為了實現媽媽遺願，我成為了女兒國唐僧: · · · · ·　— — — — ·

Q：「欸，妳好呀…我係佢同班同學，坐佢隔籬嘅，我叫Queenie。」
我：「呢個係細蚊，之前同妳講過…」
其實佢都估到啦。
蚊：「妳就係佢條新…女朋友？」
最尾兩粒字係生硬咁加落去，唔應該有嘅。
Q：「唔係呀，只係普通同學嚟咋。」
蚊：「普通同學會著住睡衣唔戴Bra喺人哋屋企飛釘走來走去？」
Q：「呀…Sorry呀，焗得滯頭先除咗，去戴返先。」
低B嘅Queenie隨手喺梳化搦起個Bra行入廁所。
蚊：「佢好靚女呀。」




我：「都係嘅。」
蚊：「重好大波添。」
我：「係囉…唔知食乜大…」
其實又未至於好大嘅，我諗C cup左右啦，但以我哋呢個年紀嚟講係相對上大，身形又高挑。
蚊：「普通同學會放到你成張梳化都係Bra？」
佢指住上面QQ嗰堆衣物，連底褲都有…
我：「佢屋企出咗啲事嚟暫住，但真係同學…朋友嚟㗎咋，如果唔係我都唔會咁鎮定啦。」
蚊：「信你呀。」
我：「做乜唔信我啫？」
蚊：「咪話信你囉，斷估你都溝唔到個咁正嘅女神啦。」




我：「係呀…咪得個睇字咁囉。」
蚊：「有得睇都夠啦。」
我：「嗯，但我同佢真係無嘢。」
蚊：「得喇，又唔關我事嘅。」
我：「係呢？做乜嚟搵我嘅？」
蚊：「唔開心嚟搵你唔得嘅！」
我：「得…朋友搵我…當然可以。」
其實我都無諗過佢重會搵我，一有新仔就走咗去，咁都唔係好鍾意我啫，我又唔係有錢，同佢一齊嗰陣都唔算對佢好好，正常都唔會當返我friend㗎啦，結果三個月無搵過突然就…
其實女仔通常有四大投訴，男仔聽到就會投晒降，就係唔開心，無感覺，好悶，好煩…
然後男仔就會話，不如一齊打鋪傳說，再換嚟一陣白眼，唔識死嘅就再問，係咪想扑嘢，跟住可以開始幫自己買柳州木鋸定副棺材。




Q：「我使唔使落去？」
Queenie戴返個Bra換埋件T恤出返嚟，其實佢咁講即係話讓返間屋畀我。
我：「唔使啦…我哋謦下欬啫。」
為咗EX趕佢走好似好無禮貌，而且一個過去式，一個日日對住，我都知邊個重要啲嘅，加埋我唔想佢諗走咗之後我同細蚊喺度做咗啲乜。
Q：「哦，咁得啦，你哋…唔使理我，我繼續喺度煲劇。」佢講完就戴耳機坐喺張食飯枱度，望住廚房方向，即係無眼睇…
我：「細蚊，落去茶餐廳請妳食個Tea好無？」
蚊：「唔使喇，無胃口。」
講完佢就坐咗喺Queenie張床上面…
做乜咁唔識做呀，我都係唔想妳兩個女仔共處一室啫，雖然Queenie已經進入咗屬於佢嘅世界。
呢張暫時係Queenie嘅床，亦都係細蚊喺上面失身嘅床，佢想坐喺度都正常嘅。