為了實現媽媽遺願，我成為了女兒國唐僧: 75

Q：『我要獨佔Kuromi，所以唔邀佢lu。』
健：『獨食難肥呀，重色輕友嘅鹹濕仔！』
Q：『我唔想肥喎，溝唔到女嘅死處男。』
健：『撩架打呀？開場1V1決鬥吖，敢唔敢？』
Q：『唔敢，因為我要溫書喇，成績好嘅人先有資格溝女：P』
健：『吓？我無聽錯呀？你都會溫書？！』
Q：『嗯，因為Kuromi太正，佢要我畀心機讀書。』
健：『你見過人？有幾正呀？！』
Q：『唔話你知，死毒撚^0^。』
我：「喂！QQ妳喺度搞乜鬼呀！」




Q：「你理得我吖，Kuromi而家要你溫書呀。」
我：「我溫還溫，你都唔好惡攪我account得唔得，我唔想俾佢打呀…」
Q：「得喇，幫你off咗喇。」
結果，我哋今日就喺平靜嘅學習氣氛中度過。
到咗第二日，係除夕，我哋照樣食完晏晝。
我：「Queenie…有無興趣…出去行下？」
Q：「嗯，你有地方要去？想去邊呀？」
我：「無呀…只不過諗住妳日日放假喺屋企，怕你悶啫。」
Q：「哦，原來你想約我去街街。」
我：「唔係嗰啲喇…或者同妳出去食返餐囉。」




雖然我一份錢要煮埋佢飯係有少少壓力，但如果聖誕假都要佢日日留喺屋企陪我捱我都過意唔去，計返佢上次出去玩已經係平安夜嗰日同男朋友一齊…而又其實我都想偷懶抖返日唔煮飯，咁出去食返餐，都可以平平地嘅。
Q：「其實我約咗班八婆今晚去尖沙咀倒數。」
我：「哦，妳有節目就好。」
Q：「放心啦，我唔會亂使錢㗎喇。」
我：「嗯，咁我收皮摺埋彈開先喇。」
Q：「又唔使嘅，我約咗佢哋七點半，重有大把時間，我可以同你出去先。」
我：「真係㗎？」
雖然日日對住，但有得一齊去街都開心嘅。
Q：「呃你做乜，咁你想去邊吖？」
我：「呢層…無諗過呀…」




Q：「作死你呀，乜計劃都無都敢約本小姐？」
我：「咁我平時都係咁㗎啦…」
Q：「都唔知你以前啲女朋友點溝返嚟。」
我：「落去打下康樂棋都有機會溝到嘅…」
Q：「服咗你…出面凍冰冰，有無興趣去溜下冰？」
我：「溜冰？」
Q：「係呀，有無溜過呀？」
我：「呢個，係真係無嘅。」
Q：「想唔想試下？都唔係太貴啫。」
我：「好啦，咁交畀妳帶路啦。」
估都估唔到，本來諗住怕佢悶得滯同佢出去行下兼食飯，結果變成女神帶我去玩，實在有啲唔好意思；至於今晚佢已經有節目呢…其實係好正常嘅，人哋都係屋企人潛水啫，朋友同學都重會喺度，以佢哋圈子嚟講呢啲日子出嚟玩係好正常，我唔可以以己度人。
眨下眼之間，我哋就換衫出門搭車嚟到香港首屈一指嘅開房性地九龍塘，入面嘅又一城。
Q：「唔使肉痛喇，我畀返我嗰份啦。」
我望住個時段同收費表，每位65蚊，還好吧，同去大家樂食個扒餐差唔多價啫。
我：「嚟到而家…妳嘅錢同我嘅錢都無乜分別啫…」




Q：「係呀，你嘅錢即係我嘅錢囉。」
Queenie，呢句妳留返同男朋友講啦，我都想我啲錢即係妳啲錢，但我無呢個資格。
我：「可惜我只係一個貧窮屋邨仔，無幾多畀妳。」我喺銀包攞咗一百三十蚊出嚟買兩張飛。
Q：「講笑咋！唔好灰啦，出嚟玩就開心啲啦。」