thriXt Qantasy 純文字安眠之作 (New: - U2K - 一直上架): 176

阿健就繼續查家宅式咁同Kuromi謦欬…即係呢，咁樣唔得㗎，有幾多嘢可以畀你問啫，問完又可以點喎，唔通你可以憑呢啲資訊就令個女仔鍾意你？實在係太天真喇…
健：「係呢，Kuromi妳有無拍拖呀？」
我聽到差唔多想笑到噴飯，你問得咁odd，使唔使即場表埋白先收手呢？司馬昭之心啊。
Q：「我？無呀…」
當然一個正常女仔對呢啲問題講大話都可以話係預計之內，而QQ呢啲有經驗嘅女神級人物就更加應該係家常便飯。
健：「竟然無，估唔到喎。」
乜叫竟然無，你覺得有就一開始唔應該咁問啦，真係好無水準嘅對話，該煨。
Q：「咪話咗我屋企管得好嚴囉，如果俾我屋企知道我偷偷拍拖實打死我㗎。」
女神呢下高招，即係我唔係唔想見你呀，只係我屋企唔俾我出嚟咋，不過禮物就當然照收啦；我保持住你嘅幻想，但到最後你係唔會得到任何嘢㗎。
健：「咁妳想唔想拍拖呀？」




Q：「如果有男仔惜我，咁都想嘅。」
如果買六合彩有得中，就算得廿蚊我都（舌累）飯咁去買啦…唔得喇，聽住佢兩個講呢啲嘢實在係太尷尬，所以我就坐喺部電腦前面打開個歐洲揸貨櫃車模擬器，喺條歐洲大馬路上面兜下風。
QQ再玩多陣之後就終於offline，然後企咗喺我隔籬望住我揸貨櫃車。
Q：「喂！頭先玩玩下做乜自己off先呀？」佢向我抱怨，兩隻手肘壓喺我膊頭上面，按道理我只要挨後個人，後腦就會掂到佢個心口。
我：「嘻嘻，唔係咁樣我又點睇到個傻仔出招。」
Q：「最衰都係你呀！搞到佢係咁煩住晒。」
我：「個頭明明係妳開嘅，而家走嚟怪返我都有嘅？」我真係覺得佢想玩仔㗎喎。
Q：「唉，三唔識七就話呃多幾個skin block咗佢啫，我都唔想佢太慘。」
我：「啱㗎喇，等佢體驗下呢啲痛苦，女網友都好信嘅，要知道喺網上面約女等同大海撈針，而且出到嚟究竟係暴龍定豬扒都係一個未知數嚟。」
Q：「講得咁口響，你唔係都試過網戀㗎咩？」




我：「算係啦，不過玩玩下咁嘅啫。」
Q：「有無約出嚟見過面呀？」
我：「有呀，見咗三次咁大把。」
Q：「咁佢係咪暴龍嚟呀？」
我：「唔係喎，妳當係…一個無咁靚嘅Yvonne咁樣囉。」
Q：「你都幾好彩喎，咁做咗啲乜？」
我：「見得三次，妳想我做到啲乜喎…」