為了實現媽媽遺願，我成為了女兒國唐僧: centum

我札好個馬，左腳前右腳後，反射性咁望住佢隻右手用左手擋格，卸咗佢啲力之後就右腳向側踏前一步，同一時間用拋鎚打落佢個肚度，軟淋淋嘅…低B仔連繃緊啲肌肉保護自己都唔曉。
正所謂寧願雞髀打人牙骹軟，都唔好肉包子打狗，邊個夠硬就邊個贏…
為咗避免佢攬實我亂嚟，所以我又即刻後退返一步，睇住佢揞實自己個肚喺度摸，應該幾痛下。
我：「不如走啦，唔好煩住細蚊得唔得…」
「我要打死你！」
通常傻仔出完拳發覺無用就會出腳，以為距離遠啲安全啲又大力啲，都係嘅…如果踢得中嘅話；一腳，兩腳，三腳，而我就不停向後跳旋轉咁避，嘥下佢啲無謂嘅精力。
「知驚喇咩！咪走呀你！」
然後一腳踢起，呢下踢到好高，我睇準機會用雙手鉗住佢隻腳；吖，佢又真係無乜力，又唔識收腳，俾我捉實咗隻腳吊喺半空度…
「屌！我屌你！」
我又唔係女，屌乜撚啫…


佢一路發爛咁揮拳，我一路抬住佢隻腳避同擋，試問咁嘅姿勢又點發力喎，打到都唔痛啦；我哋僵持咗大約三十秒左右，佢喺度跳下跳下郁來郁去其實我都幾鬼攰下…終於條友忍唔住成個人跳起發爛咁（足牚)，我就當然唔會同佢鬥力啦，就將佢隻腳向上推再彈向後。
唔使諗，條友就好似撻生魚咁跌落地…有用手撐住嘅，如果唔係我驚佢起唔返身。
我：「唔打喇！我帶細蚊走喇！」
我覺得實在無打落去嘅必要，嚟到呢度已經勝負已分，我又唔係想同人打架，費事理佢呢啲無謂人，我目標只係送細蚊返屋企。
「咪走！」
佢爬返起身，伸手去後袋揞咗把cutter出嚟，今次真係我屌佢老母，有啲人係唔打鑊佢甘係唔得嘅…
我：「細蚊行開！」
佢一路行近我，右手攞住把cutter左右拂，我就當然一路係咁避；佢個樣面目猙獰好似要殺咗我咁，唔理得咁多喇，我要搵個缺口去結束呢場鬧劇…
就係呢一下！佢右手拉弓向右上去到最高點，今次我唔再係向後避，而係右腳踏前行入佢心口前面，兩隻手格落佢右手手腕同上臂，再即刻用左手捉實佢前臂。



亂咁嚟十萬字，有感想嗎？