thriXt Qantasy 純文字安眠之作 (New: - U2K - 一直上架): 79

呢度貴為高尚學府嘅white zone購物區，名店林立，除咗M記同玩具反斗城之外，我都唔係幾諗到重有邊間鋪係我哋可以有機會幫襯到嘅；當然女神而家都好清楚自己係乜嘢身世，絕對無講過話鍾意啲乜或者個買字，經過Kate Spade嗰陣都只係喺出面望下個玻璃櫥窗擺咗邊啲今季新款出嚟；我由細到大就無乜享受過物質生活，呢啲商店彷彿就同我存在喺唔同嘅空間一樣，但唔知道…女神而家係乜嘢心情呢，我真係無能為力。
Q：「呀！Godiva呀，好想飲…」
我：「飲囉。」喺我嘅有限能力內，我答應咗。
Q：「真係可以？」
我：「嗯，我想妳開心。」
Q：「多謝你，咁我要dark chocolate shake吖。」
我望一望個價錢牌，全部飲品都係五十元正…然後喺銀包摷咗張紅衫魚出嚟，若有所思地…
我：「啱啱好一張。」
Q：「傻瓜，嗌一杯咪得囉。」
我：「咁我未飲過，都想試下吖嘛。」




Q：「Share兩份一杯咪得囉，過下口癮咋，飲晒成杯會好肥㗎。」女神真係體貼。
等咗五分鐘，我攞到杯dark chocolate然後送到QQ嘅手上，睇住佢滿心歡喜啜咗一大啖入個口入面，面珠墩頓時變得脹卜卜咁，個嘴唇重黐咗少少cream。
原來…瘋狂毆打我屁股兼威脅我要爆蛋嘅女魔頭係可以變到咁可愛…嗯…雖然佢亂攪我本週記嗰陣都好可惡；諗都無諗過一個月之內可以發生咁多事，而我哋之間已經結下不解之緣。
Q：「嗱，飲啦。」
我：「妳飲剩先啦。」
Q：「吓，做乜呀？」
我：「咁…得一枝飲管。」
Q：「喂！你唔係喺度幻想飲我啜過嘅飲管即係同我打茄輪呀？」佢打側個頭疑惑咁望住我。
我：「無咁變態囉…一枝飲管有無咁好幻想力呀，我驚妳介意咋。」
Q：「妖…同你一齊住都係咁啦，乜都介意我咪好辛苦？飲啦，死人頭。」




於是我聽佢話攞起咗個杯，用力啜咗一啖入個口度，嗯，真係好好味！係香濃嘅朱古力味，同茶餐廳開粉嗰啲或者屋仔朱古力奶完全兩回事嚟。
Q：「嘻嘻，等你飲過我口水尾，以後都聽我話。」
我：「點敢唔聽呀，攪人蛋蛋嘅女魔頭。」
Q：「我都係幫你阿媽看住你，重敢唔敢咁話我？」
我：「我就唔信會有阿媽用蛋蛋嚟威脅個仔囉…妳呀，飲完我口水尾咪又係聽返我話。」
佢喺我手上攞返隻杯，含住嗰枝有我口水尾嘅飲管啜咗一啖朱古力入口。
Q：「乜我而家好唔聽你話咩？」
我：「欸…唔係呀。」
其實佢嚟咗之後我哋都算相安無事，兩個人互相遷就一齊生活，起碼佢都無嫌我煮啲嘢難食；中間重有好多生活點滴，係我以前無諗過有機會體驗到，多咗佢呢個屋企人實在令我好幸福。
Q：「我都差唔多夠鐘出發，你嘅任務完結喇。」




我：「不如，我送埋妳去尖沙咀站啦。」