為了實現媽媽遺願，我成為了女兒國唐僧: nōnāgintā octō (duodēcentum)

第一Q，佢打我中間隻棋，得一粒彈咗出嚟，其他仍然整整齊齊，睇佢面色好似都唔多滿意。
到我，兩下四十五度角直擊佢兩隻角棋，當然實食無黐牙入晒兩粒。
「傻仔咪讕醒…呢兩粒…不朽就送㗎啦。」
雖然佢把口重喺度也文也武，但睇得出佢開始怯。然後我細心觀察佢嗰一排十四粒嘅棋，佢擺棋唔夠靚，右邊第五粒俾我頭先嗰兩下震咗出嚟少少，等我可以閘側少少射落去唧條邊，如果唔係呢下好難有chance嘅，因為一排棋會互相卸力。
聽唔明嘅就算啦，一係去玩多啲就會明。
一唧，右一直接落洞，另外嗰四粒都俾我打散晒；接落嚟嗰四下，一下一隻清晒，而佢粒左一都已經震到喺洞邊，入埋；一Q入咗佢八隻棋，即係一半，最後我埋Q打散埋嗰八粒，到呢一刻我已經肯定兩Q內埋佢單；而佢，無可能一Q清袋。
佢無再講嘢，先係打入飛咗出嚟中間嗰隻，再爆我中坑，不過入多兩隻之後隻白棋跟埋入洞，發球權又嚟返我呢邊。
好快我就入左佢六粒散棋，而家佢枱面只係得返兩粒，其中一粒都幾貼邊，如果要呢Q結佢有少少難度，另外我為咗好睇啲，所以就將粒出啲嘅棋打落粒邊棋度，而家一左一右泊好叉燒位。
嚟啦，一Q清我囉！咪送細蚊俾你屌囉。
如果係真都無辦法，鬼叫細蚊揀埋呢啲仆街拍拖重要畀帽我戴，佢自己都有責任，做到咁我已經仁至義盡。




呢一Q佢入咗我六粒，我呢邊重有七粒棋剩，確實佢都唔算渣，我絕對唔可以再放水。
「啪。」我入佢左袋。
我：「細蚊準備執嘢走啦。」最後右袋，set Q。
「啪嘭呯！」唔係入波嘅聲…
係條仆街踢冧咗枝三叉腳，成個枱面跌咗落地，剩返我凌空揸住枝Q射空氣。
我：「你又想點呀？撚樣！」我都開始䒐。
「哎喲，張枱又會咁唔穩都有嘅，今局計唔到，sorry噃。」我真係屌佢老母冚家鏟。
我：「咁點呀？計下一局呀？」
「唔打棋喇，張枱咁嘅質素，玩其他啦。」
我：「咁玩乜呀，粉腸。」




「隻揪吖！敢唔敢呀？」
買大開大，我都正想打佢一身好耐。