為了實現媽媽遺願，我成為了女兒國唐僧: 78

QQ喺我身後箍住咗我兩邊腰，用力推緊我，我都唔知佢點做到，總之我向前滑緊，而且重識轉彎，勢估唔到我咁大個仔竟然喺度俾個妹妹推車。
呀，又幾舒服喎，唔使用力就識郁，重幫我自動導航，而且越嚟越快，呢個司機嘅駕駛技術認真不錯，我作為一架車唔經唔覺都有啲飄飄然。
我：「咦，QQ，妳咁樣推我會唔會攰。」
我同身邊嘅女神講。
Q：「少少啦，你估你好輕呀？」
我：「嘻嘻，真係辛苦晒妳…喂！點解妳喺我隔籬㗎？！唔係喺後面捉實我嘅咩！？」
Q：「自己嚟啦，無鬼用。」
我：「呀！我唔識停呀！點轉彎㗎？」
喺我前面幾米就係盡頭，我正諗住伸出雙手硬撼落去之際，無眼睇喇…突然我隻左手俾人捉住咗，正當我以為要失去平衡炒車，唔知點解Queenie就嚟咗我前面，跟住我哋喺原地轉咗一個圈停咗喺度，我唔知佢點做到，只係知道有少少天旋地轉。
而佢隻右手拖實住我隻左手。




Queenie…我哋攬過…佢因為多謝我而惜過我塊面…平安夜撓過我手扮我條女…甚至喺同一張床上面，瞓過覺…但拖手…呢種感覺係唔同。
Q：「捉實我啦，好快識自己郁㗎喇。」
結果，我同佢拖住手一齊喺冰上面度過咗粒幾鐘，佢唔止喺我隔籬平排帶住我溜，重可以企喺我前面望住我向後滑；俾女神帶住我溜冰呢種享受，實在只應天上有…好舒服，好放心；雖然同場重有其他靚女喺度，但我已經俾女神迷惑咗，應該話…如果我咁樣都重可以昅其他女嘅話，蛋蛋不保係一件可以預期發生嘅事，反而我見到其他男仔望住我個樣流露出羨慕又妒忌嘅神情，雖然要女仔帶住我溜冰係就係樣衰少少，但呢種唯我獨享嘅感覺，使我由心而發咁爽同自high。
開心嘅時間過得特別快，寫完幾百字就到咗五點半清場；到底我係咪學識咗少少溜冰？唔知道，我嘅大腦思維已經直接連咗去隻手上面，感受掌心同指間剩餘下來嘅體溫同幼滑觸感。
由於佢約咗啲姐妹七點半，重有少少時間，所以我哋兩個就喺又一城度兜下先。