《我將一位宅女變成女神，然後再將自己變成佢隻兵》: 下集 (13)

去到三月份既日子，要上既堂都已經上哂，要做既功課都已經做哂，剩落黎既日子就係考試季節，對我黎講，我期待左依個時間好耐，因為我唔再需要上堂，唔再需要面對無朋友既日子，不知不覺間，以前由鐘意返學玩下，見下朋友，我地日日都會諗到野去玩，每一日起身都會好想快D返學。
 
但依一刻，我已經完全唔想返學，當人地望住我既時侯，我會係到諗 :『佢係咪諗緊民主牆件事呢? 佢係咪鄙視緊我呢?』
 
基於依個猜測同不安，令我完全唔想返學面對人，好想摺埋自己算數。
 
由於考試時間表出左，所以依段時間就好似考AL咁，叫做Study leave，唔洗上堂，可以比大家溫書。而我可以有藉口摺埋自己係圖書館，繼續過返一個人既生活。丫，唔係，今次唔係過一個人既生活，而係有一個人陪我，佢就係范威。
 
『嘩.....嘩.....嘩.....中大真係好大呀!』范威邊行邊說。
 




『唔好好似D大鄉里出城咁啦，你都加油考好個AL!我係中大等你架!』我說。因為我見范威自己一個都係屈埋自修室，於是我就想帶佢黎中大一齊溫書，一來如果佢有學習上既問題，我都可以即時解答，幫佢考好個AL，二來比佢係中大溫書，個種衝勁同讀書心態應該更加強烈，因為身在大學溫書，個心一定更想讀大學。
 
『不過呢......中大既女仔好似麻麻地咁。』
 
『點呀，有咩見解呀?』
 
『拿拿拿! 雖則我唔係對其他大學咁熟，但係都對其他大學既女仔質素都有少少心得。』范威自豪地說。
 
『講黎聽下!』
 




『拿!中大既女仔不嬲都係老老土土咁，無謂衣著上，性格上都比較純樸之中帶點老土，你知啦!讀得書既女仔都係麻麻地，衣著都唔係咁識打扮!』
 
『哈! 係咩，我覺得無咩特別。咁其他大學呢?』
 
『城大同理大就係最Top既! D女仔好野性，又識打扮，冬天著衫配搭好正，熱天熱褲短裙都殺死得人，仲要MK得黎又唔會太俗，非常吸引!』
 
范威再說:『港大既女仔比較有氣質，雖然好多讀書勁既女仔，但比中大更有自知自明，會試下打扮自己，屬於知識型又有少少氣質。不過整體質素都係普通。』
 
『咁浸大呢?』
 




『浸大係耶撚學校，女仔想野性都難，加上浸大規模似中學，所以D女仔打扮同性格上都係純樸，唔同中大既係，純樸得黎又唔係老土，有返D港式味道。而嶺南就無咩特別。』
 
『科大呢?』
 
『科大係和尚學校，有女既咩?』范威帶點諷刺味道，大概科大既課目比較男性化，想搵個無J既人睇下都無。
 
『哈哈，你對大學咁熟，你真係要加油入黎! 拿! 比張證你。』我預先問左Roommate阿傑借左學生證比范威入黎。
 
范威接過證後，說:『喂! 仲有冇人一齊溫呀? 識下你D FD都好丫!』
 
范威一句說話有點一針剌落我心入面 :『丫.....溫書就專心D啦! 叫咁多人做咩。』事實上，我都無咩朋友可以叫，我都唔想比范威知道我既情況。
 
我同范威係圖書館入面搵左個位就坐係到靜靜咁溫書。
 
今日溫書情緒都唔錯，加上有一個相熟朋友係格離，令我心情既不安感覺慢慢減退。溫到咁上下時侯，就去左廁所。行去既中途見到寶兒佢地。組員見到我後，揮揮手。




 
我見一埸組員關係，加上寶兒又係到，就行埋去問侯一下。
 
『阿明!你又係到溫書呀? 你坐邊到呀?』組員說。
 
『我坐係水機格離，同我朋友一齊溫緊。』
 
『我地依到有兩個位呀，不如坐埋一齊溫丫! 大家交流一下。』
 
『丫.....』我望一望寶兒個樣，見佢好似無咩所謂，組員又想我地坐係到，於是就答應左佢，就返埋位叫范威搬位。
 
『喂! 你做咩成日叫佢痴埋我地到呀?』寶兒見我走左之後，就同佢既組員講。
 
『你做咁咁討厭佢呀? 佢上次唔係幫過你咩，大家一齊溫書唔好咩!』
 




『總之我就係討厭佢! 你呀! 唔好成日借D意叫佢埋黎，你係咪好Dry呀!』
 
『哈哈! 我地Dry呀? 咁你依個寶兒大小姐又唔Dry咩? 話唔定阿明係你真命天子呢!』
 
『廢事同你講! 拿! 係溫書先好呀! 唔好傾計呀!』說罷，寶兒見我返黎就無再出聲，專心溫書。
 
我同范威坐埋落去之後，可能大家都唔係咁熟既關係，大家都好客客氣氣，真係可以專心溫書，大家都靜靜地溫書，遇到問題時，先細細聲問大家。感覺比我想像中唔錯。我相信其他人都有咁既諗法。
 
