為了實現媽媽遺願，我成為了女兒國唐僧: 107

架車毫不避忌咁講嘢我就預咗，呢下我估唔到…
佢惜咗落嚟，雖然唔係打茄輪…但就係好深情，啜住啜住咁，我擘大兩隻眼完全唔識畀反應…更加唔敢望左右兩條女，但都feel到佢哋塊面係世界文學巨著《紅與黑》。
車：「細蚊，我哋走喇，唔好阻住人哋。」
佢講完就企返起身，再拖埋細蚊。
車：「交返條仔畀你喇，如果佢有乜問題就送佢去醫院啦。」
蚊：「交叉仔…多謝你，再見…」
欲言又止嘅語氣，依依不捨嘅眼神，我望住兩位EX嘅背影漸遠，估唔到我生命會有呢一幕。
我：「Carmen！畀心機讀書呀！」我大聲嗌出嚟。
車：「記得提我你下年生日呀！」…
佢哋轉返出平台，然後消失咗喺我哋眼前。




終於只係得返我同埋右女神…
Q：「你好開心啦。」
佢用一個平眼平嘴嘅死魚神情望住我，帶住鄙視，帶住不屑，帶住投訴…
我：「無呀…只係幫下人啫，唔使咁上心…」
Q：「其實，你重鍾唔鍾意佢哋？」
我：「當然鍾意…」
Q：「原來係咁…」
我：「鍾意有佢哋兩個做我朋友，雖然怪怪哋…乞嗤！」突然一陣冷風吹過。
Q：「死嘢，唔好講喇，你無著衫小心凍病呀，快啲扶住我返屋企啦！」QQ伸手捉起我。
我：「我隻手小小傷咋嘛，又唔係腳，我重識行識走㗎！」我隨即右手撐地一彈，成個人跳返起身。




正當我想行前一步嘅時候，我成個身體硬咗郁唔到，而且向住某個方向跌出去，眼前重黑黑哋。
Q：「交叉仔！無事吖嘛！」
我乜都睇唔到，但知佢攬實咗我，心口好軟好暖，等我可以卸晒身體啲重量落去。
我：「唔夠血…踎低起身…見頭暈。」
Q：「低B仔，捉實我行啦，無晒你符，真係得Carmen姐姐先收服到你。」
佢右手捉住我右手掛落佢膊頭，左手攬住我條腰，扶咗我慢慢行到返屋企，好彩好近啫。
一返到去我就坐咗上床，用張棉被褸實自己，真係超攰，無晒力咁，就算畀條裸女我都用唔著。
Q：「你件衫點算好呀？」
我：「都爛咗，咪揼咗佢囉。」唉，又嚿幾水。
Q：「都係鎅開咗一條痕啫…洗走啲血跡再聯返應該重可以著，攞嚟留為紀念囉。」




佢攞住喺度睇都搞到成手血跡…
我：「都得嘅，幫我浸住先啦，唔該QQ。」
之後佢又洗返乾淨隻手出返嚟。
Q：「原來Carmen都真係幾兇狠㗎喎。」
我：「係呀，佢做嘢好果斷…爽快利落㗎。」
Q：「我係話佢個心口胸狠啫，你諗多咗。」
我：「都係嘅…咁妳都唔算差吖…」
Q：「起碼重差一個cup以上啦。」
我：「咁佢係中六吖嘛，妳先中三，重有得追嘅…Queenie，好彩妳喺度咋，如果唔係…我受咗傷得自己一個喺度，一定好慘。」
Q：「咪玩啦，如果我唔喺度，細蚊實上嚟報恩啦，到時你咪重幸福。」俾佢突破盲腸添。
我：「總之…多謝妳關心我。」
Q：「唔好講喇，快啲休息下，瞓返覺好嘅先啦。」
由於失血過多，我唔使一分鐘就瞓著咗。