為了實現媽媽遺願，我成為了女兒國唐僧: 74

打完三鋪重有十分鐘到，無理由嘥咗佢㗎，即刻開多局速戰速決先；點知呢一局個個揀角色都好似食咗豬油膏咁…是但啦，打埋就去溫書，都唔差嗰幾分鐘啦；點知…
Q：「交，叉，仔，你講過啲乜呀？」
我：「好快…好快，打埋呢局就去溫。」
Q：「你喺度玩乜嘢呀？」
我：「哈哈…我玩緊妳…隻克里希呀…」
Q：「係呀，好開心咁喎？」
我：「OK…咁…」
我都未講完，但就feel到下半身一涼…Queenie妳搞乜？由於我係趴喺度嘅關係，pat pat係向天，喺廣東人嘅眼中我係同食得無乜分別，而QQ就張開佢嘅血盤大口…
我：「喂！做乜除我褲！變態女！」
唔係拉低少少呀！係真係除嗰種呀，自行想像啦…




「啪！啪！啪！」
我：「變態！黐線！做乜打我呀？！」
我手忙腳亂，右手一路放一技清緊啲兵，左手就試圖伸去屁股度搲返條褲上嚟。」
「啪！啪！啪！」
是不可能的，因為佢都有第二隻手，我右手打緊機，左手又點同佢鬥力呢？
Q：「唔係我打你，係你媽咪叫我打你！」
喂，唔得掂，個一塔冧喇，要撤退去後面；即係話我要移動個角色，而個控制桿係喺電話螢幕嘅左手邊…唔理呀，反正佢都打得唔係太痛，佢啲皮又薄又滑重傷過我pat pat啦，所以我又擺返左手上前，由得佢繼續啪我。
Q：「交叉仔，唔怕痛吖嘛，你好嘢！」
哼，唔好睇少我呢啲屋邨仔，細個打得架多，呢啲皮肉之苦實在可以視為等閒。
Q：「你個衰仔，嗱，我唔係細路女嚟㗎，你再唔停手我就，摙，爆，你粒蛋。」




靠嚇咩…嘩！嚇到我掟到部手機飛出嚟。
因為佢唔係靠嚇，係真係擘開緊我pat pat，伸緊隻手入去，我嘅自然防衛機制話畀我知再唔停手就係死路一條。
我：「黐線嘅咩，女色魔嚟㗎！攪人粒蛋…」
Q：「鬼得閒色你呀，你以為你pat pat係香㗎？快啲去溫書，即刻。」
無可奈何之下我返去飯枱打返開本書，QQ就去咗廁所洗手，呢個女人真係癲㗎，屁股咁臭都要攪我，但…如果佢唔係要摙爆我粒蛋，只係摸嘅話，諗諗下我竟然覺得有啲興奮，唔通我都M底？
我：「唉…今次實俾人舉報扣好多分，阿健肯定嬲死我都似，希望佢唔會打電話嚟鬧我啦。」
Q：「妖，打機啫，使唔使咁認真呀…」
佢攞起咗我部電話嚟睇。
Q：「阿健問你幾時先肯喺泉水死出嚟？」
我：「死條毛咩…多咗個惡婆喺度…」




Q：「你講乜呀！？」
我：「吓…我無講嘢呀。」
Q：「我幫你出去送下啦。」
我：「是但啦，掛咗幾分鐘都已經扣硬分。」
佢又講得無錯嘅，遊戲始終都係娛樂嚟，玩得再叻都唔會有乜用，而且大把人比我玩得更勁。
Q：「啊…無端端贏咗喎！」
我：「吓，唔係呀，咁都可以贏得返？」
Q：「呵呵，克里希都係交返畀我用啦。」
我：「得喇…知妳識用佢喇，唔該晒妳粒星。」
Q：「阿健問你做乜唔見Kuromi一齊玩喎。」
我：「妳唔on game，咁又點會一齊玩。」
Q：「嗯，等我幫你答佢先。」
點知佢一路打字一路喺度笑，我伸個頭過去睇。