 
天色晚了，步出圖書館後，感覺好似早出晚歸咁，不知不覺間已經溫左成日。大家都滿意今日既進度。
 
『阿明! 返屋企?』范威問。
 
『我返Hall! 你返屋企先吧!』
 




『OK!』
 
其他組員見范威走左就好驚奇，就問我:『你地唔一齊食飯?』
 
我再望一望寶兒個樣，佢好似唔多願意，畢竟佢本來就唔係咁鐘意我，我就推左佢地。見佢地去左食飯，姐係代表寶兒唔會出現係地盤個到，我就不知覺咁去左地盤，睇下寶兒有冇留言比我。
 
上次寶兒留言比我，問我係邊個，仲表明佢最近好討厭一個人，好明顯個個人就係我。
 
去到地盤後，見到道牆真係有寶兒既留言 "我無興趣去了解佢個人係點，只係想佢遠離我遠D! 』
 
之後再加多一句 "好呀! 我買左幾張Memo紙係到，我地一齊用呀 =] "
 
牆下真係放左一疊Memo紙，我笑了。於是我地既留言關係就開始左，我從來未試過咁樣同人玩過，覺得好新鮮，感覺上好浪漫，同埋有點似筆友。係現實上，寶兒唔鐘意我，但係依道牆上，我同寶兒正正交流著，互數大家心聲。
 
第二日




 
我打比范威叫佢返黎中大溫書，但佢好似都係想留返係自修室，因為佢好似怕左中大個條長命斜又唔想坐車過黎，就推左我。我都唔想逼佢，就自己一個去溫。
 
好早就到左圖書館，見到琴晚我地坐既位，只有寶兒一個。當我見到佢時侯，正想踏前一步行埋去，但一諗到寶兒可能都唔想見到我，於是暗嘆一下，就去第二到溫，一個距離遠，但可以睇到寶兒既位置。
 
一路溫書一路望住寶兒，見到佢溫書既樣真係同平時唔同，一副專心望住Notes既樣，不自覺地散發出一股吸引，仲不時係到咬住支筆係到諗野，彷彿就好似一個活生生既寶兒直播係我面前，令我一直望住佢。
 
當見到佢狂打喊路時，就知佢好眼訓。
 
當見到佢眼眉那埋一舊時，就知佢唔係好明Notes講緊咩。
 
佢既一舉一動我就留意住，令我覺得好有趣。見到佢眼訓，我腦海就閃出一個念頭，於是去左Canteen買左罐咖啡，再用Memo紙貼上一句 "精靈支持你! 愛心咖啡送上 "，成件事都好浪漫，完全滿足我所諗既心思，我唔知依D行為係唔係追寶兒，但我只係想試下唔同既野，去睇下寶兒既反應，為我生活平淡之中帶來少少變化。
 
返到去後，一直等緊寶兒既廁所時間，一見佢離開個位去廁所，我就即刻上前放低罐咖啡走人，再坐返埋位係遠處留意佢。個心唔知點解好開心，同時好期待寶兒既反應。
 
過左一陣，寶兒返黎見到罐咖啡係到，就覺得好驚奇，仲係到周圍望，依個反應令我感到好笑。
 
寶兒見到張Memo紙時，不自覺地微笑了，再將Memo紙拎走，偷偷地開罐咖啡黎飲，個樣非常Sweet!
 
我係遠處見到寶兒依個Sweet樣，連我都Sweet埋，大概女仔就係鐘意依種心意，雖然有點似電視劇劇情，有點不太現實，而且仲好老套，但當件事殺到埋身，自己竟成為劇中既女主角，都會不自覺去享受，去演繹故事中的主角般，開心Sweet。
 
溫書期間，寶兒時不時都拎我張Memo紙出黎望，佢個腦一定係到幻想緊我係咩人，點解可以一直係佢身邊，唔通真係精靈?
 
咦.....仆街啦! 佢會唔會當我係痴漢黎? 其實只要佢將件事慢慢從另一個角度去睇，就會變得好核突好變態，一個"痴漢"發現佢既牆上留言，仲會買咖啡比佢，就好似有個變態佬一直跟住佢一樣，屌! 到時精靈變痴漢，真係唔方唔Sweet。
 
但係見到佢個樣咁Sweet，我估佢應該都受落吧?!
 
