為了實現媽媽遺願，我成為了女兒國唐僧: nōnāgintā ūnus

龜：「你哋玩嗰啲…太複雜…太難玩…」
健：「你日撚日喺度抽卡扭蛋唔厭㗎咩？」
龜：「咁…我係鍾意玩呢啲。」
我：「你咪由得佢囉，人各有志，唔好迫人玩啦。」話晒我叫佢嚟，都唔想佢唔開心。
就係咁，我哋霸住茶餐廳張枱，利用lunch time僅餘嘅時間開咗一場三排嚟玩，呢個年代就係咁，亦都唔止我哋呢一枱做呢樣嘢，所以奉勸各位街坊師奶阿叔唔好呢個時段落嚟搵食。
健：「係呢，咁耐唔見Kuromi玩嘅？」
我：「人哋乖乖女嚟㗎，點會成日打機呢？」
健：「有啲料到喎，咁快就知人哋乖乖女？」
我：「吓…無呀，我㞗估㗎咋。」
康：「你哋喺度講緊乜呀…喂！中塔清兵呀！」




健：「佢個爽歪歪喺傳說識咗個女網友咋嘛…屌你！你叫我去清兵然後打撚咗我個藍？！」
康：「打野攞頭兩個藍好正常吖！」
健：「又唔見你去偷對面嗰個！係呢，Kuromi係咪add咗你friend㗎？」
我：「欸…係呀，如果唔係點邀佢玩。」
健：「點解佢add你唔add我㗎？」
我：「我點知喎…」我重記得佢話考慮下。
健：「係咪你條友仔叫佢唔好add我？」
我：「我先無咁無聊囉，區區網友一個，好心你唔好咁多性幻想啦！可能係大叔嚟㗎。」
健：「無可能！如果係靚女相就可能係大叔，用Kuromi嘅一定唔會係。」唔知點解我覺得佢今次講得好有道理。
我：「唉，就算係，都可能係出咗嚟做嘢嘅大姐姐嚟，又或者小學生妹妹，邊有咁啱。」




健：「我睇唔似，佢玩得幾穩，中規中矩，一定唔係小學生，如果大姐姐通常一係玩得好勁，一係就亂㞗咁送死…不過就算係大姐姐，可能佢想調戲下我呢啲小弟弟呢，我唔介意奉獻第一次㗎。」
我都懶得睬佢，好明顯QQ唔add佢係明智之舉。
呢個時候細龜佢伸咗個頭埋嚟睇我玩，宅男就係咁，就算自己唔玩都鍾意八下人哋玩成點咁。
我：「欸…你喂飽咗飛鳥嗱？」
我有做功課，知道乃木坂入面最紅嗰個靚妹叫飛鳥，好瘦，望落細細粒粒，個樣有啲毒，唔識形容，我覺得Queenie重靚過佢，身材又肯定贏佢。
龜：「唔使喂…呢隻game唔係tamagotchi。」
服咗佢，竟然認真答我，都唔知話宅男係低B好定係可愛好喇，估唔到佢會用呢啲老古懂玩具嚟做對比，可能因為呢排復刻啦，間唔中都會見到玩具鋪掛兩隻係櫥窗。
我：「我意思係…你做晒啲任務嗱？」
龜：「有排喎，啱啱清晒啲tickets啫。」
簡單嚟講，手遊分兩大類，一類好似我哋呢啲競技類，想玩可以由朝玩到晚，唔想玩停一兩日都無乜影響，重點係你嘅技術；一類就係耕田抽卡game，無得係咁玩，但要依時玩，隻game要你做乜就跟住做乜，重點係課金同運氣。




我：「有興趣不如試下一齊玩？」
龜：「唔喇，睇你哋玩開心啲。」都咪黐咁埋吖…