為了實現媽媽遺願，我成為了女兒國唐僧: 110

飛機一架接一架起飛，我好快就嗌到聲嘶力竭就連聲都出唔到…個口喺度郁，但就聽唔到自己講乜，究竟發生乜事，我嗌到聾咗？
Q：「交叉仔…」背後傳嚟QQ把聲。
我大吃一驚回頭張望，妳唔係走咗㗎咩？！
點知…明明我背面係馬路嚟，但就變咗停機坪！
我再望返前面，都係停機坪同跑道，但就無咗個圍網；吓！我行咗入去？！到底乜構造，乜普通人會入到嚟㗎咩？機管局會唔會搵人拉我㗎！
我有啲驚，喺度快速奔跑，想快啲離開呢度，但原來停機坪真係好大，條跑道又好長…
Q：「低B仔…」
Queenie！妳到底喺邊度？
突然之間，我身後有架747駛緊埋嚟追住我，重要越嚟越快，我當然加速轉彎跑走避開，但…條跑道竟然同我一齊轉，而架飛機已經嚟到我身後，機頭準備撞落我背脊度！
媽！撞飛機空難歸西我聽得多！喺跑道俾飛機撞死我都算係第一個嚕掛？唔係喎，唔通我係Die Hard 2嘅主角，但我去邊度搵個火機返嚟引爆架飛機呢？其實啲火係咪真係可以衝到上個油缸度？




Q：「交叉仔！」
嘩！個機頭撞落嚟喇！
「呯！」
我：「嗚…哇呀！」
Q：「屌你！做乜撞我…」
我同女神個額頭撼埋一齊。
咦？！發生乜事？黑鼆鼆嘅？Queenie喺我眼前嘅？我啱啱…係發緊夢？
Q：「你係咪黐線㗎！仆…」
我：「QQ！」我攬住咗佢，眼淚再一次忍唔住飆晒出嚟，Queenie可能俾我突如其來嘅舉動嚇親，喺我心口入面乜都無講。
我：「QQ！我好鍾…」




係喎，而家唔係發夢，我講唔出口…
Q：「你搞乜呀！我額頭痛死喇。」
我：「QQ…我好…痛！」
的確好痛，係心痛，我實在唔捨得佢離開我，但我唔敢講出口，所以就呃佢揞住自己隻左手…至於隻左手，算吧啦，以前打到周身損晒咪又係一個人過，喊都唔會有人理我，痛咪由佢痛。
Q：「抵死啦！頭先唔係好型㗎咩？逞英雄救靚女咁串嘴吖嗱…而家就喺我面前喊？」
我：「QQ…唔好走…」
Q：「無走呀，走得去邊喎，你無嘢吖嘛，瞓瞓下都係咁大聲嗌我，嚇鬼死人…」
我：「只…只係嗌你？」
Q：「係呀，咪係咁QQQQQQQ咁樣，煩都煩死人，就嚟想走埋嚟kill咗你！」
好彩只係嗌佢名，無講到其他廢話。




我：「我隻手…好痛。」
其實唔係話好痛，但呢一刻我好想好想俾人惜，俾人愛護，有人同自己分擔唔使一個人承受晒。
Q：「損咗就梗係痛㗎啦，姐姐咪幫你包咗囉…」
由於包到實一實，佢只可以按摩一下我膊頭。
Q：「你…個身咁熱嘅？」