為了實現媽媽遺願，我成為了女兒國唐僧: 73

周公：「交叉仔，物質嘅三個狀態係乜？」
我：「咪air，liquid同solid囉。」
周公：「Air唔得㗎，要係gas！」
我：「有乜分別，中文咪又係氣…」
周公：「咁你可唔可以講呢三個state嘅例子？」
我：「咁煩㗎，咪屎尿屁囉，有三分喇掛？」
周公：「…，你肯定屎係固體？」
我：「正常無食錯嘢嘅話點會唔係呀，便秘出嚟嗰啲掟得死人添呀…喂…喂！周公你搞乜？呢啲實驗就無謂做啦！」
個老嘢伸咗隻手入褲袋，我重以為佢要摷啲乜鶻突嘢出嚟，點鬼知佢拎咗嚿白色圓形嘅布甸狀物體出嚟；吖，又會咁盞鬼嘅，到底呢嚿嘢可以點放入褲袋嘅呢，唔通叮噹賣咗個百寶袋畀佢？
周公：「嚟吖！試下呢嚿係固體定液體。」


我伸咗隻手指埋去，用少少力㧻落去，好軟，好似一推就會散晒咁，當我隻手離開嗰時重黐黐納納，有啲介乎水同油嘅忌廉揩咗喺上面。
周公：「點呀？使唔使改下個答案呀？」
我：「怕咗你，改做鑽石囉，如果唔係啲人都唔會話佢哋便秘嗰陣係屙鑽石啦！」
周公：「乖喇，請你食啦。」
我：「多謝周公叔叔…」
嚿白色布甸，應該係掛…上面重有粒粉紅色車厘子，作為乖乖小朋友嘅我當然要攞起佢嚟食先啦…
我突然擘大咗隻眼！「呼…」Queenie重成隻豬咁瞓喺我身邊，認真…唔好意思，sorry…
唔知邊個話呢張床硬得滯瞓唔到嘅呢？
毫無防備嘅Queenie瞓覺個樣真係好可愛，加埋佢咁靚女，身材又夠晒布甸，皮膚又白又滑，實在係令我嘅眼球唔捨得離開佢嘅身體。
好想…有個咁嘅女朋友，點解個天要畀機會我同佢一齊住喎，我以後重點會睇得上其他女仔，明知無可能就唔好咁玩我啦；人哋出身係公主嚟，我根本就無可能畀到幸福佢。


我幫佢冚返好張被，然後坐咗喺部電腦前面；琴晚QQ四點先瞓應該有排都未起身，我就可以戴埋個耳機睇片學下點搓麪團，加啲液體，牛奶呀，水呀，牛油咁。
雖然QQ話唔介意我喺自己間屋做呢啲嘢，但我都無理由喺佢做緊功課嗰陣，喺佢隔籬對住部電腦開壇作法㗎，一個唔該如果啲聖水唔小心濺到佢我條命仔真係凍過水，直頭凍到變solid呀。
舒服完之後…嗯…無乜嘢做，就打開本科學書溫下solid，liquid同gas啦，我真係好乖呀。
Queenie瞓到成點先起身，我同佢食完晏飯之後又霸返張床嚟打機。
Q：「喂，就考試喇，邊個話聽媽咪話乖乖溫書？」
其實佢無錯，放完假過兩日就考。
我：「今朝我溫咗陣喇。」
Q：「我睇唔到喎。」
媽咪睇到咪得囉，我食埋粒車厘子妳都睇唔到㗎啦。
我：「我打一個鐘啦，打完就即刻溫！」


Q：「一個鐘㗎咋！我會幫你計時。」
屋企多咗個阿媽…家姐咁嘅物體，都幾煩下。