為了實現媽媽遺願，我成為了女兒國唐僧: 131

搞完一大輪，著校服返學，回歸一如以往正常美好靜謐嘅校園生活，繼續心神恍惚咁坐喺女神隔籬上堂，今日開始咗派卷。
朝早已經派咗四科試卷，咦，好似我啲分數好咗啲咁喎，大部份都合格，比起以前嘅過半數唔合格…嗯，我諗大家對我嘅成績其實無乜興趣，剩係話你哋知暫時只有英文啱啱唔合格，希望啲上堂分功課分可憐分可以幫我拉一拉啦。
派卷日呢，隨咗自己啲分數緊要之外，䚎下隔籬位啲分都係一個重大節目嚟；唔知點解，無論你同佢friend唔friend，佢讀書叻唔叻都好，你都係會忍唔住睇下隔籬攞幾多分嘅。
Queenie佢呢…唔合格係唔存在喺佢嘅字典入面嘅，呀…除咗嗰科唔多count嘅家政之外；唯獨數學佢只係高我兩三分，其他科目同我都拉開一段距離。
以前我會諗，應該係一個近乎完美嘅女仔先可以叫做女神，即係家底好，自小受到優良栽培，可以享受豐富嘅物質生活，樣靚身材正，知書識禮考試高分，琴棋書畫都略懂一二咁…
但識咗QQ之後，發覺其實大家口中嘅女神都會家道中落，有時刁蠻任性發脾氣，都會喊，家政都會唔合格，原來重會俾男朋友氹上床，未夠十六歲就失身，做埋啲自己唔願意嘅事…亦都接受到我呢種水平嘅生活，咁其實都係一個普通人嚟啫，無乜太大特別。
今日都係同健康佢哋食晏，諷刺地雖然我哋唔係啲乜嘢讀書人，但今日嘅話題都係離唔開考試嘅分數，包括埋隔籬左右考到啲乜狗屎垃圾返嚟，正所謂五十步笑百步，人生一樂也。
由於QQ成績都係好穩定，所以我唔需要幫佢隱瞞啲乜，反正考試成績係唔受個人資料私隱條例保障。
直至食完飯之後，阿健先至煞有介事咁行咗埋嚟我張枱隔籬，好似想發表啲一鳴驚人嘅事咁。
健：「哼哼哼，前日同你打完傳說之後，原來Kuromi佢重未off。」原來佢就係想講呢個。