為了實現媽媽遺願，我成為了女兒國唐僧: · · · · ·　— — — · ·

睇嚟呢份禮物我無買錯，原來女神真係好鍾意彈琴，一攞上手就對足成粒鐘咁滯，同我哋男仔打機有得fight；咁佢又彈得真係幾好嘅，至少我聽落係舒服順耳，雖然而家無得去琴行學琴，但起碼可以喺屋企摸下吖，希望佢會開心啲啦。
佢男朋友都有send啲愛沙尼亞影嘅雪景畀佢睇，不過唔關我事，我好享受香港溫暖嘅冬天。
反正就算再凍都唔會有個女仔同我瓹入同一個被竇入面依偎取暖。
就係咁又再過咗兩日嚟到廿八號，一切如常。
晏晝我抄完功課喺床打緊機，Queenie就喺到睇書，書名係…落入凡間的天使：Audrey Hepburn，我當然無興趣，見到密密麻麻嘅字就敬而遠之。
正所謂性相近，習相遠；就好似我同QQ都有性需要非常相似，可惜我哋嘅習性實在大相逕庭距離遙遠…如果佢可以睇水著寫真集就好，橫掂本書封面上都係一個女人啫。
其實我唔應該諗埋啲無謂嘢，就讓呢一個冬日下午寧靜寂謐咁繼續醞釀落去就好。
「叮噹！叮噹！」
唔通又係DHL？！FEDEX！？無可能，冷靜啲。
雖然我唔係一個壞蛋，但都驚唔小心惹落啲仇家，尤其係喺呢啲有頭有腳就入到嚟嘅公屋大廈；所以為咗我同QQ嘅人身安全起見，我都先喺電眼度睇下係乜水大駡光臨先…再準備定菜刀殺蟲水，講笑啫，唔出聲扮無人就得。




然後，我呆咗…
「叮噹！叮噹！」
我唯有打開門。
我：「細蚊…妳上嚟，做乜？」
蚊：「唔搵得你咩？」一貫嘅老泥妹語氣。
細蚊，中文名叫玟琋，英文名叫做Mandy，細細粒粒，膚色就略黑啦，至少比女神深色一個tone，短頭髮有少少菇菇哋，樣就普普通通啦，而個心口就波平如鏡，由於因為太細波所以我哋叫佢做細蚊。
佢而家讀緊Form 2，但因為佢小學留過班嘅關係，佢算係同我哋同齡嘅；對上一次見佢大概係今年開學無幾耐，同我講咗句佢有新仔就走咗。
咁有講，都好過無聲無息消失嘅…
我：「我有乜可以幫到妳？」
蚊：「你諗住隔住道閘同我講嘢？」




我：「妳想入嚟？」
蚊：「唔撚使問呀？」
我…就當然想放佢入嚟啦…點解佢要咁突然，等我準備下都好吖，又或者我落去接佢先。
Q：「嗯？你有朋友搵你？做乜唔開門呀？」
唉，無辦法，都係要放佢入嚟，最多我即刻換衫同佢落返去謦。