為了實現媽媽遺願，我成為了女兒國唐僧: 100110

我走去M記買咗個特價麥樂雞餐再加個魚柳包就返屋企，唔知Queenie會幾時返嚟呢？唔知佢食咗啲乜好西呢，今朝玩得開唔開心呢？
Q：「我返嚟喇。」
八點多啲咋喎，又會咁早返嚟嘅，好彩我早過佢返嚟啫，我咬住麥樂雞一邊諗。
Q：「嘩！係麥樂雞！」
我：「喂！做乜搶我呀？又話食埋飯先返嚟，我嘅晚餐嚟㗎！」唔止隻雞，甜酸醬都撩咗半兜去。
Q：「一隻咋嘛，唔好咁孤寒啦，我唔係幾夠飽。」
我：「吓？食完飯都唔夠飽，食乜嚟呀？」
Q：「食壽司囉，食咗六碟咋嘛，佢就好似面有難色咁，我都費事辛苦佢喇。」
我：「係咪好貴呀？妳食咗佢隻車？」
Q：「普通啦，廿零蚊碟。」




廿零蚊碟，六碟加埋一就百四五，十二嚿又真係唔夠飽嘅，Queenie又唔係啲細細粒粒嘅女仔。
我：「都真係幾普通，一碟等於我一個餐，咁我寧願食M記好過。」
Q：「咪係囉，嫌貴又唔一早講，都搵笨嘅。」
佢講下講下又攞多咗我一嚿…嗚嗚嗚嗚。
我：「咁你哋晏晝又食咗乜呀？」
Q：「去cafe飲咖啡同埋食三文治。」
計我話妳都係搵笨嗰個，食埋啲咁嘅嘢唔飽實在係自己攞嚟，抵死，活該，呢個女人將貴夾唔飽呢四隻字演譯得活靈活現；我當然唔敢講出口，而且睇嚟佢今日拍拖都唔係太開心，小問為妙。
Q：「可樂定Zero嚟㗎？」
我：「有糖…」未等我講完佢就攞起啜啜啜。
枝飲筒…我飲過…佢又放返低…




Q：「唔講喇，我去沖涼先。」
呢個女人，大方到喺我隔籬除啲衫褲掟落梳化度，又係剩返底衫褲先入去浴室；好彩香港冬天唔係話非常凍，如果唔係個熱水爐會整死佢。
佢今日嘅衣著係一件白色長衫扮埋裙嗰種，入面無打底就咁一條實色厚黑絲，出面一件桃紅色長外套，底衫褲就懶得望喇，都幾靚嘅。
女神沖緊涼，我繼續食埋個包，同埋飲杯汽水；佢啱啱放入口啜過，有佢嘅口水，我而家又啜，將佢嘅口水吸入體內，即係間接惜惜，好好味。
突然之間，我醒起啲嘢！放低咗杯汽水，個額頭多咗幾條黑色直線加滴汗！