到左中午，組員們都到左，仲Whatsapp我，問我一唔一齊溫，我先過去同佢地一齊坐。我仲扮哂野問寶兒:『依隻咖啡好唔好飲? 同埋有冇效架?』
 
寶兒:『想試咪自己買黎試下囉!』
 
『哦.....知唔知幾多錢?』我故意問佢依條問題，因為罐咖啡唔係佢買，佢唔會知個價錢。
 
寶兒猶豫左一陣，有點難為情地，後來又好巴渣咁講:『你自己買個陣咪知囉! 』
 
『哈哈!OKOK!』見到寶兒有點嬲，我反而覺得很快樂。
 
如是者，我每一個早上，我都會買咖啡比寶兒，趁佢離開座位時我都會即刻放低罐野，有時侯我怕寶兒突登裝我，我就確認佢入左廁所我再狗衝去座位先放低，免得比佢發現我。
 
" 多謝你每一日都送咖啡比我喎! 我再咁飲法，我既身體遲早比你整壞啦! 不過.....真係多謝你 =] "
 
我企係牆上，望住寶兒既留言，寶兒份人真係丫.....明明自己係好鐘意，但把口就成日帶點諷刺，總係唔會Show佢女性化既一面，但依樣對人惡死，但內裡存有女人應有既溫柔，反而更吸引我，因為我好想成為一個可以享受佢既溫柔既男人。
 
其實香港好多女仔都係咁，對人惡到死，但對住自己鐘意既人，就好似一隻被人馴服左小綿羊一樣，聽教聽話。唔怪得有一句說話係" 男人不壞，女人唔愛" ，大概女仔喜歡向難度挑戰，好想馴服這個"壞男人" ，將依個壞男人馴服成一個聽佢話既人，個種滿足感對女人黎講係非常之大。所以做好男人係一件好慘既事，因為女人好難係依種男人身上搵到滿足感，中規中舉既男人，生活平淡單調，反而壞男人把口真係淋死女，又成日出街玩，出街浦，每一日既生活都係到變化，令到女人好受落，跟住依個壞男人唔愁苦悶。
 
" 精靈一直守護住你，又點會令你身體變差呢! "
 
寫上Memo紙後，貼上就離開了。
 
當我準備返Hall時，比我係中途見到阿言，於是我就叫住佢: 『阿言!』
 
阿言轉身見到我:『咁岩既?』
 
『岩岩溫完書，你呢?』
 
『我都係喎! 你係邊到溫呀? 下次一齊啦!』
 
『我係圖書館，我同寶兒佢地一齊溫! 可以一齊既! 我諗佢地都唔會介意。』
 
『丫....寶兒....』阿言似乎有野想講。
 
『做咩? 聽到寶兒個名就咁既樣。』
 
『無呀! 邊有!』
 
『快D講! 係咪有野先!』阿言既表情挑起我心入面既好奇心，好想知做咩事。
 
阿言望一望手錶，然後說:『都夜啦，去Canteen邊食邊講!』
 
『好呀!』後來我同阿言就去左食飯，已經好耐無同佢單獨食飯了，剛好比我同佢聚一聚舊。
 
當我地食緊時，阿言似乎無意欲提我岩岩問既問題，我就問:『咪扮野呀! 頭先條問題你仲未答我呀!』
 
『你話寶兒?』
 
『係呀扮野!』
 
『無呀.....只係覺得佢幾吸引我。』阿言怕怕羞羞咁講。
 
當我聽到阿言咁樣講，個心突然有一陣似痛非痛既感覺，聽到阿言對寶兒有興趣時，內心突然有一種唔開心既感覺，覺得好似比人搶走左野咁，而且我意識到阿言既出現將會影響到我同寶兒之間既關係。
 
『下.....但我好似未見過你同佢傾過計既? 你地識架? 』我想攪清楚大家既關係。
 
『大家都係同學，梗係識，之前做PROJECT一齊做過，但唔係好熟囉! 佢份人好Cool!但幾吸引我!』
 
『你唔係之前同我講過...你鐘意讀浸會個個女仔咩?』
 
『嘩......N年前既事，我同個個女仔無咩聯絡了，我諗我地既關係已經完結左。』
 
『哦......』
 
『阿明......有時侯，我真係覺得幾寂寞，真係好想識返個女朋友。』阿言似乎想講出心事。
 
『嗯......』我唔知點回應好，我都講唔出口其實我都同你諗法一樣，唯有一直飲住杯可樂。
 
『但係你都知道......係大學入面.....好既女仔都比人Mark左，得返D.....唉! 寶兒比我感覺真係幾好.....最重要係佢仲係單身，姐係我仲有機會去識佢，去追佢。』
 
『咁又係.....好既女仔都已經有男朋友.....』我個心第一時間就諗起阿雪，同阿靜。
 
『你望下後面。』
 
我就轉身望下後面，只係見到兩個中學生男女係到溫緊書，大概放左學黎中大溫書吧?
 
