為了實現媽媽遺願，我成為了女兒國唐僧: 八十二

「十，九，八…三，二，一，Happy New Year！」
發下怐愗，望下個海又諗下嘢，原來咁就十二點鐘，雖然呢度無尖咀或者時代廣場咁多人，不過都會有人倒數嘅；好，我都夠鐘行返去地鐵站。
我：「喂，Queenie，新年快樂呀！」
Q：「交叉仔新年快樂！」
我：「妳同佢哋玩完未呀？」
Q：「玩完喇，而家走緊，不過好多人…」
我：「妳自己一個人？」
Q：「係呀，你…唔喺屋企？後面咁嘈嘅？」
我：「我…經過尖沙咀，一唔一齊返去？」
Q：「吓？咁…好呀，一齊啦。」




我：「喺頭先分開嗰度等啦。」
魚貫嘅人潮洶湧咁由個入口度流落嚟閘機，好彩我夠高一下就望到Queenie喺邊。
我：「Happy new year，QQ女。」
Q：「你…喺度等我？」佢一面憂心忡忡咁問我。
我：「無呀…我見得閒咪順便周圍行下囉，食咗飯，同埋買咗啲嘢。」
Q：「有乜嘢要買成四粒鐘？」
我：「朱古力呀，啱唔啱？」我決定答非所問。
Q：「對唔住呀，要你等咁耐，實悶死都似…」
我：「唔會呀，我以前都係咁通街躝㗎啦。」
Q：「你重做咗啲乜呀？」




我：「咪睇下燈飾，去海邊望住個海諗下嘢，同埋累到某個爛作家寫咗二千粒字咁樣囉。」
Q：「吓？唔明…你講緊乜呀？」
我：「唔使明，總之我玩得好開心。」
Q：「如果可以嘅話…我都想帶埋你一齊玩㗎。」
我：「欸…我諗呢啲場合…大概唔係幾適合我。」
Q：「你分明係唔想對住啲八婆咋嘛，我見到Yvonne個男朋友灰機個樣就覺得好好笑，我諗男仔喺度真係會好辛苦。」
我：「呀，原來妳係去做電燈膽嘅…」
Q：「唓，咁我又唔係無男朋友，同埋都係得Yvonne帶埋佢條仔嚟曬命咋嘛。」
我：「嗯，辛苦晒你哋…咁玩得開唔開心呀？」
Q：「咪又係咁，問乜鬼吖，行喇，返屋企。」




Queenie拖住我隻手捉我去扶手電梯…我…好開心，今年嘅除夕係我過得最有意義嘅一年；老竇我叻過你喇，追女仔都唔敢拖人哋隻手，我無得追佢都有得拖啦。
入到地鐵車廂，好彩又唔係太多人有得坐，Queenie繼續拖住我隻手挨喺我膊頭；搭搭下對面嘅乘客落咗車，我同QQ都透過對面塊玻璃嚟望住對方；咁其實…雖然我哋住埋一齊十幾日，我都唔會話停喺度望實佢，始終佢太靚女唔多唔少都有啲尷尬，不過透過塊玻璃望過去，我哋都無迴避，將眼球停留喺對方嘅視線上面。
我：「Queenie，妳今日好靚女。」
Q：「即係話我平時唔靚女啦。」
我：「唔係呀，平時都靚，但衣著唔同嘛。」
Q：「廢話可以慳返，唔係點做你嘅右女神。」
佢又真係坐喺我右手邊喎。
我：「咁鏡入面嗰個係咪左女神？」
Q：「係呀，過去溝佢啦。」