為了實現媽媽遺願，我成為了女兒國唐僧: 108——難不成這又是爛作者的爛結局（上）

今天只有一更。

細蚊件事最終完滿解決，而條仆街都無再搵過佢，實在太好…然後過咗唔知幾耐。
我：「Queenie…妳…做乜扁晒嘴嘅？」
我一起身就見到QQ坐喺梳化上面，頭耷耷又眼濕濕，明明琴日都好正常，於是我就問下佢發生乜事，然後佢就抬起個頭一面憂傷咁望咗我幾秒。
Q：「我爹地…佢send咗message畀我…」
我：「唔係佢有乜事吖嘛？妳咁嘅樣嘅？」
其實我根本唔想理佢老竇老母發生乜嘢事，反正唔關我事；喺我眼中佢兩個係亂嚟到無人有，一個可以炒虛擬幣炒到破產要賣樓走佬，一個就老公走佬轉個頭就可以寄宿喺第二個男人嘅屋企，劈低個女喺親戚度；咁…就算以前嘅生活係有幾咁風光都無用啦，好似我咁，成世都未風光過，咪又係咁過日子，都幾開心吖…但如果可以嘅話我都想風光返一次，一日就夠㗎喇！唔好係大葬嗰日就得，我份人比較實際…
係咪，大人嘅世界就一定係咁複雜？我唔想知，我只係想QQ知道我係關心佢，等佢唔好傷心。
Q：「唔係…佢話啲bitcoin已經升返好多，差唔多夠冚返晒筆數。」佢望住部電話同我講




我：「咁唔係幾好咩！妳係咪又可以過返富家女嘅生活喇？但點解妳個樣咁唔開心嘅…」
Q：「佢話…錢方面嘅問題好咗好多，但係佢喺香港累死咗好多人，又得罪咗好多人，所以短期內都唔可以返嚟住…原來，佢走咗佬去荷蘭…」
荷蘭，係歐洲嘅花都，地理堂教過，荷蘭係一個好自由嘅國家，亦係近世代第一個經歷市場經濟泡沫嘅國家，十七世紀啲鬱金香炒到上天再變成垃圾，無數嘅人一夜間財富清袋，後來變咗炒鑽石…荷蘭周度都係風車，啲人鍾意踩單車，踢波著橙色衫，食大麻同毒菇係合法，啲小姐姐會喺櫥窗入面除衫售賣自己，大姐姐Dutch Lady就喺農場入面揸啲子母奶出嚟…
我：「咁…至少佢可以滙啲生活費畀妳，都唔錯吖。」我正諗住可以解決我嘅煩惱…
Q：「佢叫我過去生活，而且已經接咗阿媽過去…」
事實證明我實在係太年輕…
QQ要走？要離開我呢個屋企？我同佢雖然只係一齊住咗短短嘅一個月，但已經習慣咗佢嘅存在，互相適應咗對方嘅生活…點解？！點解個天要賜個女神畀我，又要喺我手中搶走返佢？雖然我同佢止係同學…朋友…但我唔願意！我唔捨得！我無能為力，我諗唔到嘢，個腦好似缺氧咁…
我：「咁…大概幾時過去…」我盡一切所能，利用腦入面僅餘嘅氧份子拋低呢一句說話。
Q：「今晚，機票都已經買埋畀我。」
吓！快到咁？我重想…我都未同QQ去主題公園玩，未去過學校旅行，未玩過陸運會，未經歷揀科分班嘅生離死別，未享受過三角戀嘅勾心鬥角，未買過驗孕棒體驗呢個世界最易中嘅頭奬…而你同我講，我過埋今晚就永世見唔到QQ？！




爛作者！我恨你！我對你嘅憎惡比起嗰條細蚊名都無嘅仔尤甚一百倍！我要將你凌遲處死！
現實中嘅我無嘢做到，無力感充斥全身，眼淚已經從眼中奪眶而出。
Q：「交叉仔！」
我：「QQ。」
我倆抱在一起。