我叫張元中，我個妹叫張元英（失敗作，爛左尾，貼上黎做record）: 2

2.


「屌！！咁都唔入！！！」

「快開快開！！！」


放學之後，就係練波既時候





仲有一個禮拜就係a grade既第一場，球隊都開始加密訓練

當然，我地都同其他中學一樣，只係能夠用個籃球場練波


雖然我響球隊仲未企穩正選，但總無人會想自己輸掛...



「中仔！！！！」





我響三分線外斬個中腰波入禁區

大師兄心口都唔駛控，直接半車身一腳兜入網！


守龍既係隔黎班既周公，周家輝，面對呢一球完全無符！







大師兄全名叫黎國斌，雖然有個咁既名，但其實都係中五，係我同田鼠既同班同學

因為佢同破壞之王飾演斷水流大師兄既林國斌差唔多名

林國斌又同黎明好似樣，所以我同田鼠就由中一叫佢大師兄叫到佢依家


但大師兄唔同我，身高一米八既佢唔單止球技出色

連讀書都好勁，長期霸占全級頭二十

依家響元朗區隊仲打到正選中鋒，足以證明其實力


「大師兄好波！」






「中仔，斬得好呀！」

大師兄走過黎拍一拍我膊頭


不過即使我地同大師兄差咁遠，佢都從來無嫌棄我地

相反，仲同我同田鼠fd到兄弟咁


「嘩！！！大師兄好勁呀~~~~！！！！！」

順帶一提，大師兄係全校公認既男神，每次我地球隊練波都一定吸引到一大堆唔分年級既女仔黎—睹佢既英姿，我地都稱佢地為大師兄既女兵





但最奇怪既係，大師兄從來都無理過佢地



比著係我，一早過去溝女啦




「嗶！！！」

教練林sir吹下哨子：「好啦，今日既對抗訓練都差唔多啦，大家抖下先啦！」






「啊呀呀，好攰呀！」

我地成班連續練左個半鐘咁濟，都開始無力，個個都拎住支水大大啖咁飲





「大師兄！」

「啊，唔該阿玉」


阿玉親手將水遞到大師兄手上






大師兄，就係阿玉做左咁多年足球隊經理人既原因




「係喎阿玉呀，我地下場打邊隊呀？」球隊中堅阿康問

阿康同田鼠都係球隊既正選中堅，但佢比田鼠更可靠

唯一缺點係成日無乜記性



阿玉翻查file內既文件：「我地下星期二第一場既對手係鄉議局，實力應該係下遊」


鄉議局元朗區中學，呢間band1英中印象中應該係d2魚腩...



「屌，垃圾黎既，下場數佢四五六球啦！」右翼阿琨叫道



「喂！楊城琨！！我等左你好耐啦！！！」

佢女朋友阿包黎到，督住阿琨個頭：「快啲啦！趕住去補習啦！！」


阿琨係足球隊入面少數有女朋友既人

面對阿包，阿琨瞬間變成老婆奴

「哈哈知啦阿包，各位我走先啦！！」



「我都唔知，點解阿琨仲忍到阿包呢隻老虎乸」球隊左閘肥龍笑道

「屌你，點都好過你溝唔到女啦！」球隊中場豬仔馬上恥笑

「仆街啦，大家都係a0毒撚姐！」




「邊隊都好，總之我地一定要出盡全力，知唔知！」

作為足球隊教練既林sir拍手鼓勵大家：「今年我地各個位置都好齊腳，係好有機會既一年！」



「三、二、一、馬中！！！！」


解散之後，因為我同田鼠同阿玉係同路，所以就一齊返去


「田鼠，你頭先果球好離譜呀，咁都頂漏！」

「仲有呀，你轉身好慢呀，減下肥啦」

一路上，阿玉不停指出田鼠頭先練波既甩漏，搞到田鼠都有啲唔耐煩

而我，就聽到差啲忍唔住笑




田鼠同我地唔同路，所以去到途中就剩低我同阿玉兩個

「中仔，你頭先笑咩呀」


「冇...冇野」

我唔想比阿玉煩到落車，所以馬上扮野



「你依家連正選位置都未坐穩呀！仲笑」

阿玉指出：「你今日斬果啲波無球合格囉，下下斬中腰波比人清走哂啦」


的確，講對大家球技既了解，阿玉絕對唔會比教練差

「咁我當初入球隊既原因都只係因為中一個個都要報課外活動姐...」


「唉，樣樣都求求其其，你咁既性格唔怪之得溝唔到女啦」

「你夠冇人要啦大舊玉！」

「咩呀！中仔你又人身攻擊！」


我同阿玉由細到大都係鄰居，所以本身都已經幾熟



「聽日見啦中仔，bye!」

「哦...bye」

同阿玉道別後，亦即係話，我又要返去對住果個勁乞人憎既...



「我返黎啦...」

無人應

都係既，老豆老母未放工，呢個時間得佢姐




「哦」

呢個人正坐響碌架床既下格度，玩緊手機



佢，就係我個妹，張元英



「老豆老母呢？」


「未返喎」

元英眉頭一皺：「阿哥你今日練波呀？」


「嗯」


一講完，元英就掩住口鼻大叫

「唔怪之得咁臭啦！快啲去沖涼呀！！！」


「得啦得啦，你唔講我都會去沖啦...」


「快啲呀...！就黎...斷氣啦！！！」

元英最後都頂唔順，衝門而出


on9，踢波實臭架喎...


元英係我個妹，細我兩年，同我同校

對比起各樣野都平凡既我，元英簡直係十項全能


細個老豆帶過佢去做iq test，check到佢iq應該有125，高過好多正常人

依家佢唔駛温書都可以輕鬆拎到全級頭五



「嗱，沖完啦」


「哦...」

沖完涼出黎，元英就已經開始對住電腦跳舞


「又睇..」

元英好鐘意kpop，由其係果個iu同i*zone

最近仲鐘意到報左跳舞班


「你識咩丫阿哥！」

元英繼續忘我地跳舞


我呢個妹仲有樣野令我好自卑

就係，佢竟然高過我！


讀中三既佢已經上到170cm，高過我既168cm

而元英既身型比例都好完美，腳起碼有40吋

有時我都好想知，點解老豆老母咁唔公平，比哂啲好既基因元英


冇幾耐，老豆老母就返到黎

「我地返黎啦」

兩老平時都係六點準時收工，買埋餸大約七點返黎


「咦元英你又跳舞呀？」

「嗯！」

元英一邊跳一邊問：「阿媽，今晚食咩呀？」


「係你最鐘意既豉油雞翼呀！」

「好野！」

元英對我同老豆老母既態度簡直有著天淵之別


「喂中仔，好心你執下間房啦，成枱都係書」

老豆無神神鬧我



我入房睇一睇，屌，全部係元英買果啲日本時裝雜誌，咩ray、美人百花

「喂老豆，你睇下啲書，元英架屌！屈鳩我！」

「你係阿哥黎架，幫下個妹執野都唔得呀？」

「屌，佢最憎人掂佢啲野，我一陣幫佢執咪盞比佢鬧？！」

「哦...你唔識問佢既？問個妹執唔執得都唔識呀？」

「我啱啱咪講左佢唔鐘意人掂佢野囉...」


我老豆就係咁，錫元英錫到燶，對我就樣樣野吹毛求疵


而元英，就繼續忘我地跳舞