為了實現媽媽遺願，我成為了女兒國唐僧: 76

係嘅，嗰啲問題實在係太遙遠，暫時又無解決方法，諗嚟係盞傷神；難得第一次同女神出嚟玩，我係應該好開心極之興奮血壓上升流鼻血不止至死㗎嘛；喺Queenie屋企出事之前我有乜可能會諗過約佢吖，最多可以lunch食到一次飯已經好威啦！
當然而家唔係咁計，不過都重係好開心，最開心唔係因為同女神出嚟，而係我重有能力可以令佢面露笑容；出嚟玩要錢，笑容係無價，抵到爛。
Q：「你覺得你會唔會識溜冰？」
QQ一路著對溜冰鞋一路問我；順帶一提由於佢今晚要同啲姐妹出去蒲，所以都有悉心打扮過下，出面係一條背心吊帶黑色連身裙，由於係冬天所以過膝嘅，睇怕溜冰嗰陣就無機會走光；係好事嚟，佢重有邊條底底我未睇過吖，唔使蝕底俾人就好；入面係一件有領嘅白色長袖壓紋恤衫，手腕位有啲波浪蕾絲，左手手腕就戴咗上次男朋友送畀佢嘅銀鏈；下面係一對女裝中踭黑色皮鞋，重有一個淡玫瑰撞黑色金色金屬扣嘅手提包包。
嗯，整體嚟講唔係靚唔靚嘅問題，係我哋兩個企埋一齊超級奇怪。
我：「未溜過唔知呀…應該唔會仆街嘅。」
其實我就都幾有信心嘅，因為以前都借過其他街童嘅roller鞋嚟玩，都算行到走到，加埋我成日喺條街遊離浪蕩，嗰啲樓梯扶手瀡滑梯，橫衝直撞跨欄過馬路，欄桿獨木橋都係我嘅街常玩意嚟…
Q：「你有無嚟睇過人溜冰呀？」
我：「咁就都有嘅。」
以前去深水埗買game，好多時買完就上西九龍food court食嘢，食完就順便上頂樓睇人溜冰。




Q：「咁你又唔試下玩？」
我：「得自己一個好怪啫…我係經過昅下女咋。」
Q：「哼，肯定係嚟等啲女仔仆低睇走光。」
我：「我唔介意欣賞多啲靚嘅嘢嘅。」我好誠實。
換完鞋我嘗試企起身，雖然唔會跌，但嗰種感覺好奇怪，有一種釘死喺地下嘅感覺，要好專登先可以一步步碎碎咁行，而QQ就望住我狼狽嘅樣喺度笑；幾經艱辛我終於行到入個冰面度。
Q：「你係咪真係唔會跌㗎？怕就扶住條邊啦。」
我：「唔會…放心…無問題。」