為了實現媽媽遺願，我成為了女兒國唐僧: 八十八

食完飯之後，我要去執返好部電腦先，首先裝driver，然後裝軟件，例如各種downloader，播片神器，同埋攞嚟做功課嘅office。
Q：「你係咪要set返部腦先呀？」
我：「係呀，要上網搵啲driver，如果唔係printer都用唔到…」
Q：「咁不如唔好煩喇，我落去買份報紙啦，都係幾蚊雞啫。」
我：「嗯，麻煩晒妳喇，Queenie。」
然後，Queenie咁就出咗門口。
C drive無咗啫，D drive都重有啲嘅，於是我即刻試下個player同埋對喇叭，開啲田舍學生嚟睇下；即係咁，我份人係比較貼地嘅，初初對住高高在上嘅QQ都幻想唔落，諗到佢囂張氣焰嘅嘴面就只會想㩒佢喺枱面車佢兩巴；但事到如今佢嘅嗰種田舍味已經開始慢慢滲出嚟，如果可以再加副眼鏡就好。
電腦要掃毒，人都要排毒，排清毒素身體好，都係嘥五分鐘多啲啫，然後話咁快女神就攞住份報紙返上嚟，坐低好認真咁喺度揀新聞，希望佢會幫我做一半啦。
話就話整電腦，難得我可以逃避QQ嘅威迫利誘，當然繼續黐實部腦扮專心整嘢啦，事實上我已經喺度上網周圍轆睇自己啲嘢，免得又要攞返本書出嚟溫。
無咗一大半，都要補返啲貨嘅，不過我又唔好意思喺女神面前搵片；我最介意唔係佢睇到我睇埋啲污糟嘢，而係話我嘥時間喺啲無聊事情上面，然後捉我去溫書做功課。




呀！不如，就咁啦，等我搵嗰套乜鬼…
咁就過咗成粒鐘。
Q：「喂，交叉仔，你搞掂咗部腦未呀？」
我：「啊，OK啦，都用得㗎喇，有無…幫我搵埋新聞呀？」
Q：「搵咗喇，幫你寫埋要點，你照寫就係。」
我：「妳實在太好人喇！女神係天使嚟！有光環㗎！」聽到佢咁講我興奮到扯旗咁滯。
Q：「知你呢啲魔鬼要搵鹹片嘛，點敢阻住你喎。」
我：「Queenie，妳真係體諒我。」
Q：「無辦法啦，鬼叫我做錯嘢，俾你放肆下。」
我：「魔鬼同天使可唔可以做朋友㗎？」




Q：「乜你唔知魔鬼原本都係天使嚟嘅咩…吖，真係吖，而家啲報紙薄切切，都唔抵買嘅，原來連份風月版都無埋，諗住摷出嚟畀你J住先㗎嘛。」
我：「咪玩啦，今時今日重邊有人睇㗎，除咗啲唔識上網就嚟兩腳一伸嘅阿伯之外。」
Q：「唔係呀，我覺得幾得意㗎。」