為了實現媽媽遺願，我成為了女兒國唐僧: 80

呢個鐘數，全世界都放工，九成人會準備今晚有乜特別活動，地鐵車廂迫到俄羅斯方塊一樣，我同Queenie就唯有無奈地企到差唔多身貼身；雖然喺屋企佢都試過真空咁攬住我，但始終喺公眾地方又有啲唔同，大街大巷有個咁嘅靚女企到個胸黐住我心口，應該所有人都會以為佢係我條女掛；佢重打扮到咁靚，每一下呼吸都會從肺部將啲二氧化碳帶到我嘅面上，然後就到我吸返入我個肺，再噴上去佢頭頂…
比起口水尾，氧氣尾似乎嚟得更直接。
一路上嘅人雖然多，但俾都市繁碌生活壓到透不過氣嚟嘅香港人卻係異性地安靜，所以我同QQ都無乜出聲，伴隨住我哋嘅就只有鐵路嘅隆隆聲，同埋低頭俯視嗰部位於手中嘅電話。
Q：「我到喇，bye bye。」
我：「玩得開心啲，等妳返嚟喇。」
目送住佢出閘，感覺總是有點怪怪啲。
如果係平時，呢啲日子我應該唔會出街吧，成街都係人，同自己嘅印象實在太格格不入；無條女喺手，除夕晚喺條街度遊係真係會自慚形穢，可惜吖，Queenie不是屬於我的。
就算有個細蚊都好吖，不過我諗都唔會嚟到咁遠嘅地方，同佢喺屋邨附近食餐飯就算，然後帶佢返我屋企，做啲我哋都想做嘅事情…游胃精妳恨唔到咁多㗎喇，雖然我乜都無，但我係一個有政府資助解決咗我土地問題嘅小朋友。
唔知…細蚊佢點呢，希望唔好同男朋友鬧架啦，都係玩下扑下嘅啫，唔啱咪分手換過個囉，好男仔邊有咁易搵呀，呢度就正正有一個廢物喺度。
咦，點解我出咗閘嘅？乜我唔係要返屋企咩？




算，唔返去住，諗返起上次同老竇聖誕新年出嚟行已經係我小學嗰陣，咁我又自己行下啦。
一出嚟行咗幾步就係1881，幾靚嘅…啲雪人裝飾，但每一個角落都係人，個個都喺度影相，每張相嘅背景都係其他人，究竟有乜謂？
然後過咗文化中心同鐘樓嗰邊，鐘樓對開個水池坐滿情侶，睇嚟…大家都好有土地問題呀下，天寒地凍為咗啲乜要喺度坐呢？不過有啲姐姐著住黑絲短裙盤腿而坐稍有走光之嫌，嗯…但我喺QQ洗禮下呢啲美景早就滿足唔到我；重有啲就係望落似係高中生或大專生嘅窮書生三五成群喺度聚，睇個款似係準備癲到今晚凌晨。
跟住嚟到海港城，扶手電梯對開條通道又係佈滿聖誕裝飾…同埋人，商場就唔入去喇，對我嚟講都無乜作為，唔知Queenie佢哋今晚會唔會喺度食晚飯呢？應該都好貴下，佢應該會唔敢話畀我聽食咗幾錢，所以我都係唔好問喇。
咁就兜咗一圈尖咀，大家係咪以為我會就咁返歸？唔係喎，我用兩個幾上咗艘前往中環嘅天星小輪，我都唔知點解。
不過喺海上面望住維港兩岸嘅夜景，加埋掛上聖誕裝飾嘅高樓大廈，倒影落漆黑嘅海面度，又幾鬼靚嘅。