為了實現媽媽遺願，我成為了女兒國唐僧: 109——難不成這又是爛作者的爛結局（下）

今日都係一更。

其實已經無嘢可以再講，唔通我叫佢唔好同父母團聚咩；況且我根本畀唔到一個似樣嘅生活環境佢，自己又辛苦埋一份…而家咁樣，可能對我同佢嚟講都係一種解脫。
第一日佢嚟到，我好擔心會相處唔到，好驚佢會唔鍾意我，以為要互相死忍爛忍；估唔到短短一個月我哋就可以融洽生活，有講有笑，互相照顧，重一齊經歷咗咁多事情，係要慳啲使啫。
曾經諗過總會有一日佢屋企處理好個財政狀況就會接佢走，到時就可以鬆一口氣；但而家我完全無咁諗，只有滿滿嘅唔捨得，我想像唔到見唔到佢個樣，聽唔到佢把聲，摸唔到佢隻手仔…嘅日子我究竟可以點過。
唔止無得一齊住，佢離開香港之後，佢就唔再係我同學，我隔籬個座位將會變成空椅子一段好長嘅時間，而我同女神嘅羈絆將會隨時空消逝。
Q：「唔好喊啦，我得閒會搵你㗎喇。」
我：「多謝…咁妳快啲執嘢啦…」
QQ將佢個大行李箱打開咗，第一件放入去嘅係嗰隻殘殘舊舊嘅豬公仔，呢一刻我竟然覺得做隻公仔重好過做人…第二件嘢，佢攞起咗個keyboard。
我：「咁重咁大件…」




Q：「等我睇下先…斜少少，啱啱好，多一吋都入唔到。」佢利用盡個大喼嘅長度同厚度，靠畢達哥拉斯勾屁股嘅智慧勉強塞咗入去。
我：「咁妳咪無位放其他嘢…」
Q：「呢份係我人生最重要嘅禮物，其他嘢…已經唔再重要。」
聽到佢咁講，一滴眼淚又喺我右眼嘅左眼角滴咗出嚟。
接落嚟佢又放咗啲衫褲鞋襪入去個喼度，我就企喺佢身邊呆咗咁望住佢。
Q：「套校服同PE衫我再無機會著㗎喇，你幫我處置好佢哋啦。」
我：「嗯…」
Q：「露台重有兩套未洗嘅底衫褲，你…自己諗下點用啦。」
我：「乜妳重係咁睇我㗎。」
Q：「到咗而家咪講呢啲啦，我無諗啲乜，你想點就點啦。」其實一直以嚟我都係想點都得。




然後話咁快就執好行李，我陪佢一齊搭巴士去機場。
Q：「你畀我推咪得囉，唔係好重啫。」
我：「有幾級樓梯㗎…話咗…要照顧妳。」我堅持。
上到巴士，我哋行上上層，佢坐喺窗邊位望風景，我喺佢左手邊拖住佢，一路上都無乜講嘢。
去到機場，時間已經所剩無幾，check in完之後我哋喺出面嘅鋪頭兜咗個圈，嚟到禁區閘對開。
Q：「下次返香港…我會嚟搵你。」
我狠狠咁攬住佢，將佢收埋喺自己心口度；下次妳返嚟都唔知幾耐之後啦，妳記得先算，到時感覺已經唔同晒，呢一刻係我最後嘅機會可以感受右女神嘅溫暖。
我好想開口同佢表達自己嘅心意，講一聲「我鍾意妳」，但邊有人臨分別嗰陣先嚟做啲咁嘅嘢，所以我忍住咗無講出嚟。
只希望下一次再相見我哋唔會形同陌路。
抱抱下覺得有啲怪，Queenie明明有男朋友㗎，點解佢唔嚟送機嘅？搞到我好似搶咗佢個位咁…不過都無分別，始終都係要走，估計佢都諗住同男朋友分手，邊個嚟送佢最後一程都係一樣。




Q：「交叉仔，再見喇。」
我：「QQ，一路順風，祝妳有美好生活。」
佢惜咗我塊面一啖，慢慢步入禁區，轉彎之後背影離開咗我視線，右女神終於消失喺我身邊。
我跑咗出客運大樓出面嘅馬路，隔住個鐵絲網望入停機坪同跑道。荷蘭飛機係乜色嘅呢？會唔會係橙色呢？我根本唔識分。
我：「QQ！我好鍾意妳！」
當每見到一架飛機起飛我就大嗌一次，好似個癲佬咁。原來香港啲飛機好密，兩三分鐘就起飛一架。

喵：「呼…唔算爛尾嚕掛？瞓下覺先…」
我：「嗚嗚嗚嗚！有無好讀者幫我屌㞗柒個爛作者呀？」