thriXt Qantasy 純文字安眠之作 (New: - U2K - 一直上架): 133

健：「點會吖，如果係女騙徒就叫我直接轉賬PayMe佢啦，真係貪你個skin咩。」
Q：「你唔係諗住送個skin就可以溝到女呀？」
我又唔知隔籬位右女神有乜鬼主意…
健：「吓，原來Queenie妳都知skin呢樣嘢㗎？」
Q：「唓，我係女仔啫，都要知你哋平時玩埋啲乜鬼無聊嘢嘅…而家啲女好大咬㗎，諗住一個skin就可以得到人哋歡心，係咪大想頭咗啲呀？」
健：「妳估個個女仔都係妳咩，我諗無個幾千蚊嘅包包送畀妳妳都唔識笑啦，我見人哋收完個skin都不知玩得幾開心。」
Q：「係呀係呀，咁你準備定送多堆畀佢啦。」
健：「當然會啦！等我睇下有邊啲skin係夠晒可愛可以襯返cute cute Kuromi嘅先。」
我聽到佢講QQ…差啲嚇到心都離一離。
然後上堂鐘就響咗，發情男亦都返埋佢個位度。




我：「妳係講真㗎？」我不解咁望住佢QQ。
Q：「有禮物收都開心吖，點解唔收？」
我：「妳又唔係話真係好鍾意隻game，同埋…阿健同我住同一條邨㗎咋，唔係有錢仔嚟。」
不過都好過我嘅，起碼屋企整整齊齊，差少少就變公屋富戶要交倍半租嗰種。
Q：「唓，你估佢如果窮到無飯開重會唔會亂送skin畀女網友呀？我收得開心嗰陣佢都送得開心嘅啫，唔通我叫佢唔好送佢會開心啲咩？」
我：「講就咁講啫，但唔知佢會諗埋啲乜。」
Q：「咁俾我呃都好過俾出面啲女網友呃吖。」
我：「都可能係嘅…」
Q：「唉，我都好耐無收過包包，我條仔年幾以嚟都剩係送過一個畀我咋。」
人哋都重係學生嚟㗎咋，妳一個包包分分鐘係我兩三個月使費…不過我都唔想教訓佢，出身唔同本身就唔會用同一個態度諗嘢。




我：「對唔住呀，我幫唔到妳。」
Q：「傻啦，關你乜嘢事吖，其實我又唔係無包用，只不過係收嗰下開心啫，俾著而家收到我都即刻放上網變賣套現啦。」
Queenie講得無錯，我同佢兩個而家首先要面對嘅問題係維持基本生活所需，好歹我都講過話要照顧佢，雖然而家睇落重未有乜大問題，但長遠而言呢，我確實要諗下解決辦法。
經過三日所有卷都已經派晒，結果除咗英文一科之外其他所有科我都合格，平均分升咗接近十分，比我想象中更加好啲啲，咁我都放下心頭大石，只要keep住呢個水準，到學年尾揀科應該唔會有乜大問題。
無風無浪就到咗星期五，QQ今日放學約咗Yvonne佢哋去行街，當然我又畀咗幾嚿水佢…至於我同佢嘅表情…唔描述喇，實在太難用筆墨嚟形容，一切在心中啦。
然之後我又去買餸。