q：「呀！我又鍾意食芭菲，要士多啤梨cheese cake嗰隻。」一聽到甜品QQ就雙眼發光，女仔果然都逃不過呢啲誘惑…放心，我會記住乜味㗎喇。
我：「嗯…妳係咪想聽㗎？」
Q：「係呀，快啲繼續講。」
我：「第一次見，其實都幾尷尬下，大家都無乜嘢講，明明我哋啲background資料都已經用文字講過晒，但開口都唔知講乜好，結果又謦埋啲無謂嘢，好似返學開唔開心呢啲，食完嘢咪送佢返去佢屋企個地鐵站囉。」
Q：「嗯…都預計到喺差唔多，第二次呢？」
我：「到咗下個禮拜，我咪又約佢出嚟囉，都成功約到，今次去咗朗豪坊行商場，同佢去namco玩咗一陣，咪再繼續轉樓梯上頂樓囉，去到上面我見到無乜人，就膽粗粗拖住佢隻手捉咗佢去兩間鋪中間夾住嗰條罅入面…同佢講我鍾意妳。」
Q：「呀下，然後呢？」
我：「我以為…呢句嘢明明喺文字上面講咗咁多次，佢都有開心咁回應，以為現實上面都係差唔多啦，點知佢無乜反應…我都唔知點做好，於是抱實咗佢，惜咗佢塊面一啖，佢都重係無乜反應，我就用隻手隔住佢件衫按摩佢個胸囉。」




Q：「然後佢嬲咗。」