為了實現媽媽遺願，我成為了女兒國唐僧: nōnāgintā trēs

Queenie扁住嘴，縮埋個膊頭望住我，右手捉住左手手腕唔知點咁…
我攞起個銀包，入面有四張一百蚊紙加兩三張十蚊廿蚊，我抽起咗三張紅衫魚放喺佢隻左手度。
我：「夠…唔夠…可以用住先？」
Q：「麻煩晒你…應該都OK…」佢個樣係有口難言。
諗多諗，佢同班姐妹食飯，食完好可能行下街，分分鐘睇戲，經過珍珠奶茶鋪可能又要買返杯，又或者一齊去買下衫，總唔可以個個都有收穫而QQ就兩手空空，咁樣會好怪，好樣衰。
而且唔可以俾佢哋知道而家QQ淪落到咁。
我：「我…聽日…㩒多五百畀妳啦。」
Q：「對唔住…我喺度又食又住又拎…」喊咁口。
我：「唔緊要，話過要幫妳㗎嘛，係咪？」
Q：「我知你其實唔係認真…只係我迫你無得揀…」




我：「邊個話我唔係認真！我要養妳，Queenie！」
講完都覺得自己戇㞗…認真嚟講，我係養唔起嘅，因為我連自己都未養得掂，我最多只可以令佢叫做勉勉強生活到落去；但，我又真係唔係講笑，QQ係一個好女仔，而且又咁靚女，雖然呢個唔係重點…如果我有能力，絕對想養佢一世放喺自己隔籬；其實佢又邊會肯吖，只係我太多心。
Q：「介唔介意…我問你…重有幾錢喺度…」
我：「嗯，都重有七千到嘅…」
Q：「咁嘅狀況，大概可以用到幾耐？」
我屈指一算，確實聖誕使得多咗啲，不過又有我份聖誕禮物打返和，如果照計落去…
我：「我諗，都重有四個月嘅。」
Q：「四個月…」QQ一面難掩憂傷之情。
我：「唔使咁灰喎！有錢駛得萬年船呀！」
無論將來係點，呢一刻我都要佢開心返先！




Q：「屌！你係咪想講船到橋頭自然直呀？！」
我：「係…係呀，一時講錯啫…」
Q：「唔係一時呀！係全錯呀！原本嗰句都係錯到離晒大譜！係有錢使得鬼推磨！同埋小心駛得萬年船呀！你都亂咁嚟嘅…中文實fail啦。」
我：「咁加埋，咪一句有晒兩種意思囉。」
Q：「你都黐線㗎！重話要養我添，你係咪傻㗎？」
我：「對住妳咁靚女，霍金都變柏金遜啦。」
Q：「我頂你，柏金遜係形容人老咗退化，唔係話人傻㗎，想拋書包唔該你慳返啲啦！」
見到Queenie有返精神同笑容就乜都好，但眼前嘅問題始終要解決…
到第二日考oral，每個學生嘅時段唔同，無限制學生幾時返放學，只要乖乖應考就好。
QQ十點半就考完返屋企先，我就十一點半；返到去就見佢喺度襯緊衫；係呀！著住胸圍底褲任我睇呀！你班小朋友唔好問啦…乜色？是Q爛但啦，有乜重要啫，你想乜色咪乜色囉！各識其色啦！話我有錯別字？！識、適、色、式…你就真係sick！全部都得啦，有無聽過色即是色？