為了實現媽媽遺願，我成為了女兒國唐僧: 八十七

我：「對唔住Queenie！我唔應該鬧妳！嗚嗚嗚！」
Q：「哎呀，你又做乜呀，傻瓜嚟嘅，要講對唔住嗰個係我至啱，係我自把自為搞成咁。」
我：「唔緊要啦，都過咗去，嗚嗚嗚嗚…」
Q：「你呀，唔準嬲我呀，咁樣我唔開心㗎。」
我：「唔嬲喇，唔好唔開心啦。」
Q：「應承我以後唔準嬲我。」
我：「以後…嘅嘢，好難肯定㗎喎。」
Q：「你話過會惜我，會養我㗎，如果你嬲咗我，我咪乜都無晒囉，得返自己一個點算好…」
我：「咁我以後都唔會嬲妳啦…」
Q：「咁妳有乜緊要嘢就同我講定先，如果我做錯咗你要話我知，唔準收埋喺心入面㗎，最多我俾你罰返，同埋一齊解決問題，好唔好。」


我：「好。」
我繼續攬到佢實一實，感受佢柔軟豐腴嘅身軀。
Q：「但你嗰度…好似曳緊喎。」
我：「係男仔都曳㗎啦…」
Q：「唔好成日睇AV啦，正正經經識返個女朋友，咪有得乜嘢囉。」
我：「隨緣啦…」
Q：「起身喇，喊包，去食飯喇，就嚟凍晒。」
我：「妳唔準笑我㗎。」
Q：「我又點會笑你呢。」
我：「為咗啲咁嘅嘢喊囉。」


Q：「都唔係呀，呢啲嘢對你嚟講可以好重要㗎嘛，我細個俾表妹撕爛咗張貼紙都喊足一整晚啦。」
我：「咁樣唔會好攰嘅咩？」
Q：「喊包係唔會攰嘅。」
我：「多謝妳氹返我。」
Q：「多謝你照顧我就真，行啦，去食飯。」
QQ拖住我隻手，一齊離開咗被竇。
Q：「呀，擘大口。」佢將一羹叉燒飯送入我口。
我：「喑。」我將一啖飯送入肚入面。
Q：「其實日日對住我，唔使AV隨時隨地都J到啦，唔係咩？」
我：「成日對住，會慣咗…就無乜感覺。」


Q：「咁又係，男仔個個都係咁花心嘅。」
無錯，喺性方面可能真係會適應咗，可以忍到嗰股慾火，如果唔係頭先佢喺被竇入面除咗衫就已經為所慾為咗啦；但係我望住佢可愛嘅樣，我基本上可以肯定到，我已經鍾意咗佢。
明知無可能高攀得起，結果都係走唔出佢手指罅，有乜謂吖，最多咪做佢身邊隻兵…不過，我願意。