thriXt Qantasy 純文字安眠之作 (New: - U2K - 一直上架): 八十九

我：「吓…有乜嘢會女仔覺得得意…」
Q：「咪啲白癡打油詩囉，例如乜嘢阿妹今晚心慌慌，剝衫剝褲等天光呢啲。」
我：「我覺得好無聊囉。」中文叻嘅女神品味確係與眾不同，實在令我拜服。
Q：「不如你試下作埋下兩句吖。」
我：「唔好啦，我都唔識呢啲嘢嘅…」
Q：「男仔唔係好鍾意謦淫嘢嘅咩？快啲作！」
喺佢嘅淫威之下，我只好班門弄斧…
我：「女神沖涼起勢䚎…門外係咁捹鎯鎯…」
Q：「哈哈！都唔係接住嘅，重要…好奇怪！」
我：「都話唔識…咪笑我啦。」




Q：「唔係吖，我好開心喎，話時話，有無䚎我先？」佢對住我露出蠱惑嘅笑容，重淫淫哋…
我：「無呀，我正…人君子嚟。」
Q：「因為唔使䚎都已經夠多嘢睇咋掛。」
我：「唉，唔講呢啲，妳做完功課，不如抖下過嚟一齊睇片吖。」
Q：「你…邀請我一齊睇AV？」
我：「係呀，超級黃色㗎，有無興趣先？」
Q：「睇咪睇，你估我怕你呀！」
佢講完就擔咗張凳坐咗喺我隔籬。
我：「妳…真係唔介意？」
Q：「有乜好介意，你唔係以為我未睇過呀？」




我：「但呢套好露骨㗎喎。」
Q：「有幾露？無打格四仔？真嘅我都見過啦…」
我：「好多角色㗎喎，屁股扭扭下咁…」
Q：「嗱，我唔睇gay，唔要見虐待，唔要排泄…」
原來佢比起我想像中更瞭解呢個世界嘅運作…
我：「放心啦，一定無妳所諗嘅嘢。」
Q：「咁快啲播啦，我等得好心急喇。」
呢個右女神確實係神神化化，佢想睇我反應？
於是我打開咗個download folder，click咗一個file，隨即有幾隻超黃嘅角色出現咗喺螢幕。
空氣凝結冷靜咗大概三點一四秒，亦即廿二除七秒咁上下，QQ就轆大隻眼露出歡笑嘅表情。




Q：「BaNaNa！」
我：「Gelato！」
Q：「GanBei！」
我：「Kevin！」
Q：「Stuart！」
我：「Bob！」
Q：「Minions！」
我：「Queenie鍾唔鍾意呀？」
Q：「鍾意！好鍾意呀！」
我：「咁妳睇過未㗎？」
Q：「睇過一二集，呢個外傳未睇。」
我：「咁就好，我去斟杯zero畀妳。」
唔止zero，重有包日清胡池屋嘅譚仔麻辣豬耳味薯片，我打開放咗喺個keyboard tray上面。
我一坐低，Queenie就用左手拖住我隻右手，自己右手就攞薯片食，重喂埋落我個口度。
就係咁，我同佢手拖手度過咗愉快嘅九十分鐘，一齊傻笑，一齊大嗌，一齊㞗叫學Minions講嘢；其實我哋都重係細路仔嚟咋嘛，好應該繼續充滿童真每日開開心心生活。




睇咁多AV做乜吖，成大個女神喺隔籬，不如諗下點樣令佢開心啲好過啦。
雖然無大銀幕，無環迴立體聲，無爆谷，無大班凳；但我有妳，Queenie，有妳真好。