為了實現媽媽遺願，我成為了女兒國唐僧: 100101

原則上嚟講，呢啲仍然係自閉game，如果我上去佢屋企睇佢玩嘅話，真係會自閉足幾粒鐘，鬼叫我無switch咩…咁而家屋企一定必備電腦，手提電話又人人都有，再買多部switch其實都幾嘥錢，而且玩唔晒咁多嘢。
唔係我買唔起呀！銀行戶口啲錢夠買三四部都得，以前嘅話…而家俾Queenie佢咁食法係遲早…坐食山崩！哈，我中文都唔太差啫。
是但啦，我不朽都自己一個人。
於是我自己煮咗個公仔麪，清埋啲佳寶丸佢，嗯…都真係幾難食，黐得Queenie多我要求都好似高咗，呢件唔係好事嚟。
食完差唔多兩點，又落去中心hea下。
細個嗰陣，得阿婆睇住我，獨留兒童在家唔係幾好，我又唔想陪佢買餸，好多時佢就掉我喺公園或者兒童中心同其他細路玩，玩完就接返我，大下大下咪搬咗竇去青年中心囉，其實都係同一班人。
不過今時今日，就連小學生都人手一電話，落到嚟好多小朋友都只係圍埋一圈打傳說或者吃雞，以前爭玩攝石釣魚爭到成地魚，又或者要搬梳化搵氣墊球嘅場面已經越嚟越難見到。
反而打傳說打到喊，掟機，嗌架就時不時都有。
有無細路嚟挑我康樂棋呀，讓你八粒棋吖，我都好想蝦下細路…我諗，我同阿健係最後一批會玩呢啲嘢嘅小朋友嚟。
唔係講笑，就連BB車上面都有個夾夾住部電話喺度播Youtube…




好彩時不時都重有人打下乒乓波等我跟下隊，不過多數啲人係打開校隊，我呢啲街童輸嘅居多。
又睇下漫畫，睇下雜誌…終於捱到六點。
去球場黐咗兩場波踢，而我竟然有啲唔自在。
我差唔多想返屋企，到底我搞乜？
因為Queenie就嚟返嚟？其實我同佢無任何關係，我亦都唔需要佢，佢帶畀我嘅就只有麻煩，睇住佢拍完拖返嚟個開心樣我只會更唔知點。
但唔知點解，我就係想返屋企。
甚至乎我想返去溫下書，想下年同女神揀一樣嘅科，咁同班嘅機會就大好多。