『做咩? 個學生妹好正?』我問。
 
『唔係呀! 佢地擺明就係情侶啦!』
 
『咁.....又點?』
 
『中學時侯，著住校服拍拖既感覺呀! 你試過未?』
 
阿言依句說話令我有種想法，究竟著校服拍拖既感覺係點呢? 中學時期既愛情一直比我感覺似係小朋友玩泥沙一樣，唔會認真，唔會長久，但個經歷就非純真，大家都係對愛情一無所知，大家對拍拖既熟手程度都唔高，樣樣野都好新鮮.....
 
又令我諗起前幾日坐火車個陣，見到一對小情侶，年紀輕輕，應該得中三既歲數，但兩個人拎住本地圖，係到傾下來近拍拖去邊到，企係身旁既我不其然係到聽佢地對話，大概聽到佢地好多地方都想去，去下科學館，去下塔門，從佢地對話之中可以感到佢地既期待，好想同另一伴去自己鐘意既地方,去體驗同發掘未知既"世界"。
 
當對方話" 去唔去XXXX" ，之後對方回應就好興奮 " 好呀好呀! 幾時去呀!"
 
而唔係大人拍拖一樣，去睇戲飲野食飯落Bar......心態已經唔再純真，往往以"性"既角度出發，同你一齊就想同你上床，拍拖行街已經係例行公事，仲會覺得好悶，好煩。大熱天時仲要出街，留係屋企開冷氣扑野仲爽。當提出去一個地方時，總會推說好多藉口出黎拒絕，大人既拍拖就變得機械式，每個人既拍拖模式漸漸變成一樣，變成一個只係想有個人係身邊陪住，有個寄托就夠。
 
『我未試過......』我坦白地答。
 
『有人話中學時期未著過校服拍拖係一件遺憾事......唉! 』
 
『屌你咁講.....攪到我依家無遺憾都變成有遺憾!』
 
『過左既野想改變都唔得，依家可以做既，就係依家去努力!』從阿言既口吻之中，同佢本來我認識既阿言有點出入。因為本來有少少內向既佢，毒毒地既性格，竟然話會努力追女仔。仲要係寶兒依D咁高難度既女仔......睇得出，阿言真係受不住寂寞，要跳出自己以往既框框，試下去追女仔。
 
作為佢既朋友，我見到佢咁樣真係好開心，但唯一令我唔開心既係.....佢既對像係我依家所追既對像.....咦? 所追既對像? 姐係我打從心底，都覺得自己係追緊寶兒嗎?
 
『所以你要撐我! 依家得返寶兒依個女仔可以追....而且又同我係識得。』
 
『嗯.....好呀! 我.....實撐你，一定。』
 
『咪住先......你會唔會都對寶兒有興趣? 不過唔會啦.....之前都聽你講話追緊另一個女仔。』
 
『嗯.....傻啦，我同寶兒無野，加上佢都不嬲唔鐘意我，所以我同佢無可能，你放心。同埋....係呀....我追緊另一個女仔。』 為左阿言，我違背自己既心，講出幾個大話去令阿言放心去追。
 
『咁你地聽日幾時開始溫書?』
 
本來我想答 "朝早寶兒會好早黎到先，到時你買罐咖啡比佢，佢應該好buy你!"
 
但內心個種邪念將我依句說話收埋，之後說:『中午! 中午先開始! 到時再Call你!』始終，我個心都唔係咁全心全意撐阿言，唉......我都唔知，我都唔知自己想點。
 
『係呢，你追個個女仔點? 有咩進展?』
 
『無咩特別，都係咁樣.....』
 
『我地都要加油! 既然中學都開始唔到，我地就要大學到努力! 我諗清楚! 我唔想好似以前咁!』再一次，看到阿言個種決心，看來佢對寶兒依一戰抱住必死既決心。
 
『嗯! 我地都加油!』
 
食完飯後，就拜別左阿言，望住阿言既背影，有種說不出的感覺，同時間，有D後悔同阿言食依餐飯。
 
返到Hall後，一直都訓唔著，依一晚，每當我諗起寶兒時侯，我就諗阿言，腦海不知不覺間將佢地聯繫住，唉! 劉啟明.....
 
你前世係咪做錯好多事，點解你對每個女仔都有興趣時都會有阻滯。,
 
『阿明! 聽日要比賽喎! 記得帶衫黎!』我Rommmate阿傑突然轉身講。
 
『丫.....哦!OK!』聽到話要比賽，我又諗起上次我去到都係得個"企"字，連出賽既機會都無，仲叫我去做咩呢? 但我又唔係好識拒絕佢，加上佢又真係寫左我個名入個TEAM，唯有去睇下比賽算。
 
到左聽日。
 
我如常坐係平時坐既位，係遠處望住寶兒，我開始將寶兒慢慢放入我既生活既一部份，我係到諗，如果有朝一日，阿言真係同左寶兒一齊，又或者寶兒同左第二個男仔一齊，咁樣.....我會唔會重覆阿龍同阿雪既情況呢? 我會唔會因為咁而又再傷心又再消沉呢 ?
 
