為了實現媽媽遺願，我成為了女兒國唐僧: nōnāgintā novem (ūndēcentum)

我：「咪隻揪囉，你唔好喊呀！」
「行啦，上去平台（車立）口。」
我：「喂，張枱冧咗你唔使執返呀？」
「執乜撚嘢啫？你唔係驚俾姑娘鬧呀？死低B仔，無膽匪類，好瘀皮呀！」真係吹佢唔脹，呢度我成日嚟，實在唔想啲職員睇我唔順眼，又無理由自己一個傻仔喺度執㗎。
結果有個打開乒乓波嘅男仔走咗過嚟。
「阿爽，呢度我執啦，你去做你嘅大事。」
我：「麻煩晒你。」
睇嚟我平時對人都幾好喎，估唔到無端端會有個唔熟嘅人走嚟幫我，好慚愧我連佢點稱呼都唔知，而佢竟然識嗌我真名…
於是我哋三個離開咗中心，上咗去平台（車立）口，細蚊佢已經驚到唔敢出聲，但我就充滿信心。
老竇行船成日會路經啲第三世界國家，雖然香港同嗰啲第三世界國家都已經去到無乜分別嘅地步，但佢為咗安全起見都學咗啲實用格鬥術同自衛術，有啲係公司安排畀佢，有啲就自己報嘅；另外重有啲急救呀，拯溺呀，小型船隻駕駛牌照呀，基礎機械電工呀…我都唔知喇，總之喺架船用到或者對自身安危有幫助嘅佢都會走去學。




佢成日同我講，做人係為咗搵生活，返學讀書都只係其中一種方法，就算讀唔成書呢個世界都重有好多條路可以俾你生活；只要有鬥志，肯試肯學，留意多啲世界唔同嘅事物，一個有手有腳嘅人係唔會餓死；問題係我而家眼前嘅嘢就只有讀書，所以都係要讀書先。
我有時覺得佢咁講同黃子華棟篤笑無乜分別，即係話當你重係學生，唯一嘅搵食方法就係讀書，至少香港係咁…至於佢點解要做呢份職業我就不得而知喇。
重點喺…佢都有教過我啲基本嘅格鬥防身術；佢講過呢個世界最恐怖嘅危險唔係啲乜嘢攞你命三千秘密武器，又或者九陽神功等嘅曠世絕技，而係喺黑暗中嘅敵人。當危險嚟得光明正大，你總搵到方法應對，跑車撞你都可以唔死，子彈都可以諗辦法避。
當然…佢係同我一路睇緊die hard一路講，我就唔知佢有無咁勁喇；總之而家條粉腸話要同我隻揪，首先就係唔可以怯。
「撚樣！過嚟打我吖，廢柴！」鬼得閒理佢。
阿爸講過，十個得個樣嘅垃圾，有九個打人第一下都係右直拳，而且拳頭握唔緊，無馬步成個身連人帶拳咁飛過嚟，實質上呢啲係叫揼唔係叫拳，而且成個人鬆泡泡，如果兩個人都唔識打就會攬埋一嚿又揼又搲，呢種叫cat fight，女人專用，重點係要打到裙拉褲甩增加收視，就連國際最著名嘅格鬥節目WWE都係咁教㗎，一堂梯飛落條女度唔係打斷肋骨，而係車斷條Bra帶，就知佢哋打得幾血腥啦。
我：「唔知邊個廢啲呢？著我舊鞋嘅垃圾。」
對唔住細蚊，我唔想咁話妳嘅…細蚊望住我好似唔多開心咁，我順便將褲袋入面部電話交畀佢。
「我屌你老母！」
呢個時候佢開始衝過嚟，去到大約一米範圍就將個身側向右邊，明顯就似係想撼頭埋牆多個似打人，加埋搬咗個老母出嚟，就知實力非同凡響…