thriXt Qantasy 純文字安眠之作 (New: - U2K - 一直上架): nōnāgintā duo

兩日話咁快就過去，除咗放飯有得休息同班兄弟吹水玩下之外，其餘時間都俾QQ捉住喺屋企溫書；佢同我講以前逢星期一三五補習到七點，逢四六就去學琴，而家多咗時間用，就更加唔可以懶，問題係點解我要陪佢？
唔通真係阿媽派佢嚟督促我溫書？
咁…都OK嘅，起碼係靚女嚟，有啲提神作用。
中三嘅成績都比較重要，我亦唔想被迫讀自己唔鍾意嘅科，有得揀總好過無得揀。
另外原來Queenie個中五男朋友都幾好用，有嘢唔明唔識計數，send幅圖過去等十分鐘到就有答案；雖然唔係學霸級，但大部份嘅問題都可以解答到，又或者佢可以問到其他同學啦，咁我又明多咗一啲點解QQ會同佢一齊。
話咁快考試就開始…
《習慣說》…我知！劉蓉教曉我哋欺山莫欺水，玩得水多就會潛水潛上癮，到周身濕晒時就會沉淪，無心向學…正所謂子非魚，焉知魚之墮落…嗯，答到道理，有引用其他文章，滿分喇掛？
Sulphur…我知！係2，8，6，味苦性熱，有毒…點解好似有啲唔妥咁嘅，周公唔係話幫我嘅咩？硫磺係臭，屎係臭，都係黃色，即係solid？non-metal？Bromine係乜色？嗯…Bromine係液體，即係尿，即係…要睇飲得多唔多水㗎喎，無理由答no colour㗎，即係腎石咁款，deep yellow or brown，嗯…
考試週只係返上半晝，呢個係不幸中嘅大幸，中午大部份同學都返屋企食飯，咁我同Queenie又可以慳返餐出街飯，都非常唔錯。
話咁快就到咗尾二嗰晚，考埋最後嘅中英oral就收工走人，重有一日乜春教師偷懶日假畀我哋放。




Q：「聽日…考完試…諗住同Yvonne佢哋食晏…」
我：「咁咪去囉，我又唔係約咗妳喺我屋企，妳想去邊都得㗎，唔好三更半夜都唔返嚟又唔話我知就得，我唔多唔少都會擔心。」我一路玩隻掘地嘅電話mini game一路答佢，就考完試QQ都無再迫我坐定定對住本書。
Q：「但係…我銀包…已經無晒錢…」
我呆咗咁望住佢。
又係喎，雖然好多時都喺屋企食，但始終有時…除夕晚嗰餐都應該唔嘢少；佢上次賣底褲有五百剩，加埋原本幾百，可以捱到今日已經好叻女，算係超額完成。
喺屋企食其實每餐都係我出嘅，但感覺就無咁突兀，而家要直接畀錢佢，呢種feeling…
唔係，呢個結果係必然。