定係......趁寶兒仲未係我心目中佔有重要地位時，我係咪應該要放棄?
 
當我係諗緊野既時侯，寶兒又離開左座位，應該去又去廁所。我望住手上一早準備既咖啡，如果要放棄，依一刻就要做既.....就係唔再送咖啡比佢，之後唔再出現係地盤，唔再出現係寶兒面前，盡量將我對寶兒個種情，慢慢收返佢.....
 
但係.....我仍然情不自禁咁，企起身.....慢慢....慢慢行去寶兒既座位到，放低罐咖啡。
 
始終，我都敵唔過自己心魔，對唔住，阿言。
 
係遠處見到寶兒拎起罐咖啡，已經唔再有驚奇既樣出現，好似一切都變得理所當然，只係甜絲絲咁慢慢享用我罐咖啡。依個情景，令我有點安慰。
 
中午後，我叫左阿言黎左，由於大家都係讀同一科，所以阿言同佢地已經認識左。
 
溫書期間，我留意到阿言好怕羞，唔多出聲，估唔到一見到寶兒坐係身旁，阿言個種"毒毒地"既性格又再現形。但見到咁既情況，我反而有種暗爽既感覺，咁樣既表現，寶兒點會睇得上你?
相反地，我同寶兒暗地裡卻擁有一段鮮為人知既關係。
 
『阿言! 平時你有咩做架?』
 
突然間，寶兒開口出聲問阿言，都令在埸既我地都醒神左，因為大家都唔想一直咁樣沉悶地溫書，見有人肯出聲講下關於生活既野而唔係讀書既野，我地都好期待加入依個傾計團。
 
但係我有點不安，點解寶兒突然會問阿言? 係佢對阿言有興趣?
 
阿言有點驚訝，比唔切反應，於是慢慢地說:『我.....平時都無咩野做，上下網，打下機咁。』
 
當阿言咁樣講既時侯，我心有點歡喜，我心諗:『點可以咁樣答架! 梗係唔好將自己毒撚既生活講出黎啦!』
 
但寶兒既反應比我想像中有點不同，佢仲追問:『我都係呀! 平時都無咩野做，咁你有冇煲劇架?』
 
『有呀，我鐘意睇D日劇......』
 
『我都鐘意睇呀! 你最近追緊咩?』寶兒好興奮地說。
 
『我唔鐘意慢慢追.....通常套劇完左我先一次過睇，依家睇緊求婚大作戰!』
 
『我都係呀! 超感人囉!』
 
組員突然說:『死囉! 兩個劇迷痴埋左齊，有排傾。』
 
我再望一望阿言個樣，佢個怕怕羞羞既樣，面對住自己心愛既人，內心一定好緊張，但內心卻為寶兒對佢有興趣的一份心感到歡喜，我從來未見過阿言咁既樣，阿言一直比我感覺好毒，成日都上高登，講野都一舊舊咁，又怕羞內向，但心地卻好好，仲好撐我，突然間覺得係咪應該幫一幫阿言呢? 令佢開心同寶兒一齊相處，而唔係我呢?
 
晚上，佢地去食晚飯，叫埋我地，但我記得今晚要踢比賽，所以推左佢。阿言知道我唔得，都唔想同佢地食飯，但阿言見到岩岩同寶兒有D進展，又好想跟埋去，但基於自己唔擅長講野，加上性格問題，心底係極度不願意去。
 
『你真係唔去得?』阿言拉埋我一邊問。
 
『唔得啦，你睇下我，連衫褲鞋都帶埋! 我依家要去啦!』雖然我係無出埸既機會，但我知道阿言無左我一定唔敢去，我心底又唔想阿言去.....所以用比賽藉口推左阿言。
 
阿言望一望寶兒，個心有點失望，好似有點嬲自己個種性格。我見到阿言個樣時，又有點為佢感到可憐，但我仍然決定去比賽。
 
寶兒見我地傾左咁耐，就行埋黎講:『點呀? 男人老狗食餐飯都要諗咁耐，婆婆媽媽咁! 去就去! 唔去就唔去! 』
 
一聽到寶兒話男人老狗婆婆媽媽咁，我就好快答:『我唔去啦。我要去踢比賽。』
 
寶兒就將視線轉移向阿言身上，而阿言面對住寶兒，又聽到寶兒岩岩咁樣講，竟然答左一句:『OK!我去。』
 
『Good! 我地行啦! 好肚餓呀!』之後寶兒就帶阿言同班組員離開。
 
面對住佢地背影，突然有種酸溜溜既感覺，聽到阿言竟然應約，我諗佢自己都唔相信.....從依件事睇得出，阿言因為寶兒既出現，慢慢開始改變自己。我應該為阿言開心，定係......?
 
