為了實現媽媽遺願，我成為了女兒國唐僧: 八十一

到咗中環落船，上天橋，望住對面IFC嘅一大個蘋果LOGO，玻璃箱入面塞滿咗嚟朝聖嘅顧客，睇嚟今晚入面個收銀會轆卡轆到無停手；然後我又諗返起QQ嗰部粉紫色iPhone，確實一部靚嘅電話可以為女神嘅整體印像加到唔少分數；又其實，iPhone都唔係好貴啫，買返三年前嘅model嘅話，不過我唔需要，只有Android嗰隻唔起眼嘅綠色垃圾埇機械人先襯得起我嘅平實。
自由自在的我繼續喺度遊街，只不過唔係平時嘅屋邨公園球場青年中心便利店，而係五光十色嘅夜中環…走過IFC，去到置地，再落德輔道中；比起尖咀海旁，呢度無咁多後生仔亦都少人啲，大部份係啱啱放工著到身光頸靚嘅成功人士；經過皇后像廣場，睇住匯豐總行紅白色嘅外牆燈喺度流動，行到力寶中心，唔經唔覺嚟到太古廣場。
我到底喺到做緊乜？
遊街囉！吹呀？唔抵得我無王管呀？
太古廣場無記錯我嚟過兩次，其實呢度係同我無乜關係嘅；不過小學嗰陣，老竇帶我去海洋公園嗰陣有順便嚟過呢度，佢話以前呢個商場有間M記，同而家嗰啲好唔同，門口有一大個麥小丑坐喺度，入面有小飛飛滑嘟嘟裝飾，有蘋果樹又有壁畫，最特別係入口度放咗一部識自己彈嘅琴喺度，當時嘅我根本就唔知佢喺度噏乜㞗。
重點嚟喇，佢話呢個商場就係初戀嗰陣第一次嚟行嘅商場，咁就約咗個女仔去海洋公園，去之前就嚟呢度嘅M記食晏，當時兩個人唔敢拖手望住部識自己彈嘅琴望咗好耐。
然後我問佢當年同阿媽喺度食咗乜。
佢話嗰個唔係我阿媽嚟，夠晒吹脹…
我記得嘅就係得咁多…喺商場兜咗個圈嚟到地庫一間叫GREAT嘅超市，見到啲熟悉嘅logo；嗯，我喺銀包入面囉咗張紙出嚟…
太好喇！原來同阿康買返嗰張禮卷呢度都用到！等我二話不說入去用咗佢先，多謝李生！




雖然我不學無術，但係都有少少常識嘅，佢嘅超市，靚啲嘅就叫international同fusion，再靚啲就叫Taste，咁我諗呢度…係最高級嘅一間掛。
高級又唔一定好貴嘅，最緊要有特價，一入門口就已經見到好多熟食櫃，呢個時候先諗起原來自己未食嘢…有盒韓式石鍋雜錦牛肉飯，五十幾蚊變三十幾蚊，就係你喇！
跟住順便入去睇下有無嘢買，QQ用牙膏好鬼多要買返pack先，再買少少零食，我想講呢度有好多平時見唔到嘅奇怪嘢，好好行。
當然大部份我唔會用到亦買唔起，但睇下都開心嘅，埋單就一張禮券加張紅衫魚找返幾個散銀。
跟住去邊？返屋企？又唔想返住。
我喺度等乜，等新年？等QQ？我都唔知…
行下行下去咗中環海濱長廊，搵個位坐低食我嗰盒石鍋飯。

今日得一更，無論你哋係想醫失眠嘅大人又好，想睇甜密蜜刺激激嘅小朋友又好，覺得我㧻眼㧻鼻但又忍唔住睇我啲字又好，認為我啲故先搵到感覺又好…
跪求你哋睇下一篇文：




https://www.shikoto.com/articles/199021.html
寫得好用心，有意義，絕對唔會嘥你哋時間；營養一定好過我寫嘅糖水。