為了實現媽媽遺願，我成為了女兒國唐僧: · · · · ·　— — · · ·

我：「唔…唔係呀。」
如果俾佢知我對佢有意思重得了嘅…我而家已經咁弱勢，到時重唔肉在砧板上？我又的確唔係想溝佢，一嚟唔識溝，二嚟溝唔起，三嚟佢有仔…但我想食㗎，如果佢話剩係想同我have fun，咁就開心死！諗下好喇，發夢都無咁早，呢啲事情只會出現喺Carmen姐姐嘅身上…
但係大卡車都只係同我玩，一搵到個好就…
我：「妳試下個keyboard先啦，如果有問題我搵返個賣家，佢話私保三日㗎。」
Q：「吓，你唔係信呀？」
我：「佢好多正評㗎，信住先囉。」
然之後佢又喺個尼龍袋繼續摷，有幾條USB線…
Q：「嘩，重有踏板，睇嚟靚嘢嚟喎。」
我：「我都唔知呀，見幾平咪買嚟試下。」
然後佢放咗部嘢上枱面，用USB線駁落部電話度，再喺電話download咗隻App，搞咗一輪…




Do Mi Mi，Mi So So，佢㩒咗幾下琴制，部電話就開始出聲，我開始明白點解呢嚿叫keyboard。
Q：「OK呀，咁樣就可以當琴彈喇，原來…重有得split開啲制添。」我當然唔明佢噏乜。
我：「妳啱用就好，放呢部嘢喺度妳每一日都可以攞嚟用，又唔使過得咁悶，好過我對住架車唔知做乜啦。」
Q：「好啦，你對我咁好，等我送返首音樂畀你啦。」唔知女神會彈乜呢？
嗯，音樂徐徐地響起，咦，有啲唔對路喎！
我：「救！救命！我唔要…考listening呀！」
係萬惡嘅香港學生的咒詛，綠袖子，我差唔多要跪喺度求佢停止奏出呢首樂章。
Q：「以後你顧住玩唔溫書我就彈畀你聽，問你知驚未？呵呵呵呵！」
我：「我知錯喇，我會讀書！」
Q：「好啦，咁我換另一首啦。」




我：「咦！係孖寶兄弟。」
我開心到好似瑪利歐咁喺度跳；重有，我要掉咗個舊風筒佢，實在太不堪入目，難為女神佢容忍咗咁耐，太對唔住佢把烏黑亮麗嘅秀髮。