去到球埸，一如所料，正選陣容唔到我黎，其他人見到我既時侯都打聲招呼就算，都無咩點理我，我就靜靜地坐埋埸邊睇，個心一直諗住同寶兒食緊飯既阿言究竟點呢? 佢地就開開心心食飯，我就On99係到睇波，仲同人講比賽.....其實自己黎到只係睇波......
 
最後比賽結果，我地嬴二比零，又晉身上去。
 
『阿明!Sorry呀! 好似叫你黎坐咁。』阿傑邊飲水邊說。
 
『傻啦，你地本來都夠人，你叫我都係想做後備穩陣下姐! 我明既!』
 
『始終出唔出賽唔係我話事，Sorry!』似乎阿傑對我既處境感到同情，因為係佢叫我參加，但又冷落左我，令佢感到唔好意思。
 
『得啦!大家識左咁耐!明既! 咁我走啦! 』我拍一拍佢膊頭說，接著我就執野離開先。
 
電話Whatsapp響起，原來係阿言
 
阿言:
踢完?
 
阿明:
YA
 
阿言:
唉
 
阿明:
做咩?
 
阿言:
我愈黎愈覺得自己襯唔起佢.....
 
阿明:
點解咁講?
 
阿言:
唉 你係邊?
 
阿明:
仲係中大，你係我HALL樓下等
 
阿言:
OK...
 
收起電話後，頭先食飯似乎對阿言好大打擊，見到阿言咁灰，我都唔忍心見到佢咁，於是就行快兩步睇下佢發生咩事。
 
返到Hall樓下，阿言見到我一身裝扮同岩岩完全無分別時侯，不禁問一句:『你唔係去踢波咩? 做咩好似無咩汗咁....』
 
我講唔出口我根本無踢到，所以求其諗個原因耍走佢:『今日猜輸左，變左守龍。』
 
『你點呀? 食完餐飯就灰哂咁。』我靜靜地坐係到，望住天空，晚風吹來，其實幾舒服。
 
『對住寶兒我真係啞哂咁，我未試過咁近距離對住佢，覺得佢真係幾靚女.....我再望下自己，真係覺得好樣衰，我錢又唔多，讀書又唔係勁，樣更加.....我真係諗唔到寶兒會鐘意我囉。』阿言好灰地說，一個男仔肯認自己樣衰係一件好難既事，係網上話自己樣衰毒撚都唔會介意，因為無人知你係邊個，但阿言係我面前咁樣話自己，我諗佢係我面前可以做返自己，信任我先將依D心底話講出黎。
 
『咁.....唔係個個女仔都睇樣架嘛?! 寶兒唔係依D咁既人。』我唔係好識安慰人，但我都盡我所能安慰一下阿言。
 
『係又點? 唔好同我講睇內在美，你無一個外在吸引到佢留意你，對方點會睇到我既內在美?』
 
『我見寶兒對你都無咩抗拒，仲成日聊你傾計，關係係慢慢建立，唔急得，你咪慢慢同佢相處一下睇下點先囉，開始左唔夠一日就覺得自己衰梗，你琴晚既自信去左邊? 你琴晚個種決心去左邊?』
 
『唉!我唔知.....』
 
『琴晚你對眼真係有團火，你唔係話寶兒係最後一個算係有機會咩? 你唔係唔想好似中學咁後悔咩? 點解唔洗一日就謝哂?』
 
『可能我得把口啦.....始終性格問題，唉。』
 
睇黎阿言真係無哂自信，我真係唔明，短短既一次相處時間就足以打沉左阿言? 當阿言未同寶兒熟既時侯，阿言都覺得自己可以追寶兒，內心一定盤算左好多計劃去接觸寶兒，決心好大，自信好高，但接觸過寶兒後，就覺得配唔起佢，覺得對方無可能鐘意佢.....點解咁快可以打沉哂。
 
『唉，聽日我唔黎啦! 』阿言意思係唔想一齊溫書。
 
『如果你想放棄既，想之後既大學生活都係得自己一個人既，你就唔好黎。』我認真地說。
 
阿言望一望我，可能覺得我依句說話有點直接，但事實又係咁，令佢內心有點矛盾。
 
『點都好，都係個句，關係係要慢慢一步一步咁建立，你不如比少少時間大家相處下吧，或者你地相處個陣發覺寶兒唔係你杯茶呢。』
 
『嗯......』
 
『夜啦，你仲唔返去就無車!聽日見吧。』我試下打圓埸。
 
『好啦，唉! 聽日見。』阿言起身就離去，心情仍然低落。
 
我見到佢咁都不禁暗嘆一下，實在唔忍心睇到阿言咁既樣，但我既內心仍然放唔低寶兒。
 
如事者，過去一個月，我同寶兒之間既關係係現實上無咩增長，但係係道牆上面，我地關係卻好好多，道牆既Memo紙貼成道牆，我地愈傾愈多，大家每一日都好期待大家講既野，分享心事。而溫書團我地都繼續維持咁既關係，只係阿言有時唔會黎，佢既情緒都開始低落，成日有意無意咁表達自己都係無用，做既野都係哂氣，即使我叫佢加油，關心一下寶兒，傾多D Whatsapp，但阿言一一拒絕，因為佢覺得依種行為似狗公，一識寶兒就咁樣做，唔想寶兒討厭佢。我聽到咁，特別係狗公依個字，都感到無可奈何。
 
