thriXt Qantasy 純文字安眠之作 (New: - U2K - 一直上架): 132

我：「啊，咁又點呀？」
最搞笑嘅係呢一刻Kuromi佢就坐咗喺我身邊。
健：「我同佢再玩多咗兩鋪咁大把。」
我：「咁咪玩囉，又有乜特別？」
我知佢想講乜，當然慢慢聽佢喺度廢噏。
健：「我教佢玩克里希以外嘅角色，而且兩場都贏咗。」教？邊個教呀！你好似剩係迫佢做輔助跟住你咋喎，唔好喺度車大炮好唔好。
我：「你好彩啫，系統不朽要你有贏有輸。」
健：「你知唔知呀，Kuromi把聲好鬼死好聽。」
我：「哦，就咁咋…」我裝作滿不在乎又一面葡萄。
屌，Kuromi咪喺隔籬囉，想聽佢把聲實在猶如探囊取物，而並非管中窺豹…




健：「原來佢無同你開過咪…」
為咗要令自己感覺良好，不惜一切都要將同儕比下去，只有獨樂樂方係真正快樂。
我：「無喎，開住咪又唔會玩得勁啲嘅。」
我心諗，我同Kuromi兩個係面對面咁玩，有乜可能重會開咪，貪部電話播出嚟啲回音好聽？
健：「既然係咁，我唯有好好繼續努力。」
睇嚟佢除咗想過嚟show off之外，另一個目的就係睇我對Kuromi有無意思，會唔會同佢爭。
我：「留返畀你，女網友呢啲…隨時得啖笑，相都無張出到嚟隨時係肥豬暴龍嚟，你記得如果失身喺佢哋手上就同我講，等我得啖笑。」
Q：「係邊度有肥豬暴龍呀？」
Queenie用精靈又可愛嘅眼神望住心虛嘅我，彷彿佢已經得到咗魔王阿道弗斯嘅魔力而成為咗魔女，啲頭髮會變成一條又一條嘅蛇頭，只要我望到佢一眼小弟弟就會變成一條石頭。
健：「唔會啦，聽聲都知唔會係肥豬嚟，無可能！」咁呢個我同意嘅，肥婆應該扮唔到QQ咁尖嗲嘅聲。




我：「唉，你好好幻想，我祝你早日成功。」
我真係唔敢同佢講個事實出嚟，當佢知道咗個真相之後我怕佢會睇唔開早登極樂。
健：「嘻嘻，我重送咗個skin畀佢添呀！」
講到呢句佢即刻眉飛色舞難掩興奮嘅內心之情，方死全世界唔知佢課咗金畀條女咁。
我：「好多網絡女騙子㗎，小心俾人呃呀。」
雖然我而家已經證據確鑿咁知道佢係受害者。