thriXt Qantasy 純文字安眠之作 (New: - U2K - 一直上架): Twenty Second

Q：「乜好平咩？」
我：「真係好平呀，平時最平都十六蚊罐，而家四十蚊三罐，即係十三個三毫三就有一罐，我琴日幫妳買咗一罐要十九蚊…」諗起就心傷，差一日…
Q：「唔緊要呀，溝淡囉。」
我：「吓？乜嘢溝淡？」
Q：「哦，我爹地成日講㗎，買貴咗之後見到又平返就再買，咁就叫溝淡囉。」
我：「原來係咁…妳係咪真係鍾意食呀，買咁多。」
Q：「OK呀，雖然我係有錢女，但五香肉丁公仔麪都係我至愛嚟，如果係出前一丁就更加好。」
我：「好啦，咁我買一pack啦。」
Q：「呀！不如再買多pack攞嚟做聖誕禮物。」
我：「妳認真㗎？想惡攪人？不如買米…」




Q：「邊係喎，收到一定好開心，你睇下我而家個樣幾開心！」佢抱著條五香肉丁個樣好似收到札花咁嘅款，認真得人驚。
我：「妳唔好以己度人啦，不過妳鍾意送乜就送乜啦，總好過收相架嘅。」
Q：「呀，我想食雪條呀！」
我：「都得嘅…但唔好同我講Häagen-Dazs。」
Q：「呢個得喇掛？」
阿波羅香芋奇脆批，廿五蚊六條，呢個衰女包都幾識為我荷包著想㗎喎。
我：「可以。」
由於我諗以後成日要自己煮，加埋放聖誕長假，所以又買咗堆米粉同烏冬，大家唔好太高期望，中學生係煮呢啲食㗎啦。
Q：「係喎，你唔使買禮物咩？」
我：「頭先埋單嘅時候咪買埋囉，我重攞咗張紅色花紙畀妳包五香肉丁添。」




Q：「咁你買咗乜禮物呀？」
我：「五十蚊禮劵一張。」
Q：「哈哈哈，你咪重衰過我。」
我：「乜衰呀，我不知幾想自己抽中返！」
返到屋企，佢換返自己啲衫，順眼返晒，不過佢都係仍然無戴Bra，但就墊咗件背心喺入面，都重有少少凸點啦，但無琴日咁明顯…嗱，你哋唔好諗歪，唔係佢喺我面前換衫呀，只係我有特別嘅觀察方法可以理解得到佢點著。
下身就係一條灰色yoga pant，總之靚啦。
然之後我就去準備今晚嘅食物，餐單係叉燒油雞，煎蛋午餐肉，蠔油西生菜，Zero任斟。
Q：「有飯食咁好嘅？」
我：「晏晝買定㗎，唔係自己煲。」
Q：「都幾豐富吖，多謝你呀，交叉仔。」




食完飯，Queenie竟然自己執咗啲碗碟去洗，估唔到喎，佢都幾乖女吖；難得我可以抖下，就攤咗上床，打下機又瞌下眼瞓，死蛇爛蟮準備進入長假mode。
睡眼惺忪咁睇住Queenie洗完碗出返嚟做聖誕功課，都真係黐鬼線嘅…然後就喺度包五香肉丁…
呵欠。