" 精靈，下星期我生日，你會出現嗎? "
 
見到依個留言，有點驚訝，覺得寶兒應該都中左毒，依賴左依段"感情關係"，恨不多想即刻見到我，一個每日送咖啡比佢，一個默默守護佢，一個同佢分享心事既人，好想見下依位"精靈"，更加希望可以同佢一齊。
 
本來我應該開心，但又有一陣不安感覺，如果寶兒知道精靈就係我，佢會點諗? 佢一直都好討厭，覺得我對感情唔專一，覺得我學生會行為好討厭，總之一句" 無好感"，但如果知道一直令佢幻想既人就係一個討厭既人，佢會點?
 
於是我溫書個陣，突登試一下寶兒反應，而當時阿言都係到。
 
當寶兒問阿言有咩劇岩推介時，我就加把口落去:『又傾劇....傾足成個月都仲係傾劇，你人生除左睇劇就無其他野咩? 例如識下男仔啦?!』
 
寶兒即時答:『我識唔識男仔又關你咩事!』
 
『我擔心你咋! 第時變剩女就唔好啦!』
 
『我就算變剩女都唔會揀你! 你放心!』
 
『我唔好咩? 其實我覺得自己幾好架! 又細心! 又識照顧人! 對感情又專一! 都算係好男人呀!』我故意講得輕鬆，態度有點輕挑，廢事比佢地知我係到認真緊。
 
『嘔....如果你係依種人，我死左去算! 因為你唔會囉! 』
 
『如果我係呢?』
 
『無如果!Sorry! 我揀阿言都唔揀你! 你死心吧啦!』
 
『哈哈! 阿言真係好!』其實當我聽到"你死心吧啦"，內心有點刺痛。但當佢講揀阿言都唔揀我時侯，我睇得出阿言有點歡喜，又令我有點唔應該有既安慰。
 
『佢梗係好! 又乖! 唔似你!』
 
『係既係既! 咁你揀阿言!』
 
『哼!』寶兒就轉頭對住阿言細細聲笑說:『講笑咋! 哈哈!』
 
阿言都笑笑口回應。
 
見到咁既情況，我更加肯定寶兒係現實中，從來唔會將我列入考慮既List上面。
 
個日，我去到地盤道牆，見到道牆貼滿我同寶兒之間既回憶，不禁有點心灰，我再留言
 
"你唔會想見到我，我都唔會見你。"
 
放低支筆，就離開了，或許我應該一心一意幫阿言，而無謂為自己鋪路。
 
離開地盤時，望一望個天空，依個月黎都夾係係寶兒同阿言之間，覺得有點累，同時間不斷為別人著想，而忘記左自己。阿言口中所講既遺憾，都係我既遺憾，大學真係好多好女仔比人Mark左，即使女多男少關係下，但其實要拍拖對我地男仔都幾難，而且我又臭左朵.......
 
但我都會寂寞，我都想拍拖，有時侯，我都想為自己作打算，而唔係為阿言。我都唔想成個人生只有情情塔塔既事，我已經好累.....好累.....為左愛情，我攪到自己臭朵，為左愛情，攪到自己曾經人唔似人，鬼唔似鬼，仲要穎兒黎安慰我，雖然我明白到，情，除左愛情仲有友情，唔應該執著於愛情，但係.....我內心又做唔到，唔通機會放係面前都要放棄? 至於友情.....我更加唔知道由邊一到開始重新建立，我既朋友圈子基本上消失左，同我有聯絡既朋友十隻手指都可以數得哂.....唉。
 
今晚應約踢波比賽，今埸係準決賽，只要嬴左就可以打入決賽，不過唔關我事，我去都係做觀眾，又要坐係埸邊到睇，所以都唔期望太多。
 
去到之後，照舊衫都唔換坐係到，今次對手都幾強，一路禁住我地黎砌，而且踢既節奏好急，快上快落，令到我隊既人都跑到索哂氣，一直捱打。話哂準決賽，對手已經無之前咁流，睇黎我地會有危機。
 
