thriXt Qantasy 純文字安眠之作 (New: - U2K - 一直上架): Twenty First

我：「但係…怕唔怕俾其他人撞到？」
Q：「都就六點，應該無咁多同學喺街喇掛…其實都無乜嘢嘅，我坐喺你隔籬放學約埋一齊去買禮物都無乜特別吖，最多我話你做我隻兵囉。」
我：「唔得呀，做兵咁樣衰。」
Q：「乜呀！我好歹都要係個靚女嚟㗎喎，都唔知有幾多男仔想為咗同我食餐飯而做我隻兵。」
我：「但係而家我晚晚都要同妳食飯…」
Q：「好難委你咁喎，唔講喇，落去啦。」
我：「妳唔換返出街衫？著校服落去？」
Q：「我本身都唔係住附近，換咗咪重怪，行啦。」
就係咁，我哋兩個就出咗門口，準備落去精品店揀下禮物。
我：「係呢，其實妳本身有無收兵㗎？」




Q：「無喎，我以前都不愁吃喝，想買乜就買乜，又有男朋友，做乜要辛苦自己同啲傻仔行街食飯。」
右女神，出身正統豪門，點似得啲扮晒蟹港女女神，每逢聖誕生日情人節就流晒口水等收禮。
我：「咁而家使唔使收兵呀？」
Q：「遲下先諗啦…而家有你幫住我先，如果唔係，我可能要收一打。」
嘩，女神咁睇得起我呀，睇嚟會有好多潛在志願兵憎死我呢個多事嘅仆街仔。
係精品店兜咗一圈，都頗為頭痛。
送鬧鐘，會畀人鬧。
送相架，會鬧得更加甘。
送水杯，會鬧埋你屋企人。
送耳機，五十蚊係最cheap沙沙聲嗰啲。




送nanoblock，最平嘅細細包都要五十九蚊。
送滑鼠，個個都有㗎啦，又唔係電競嗰啲。
送木顏色，又唔係小學生。
我：「咦，劉備高達四十八蚊咋喎，唔錯！」
Q：「你梗係唔錯，有無諗過女仔收到會點諗？」
我：「唔諗囉，呀，唔知女仔會唔會玩彈樽蓋人呢…咦，你送聖誕卡呀？」
Q：「你剩係識得顧住玩…啲卡我送畀其他姐妹㗎，年年都送唔通今年停咩？」
我：「五十蚊三張…都幾肉赤㗎喎。」
Q：「你重講，我以前送開五十蚊張Sanrio㗎！」
正所謂今時不同往日，有苦自己知。




結果行咗個圈都未決定到買乜，我哋就去超市買餸沉澱下先。
Q：「呀，係al fresco雞肉腸，我最鍾意食㗎。」
我買下個價錢牌，六十九蚊四條，係人都鍾意啦…
我：「欸…呢個…都幾…」
Q：「放心，唔使咁驚，唔會迫你買。」
我：「睇下會唔會特價啦，我會記住。」
同Queenie一齊行超市，我感覺佢好似變咗我女朋友咁，唔係，應該更進一步，我哋好似啱啱結咗婚咁…呀，唔好諗無謂嘢，人哋有男朋右㗎。
我：「Oh my god！五香肉丁大特價！」
話得大特價，當然係指黃色罐嘅水仙花牌。