一講危機就真係失波，而且仲要兵敗如山倒，上半埸踢成三比一，短短十五分鐘之內失三球波，大家都意識到"輸梗"，於是都無哂士氣咁坐埋一邊飲水等下半埸。
 
『你點呀? 我覺得你地又唔需要咁急，係後面猜下波慢慢推上去仲好，你地下下一拎波就斬上去，但又控唔定，攪到將個波比返人，一直捱打。』我對阿傑說。
 
『唉! 我都唔知大家點，失左波就亂! 』
 
『嗯.....算啦!都打到黎準決賽已經算唔錯啦!』
 
『喂....既然都輸，不如你上埸!』阿傑說。
 
『下?』
 
『仲下? 我同"大佬"講比你上埸踢!』之後阿傑就拉埋我去同"大佬"講 :『可能係最後一埸，不如比阿明落埸踢下仲好。』
 
大佬同班球員見到我後，都覺得成日叫我黎睇波都唔係好意思，見形勢都無得打，輸左就拜拜，就比我落埸踢下半埸過下腳癮算。
 
我聽到依個消息之後，即時覺得好興奮，仲好快咁換衫換鞋準備出埸。
 
『係呢!咁你踢開咩位?』
 
『我踢開中埸中!』
 
『咁好啦!咁你踢中埸!』
 
『OK!』
 
當我踏入球埸時侯，突然覺得內心有股衝勁湧上黎，我終於.....我終於可以著上波衫，著上波Boot踏入球埸比賽，由於係準決賽關係，黎觀戰既人數都有唔少，都有三十幾人，我個Hall既人都黎支持我地，我覺得所有既目光都集中係我地身上，我要好好踢好依埸比賽。
 
下半埸開始時，隊友仍然踢得好急，我不斷示意交波比我，但隊友們就算見到我都唔肯傳波比我，反而一腳斬上去或者傳比其他人，個刻我先明白到，即使我落埸踢，佢地都唔當我係隊友。
 
所以我一直都只係跟住跑上跑落，波都未掂過。
 
既然隊友唔信我，我唯有自己搶波踢，於是我積極咁搶人地個波，之後搶到後，我自己直推上去，對方既人以為我傳比隊友，所以都無過黎Mark我，一直任我推落禁區線先知驚，幾條友衝黎我到搶波，就係個一刻，我左腳傳比格離個隊友，隊友接波後大腳射入個龍門到，龍門比唔到反應，就入左，比數變成三比二。
 
入波之後，埸邊即時有人大叫! 入波隊友跑過黎講:『屌你交得靚呀!!!!!!!』
 
其他隊友都行埋黎大叫:『仲有三分鐘追! 差一粒就追和啦!!!我地要加油呀!!』
 
之後每個人都走黎拍一拍我，個刻我雙眼有點眼濕濕，企係埸內，聽到身邊既人為我地大叫，個種氣氛好正，隊友開始信任我，當佢地拍一拍我既時侯，我好似將一直屈埋屈埋既委屈一拍而空，我要好好享受接落黎既三分鐘時間。
 
雞聲一響，比賽繼續，今次好明顯同岩岩唔到，隊友開始交波比我，想我造波，每當佢地交波比我時，就好似有把聲同我講咁 " 交比你啦!阿明 "
 
我就覺得好有衝勁! 於是一直推上去，我傳比大佬，大佬再傳比我，我再傳比隊友，不斷猜波上去，之後我見到有隊友係跑緊去前面，我就直線傳落去比佢，對方完全漏哂，隊友即時起腳射，射入左呀!!!!!!!三比三呀屌你老母!!!!!!!
 
『屌你阿明!!原來你咁撚勁既!!』隊友即時攬住我，大家都好熱血，我個刻真係好感動，現埸氣氛更加強烈，但時間仲有一分鐘，對方一開波就狂攻我地，令我地好難招架，但我地都咬緊牙關，退守哂後防，盡力守住最後一分鐘，由於考慮雙方體力關係，所以唔會打加時賽，一完埸如果分唔到勝負就會射十二碼決勝負。
 
個一分鐘非常難頂，對方完全壓哂上黎，由於時間有限，對方不斷遠射，下下都Ban埋黎，射到我地呯呯聲，當我地一拎波時，就兩，三個人衝埋黎搶波，攪到我地失哂方寸，波都交失。
 
『唔好比佢地起腳呀!!!!!!!』大佬大叫。
 
大家都跑到索哂氣，做哂人牆梗食波，對方都踢到燥底，不斷大叫:『射啦仆街!咪撚比佢停呀!』
 
我都情不自禁大叫:『我地要守住呀!!!』
 
但唔洗一秒，我就後悔我講左依句，覺得我好柒，我諗應該無人回應我，自己一個人係到大叫係一件好柒既事，但點知.....
 
成班隊友一齊大叫:『係!!!』
 
我聽到之後呆左幾秒，雙眼即時感覺到有D眼淚滲出黎，我一直響往球埸上既熱血就係想咁，估唔到佢地肯接受我，和應我，真真正正視我為隊友，埸邊住Hall既人，雖然同佢地交情唔深，但都肯叫我名加油! 阿傑更加係埸邊叫得仲勁 :『加油呀!!!!!!!!!守住呀!!!!!!!』
 
突然間我心入面個種委屈一下子發出黎，不禁大叫:『嗚呀!!!!!!』就殺上去搶波。
 
*******************************************************************************