《我將一位宅女變成女神，然後再將自己變成佢隻兵》: 下集 (12)
到左第二日
由於今堂係有一組人要出去present佢地份project，所以我地純粹坐係到聽，但我地從來都唔會留心去聽，都係禁下電話，發下夢，或者同格離位既同學仔吹下水。但奈何我無朋友係身邊同我 吹，所以都係禁下電話，或者聽下組員之間點樣對話。
『寶兒!琴晚有冇睇女王辦公室? 杜汶澤笑死我呀!』
『我琴晚去左睇葉問2呀，我今晚返去Down返黎睇先!』寶兒說。
睇戲? 夜晚晚去睇戲應該同男友出去呀? 寶兒有男友?
『WOW! 同邊個去睇呀? 講黎聽下! 哈哈!』組員追問。
『都係自己一個去睇之嘛。』
『又自己一個? 』
『有咩問題，自己一個去睇戲不知幾爽，靜靜地又無人煩，不如你地都試下啦!』
『理你都傻呀! 我寧願叫班FD陪我睇都唔會自己一個去睇咁毒呀!』
『你地唔識野我唔怪你地!哈!』
鐘意自己一個睇戲咁怪? 寶兒比我既感覺真係好戰鬥格同好獨立，不知不覺間散發住一股吸引力 同神秘感，令我好想去了解同探究寶兒更多既秘密，同埋我好在意寶兒會唔會再去返地盤個面， 見唔見到我留左個言比佢呢?
落堂後，組員們話要去食下午茶，但今次佢地無叫到我，我都廢事痴住佢地，就自己一個走左。
打比范威佢地，約佢地今晚出黎食飯，順便傾下穎兒既事，但范威好似唔多願意出黎，大概就黎 考AL既關係，佢心情都唔係咁好，我又唔想係電話到提到穎兒既死，唯有堅持叫佢出黎有重要野 傾。
所以今晚唔返HALL了。
返到屋企後，經過阿靜既門口，想同佢講穎兒既事，但阿靜同穎兒不嬲都唔係好熟，我估佢都唔 係好記得穎兒係邊個，更加對穎兒既死無咩感覺，但作為同學，好應該提下。
『叮噹。』我禁了門鐘。
開門既正是阿靜，佢見到我有D驚訝，大概我地好耐無見過面，又或者阿靜仍然在意民主牆既事 對我有幾大傷害。而我見到阿靜時，心跳都突然加速，明明打從心底唔想見到阿靜，但內心仍然 有一絲期待想見到佢。
『阿明? 搵我咩事?』
『丫.....有D野想同你講。』
阿靜諗左一陣，好似唔多想咁 :『咁.....關於咩架?』
我諗阿靜誤會左我意思，以為我搵佢係講返民主牆既事，於是我就話:『係關於穎兒既事。』
『穎兒?』阿靜好似真係唔多記得係邊個。
『之前同我地同班。』
『哦......佢做咩呀? 佢好似消失左好耐咁。』
『佢......』我話未說完，突然有把熟悉既聲音出現。
『係咪伯母呀?』
阿靜身後出現了阿風。
當我同阿風對視後，阿風態度即時轉左 :『原來係阿明，有野搵阿靜?』
個刻我有D比唔到反應，雖然我知道阿靜同阿風一齊左，但我估唔到佢地已經發展到可以去對方 既屋企，屋內得阿靜同阿風，二人共處一室加上又係情侶關係......會唔會已經發生左性關係?
阿靜同阿風上過床?
阿靜似乎感到尷尬，因為佢知道我同阿風不嬲都唔係好岩傾，加上我又輸左學生會比阿風，於是 打圓埸說:『阿明，今晚再同你傾好嗎?』
阿靜比個落台階比我，但我唔知發咩神經竟然仲企係到問:『我......阻住你地呀?』
『唔係.....只係.....』
『咁你今晚再搵我吧。』我低頭說，說罷，就轉身開門入屋。
我個刻真係好心酸，比阿雪同阿龍拍拖更心酸，因為就算阿雪同阿龍拍拖後，我只係見到佢地有 親密既行為，但都叫可以接受到，但依一刻見到阿風出現係阿靜屋企，我心邪，我真係覺得佢地 已經發生左性關係，都唔想去證明係唔係真，但我一諗到阿靜既身體已經比阿風享用過，我個心 真係痛到裂開咁，眼見自己鐘意既人比其他人佔有過，而無能為力個種感覺真係好痛心。
我一直挨住大門，唔捨得起身走，因為我想聽下阿風停留左幾耐，幾時會走。
直至數小時後，我先聽到拉開鐵閘既聲，我即刻企起身對住大門個洞望出去，見到阿風鍚左阿靜 一淡走左，雖然大門個洞好細，但仍然可以清楚見到阿靜既笑容係好甜蜜，我已經好耐無見過阿靜笑既樣，依樣野只有阿風先可以比到佢。
阿靜關上門後，我手提Whatsapp隨即響起
阿靜:
阿明!? 係咪有野搵我?
阿明:
嗯.....我約左范威佢地一陣係樓下傾，一齊嗎?
阿靜:
好呀
接著就無再講落去，雖然我好期待阿靜會問:『阿明你最近點呀?』 / 『阿明!好耐無見!』
接著就可以打開話題，傾下數之不盡既話題，聚舊又好，問清問楚又好，我好想知道阿靜諗緊咩。
但一切都無發生。
晚上，阿仁范威阿靜佢地都到齊，其他同學因為唔係咁熟，所以我都無叫出黎。這一晚，見面時大家既心情都好好，因為大家都好耐無見大家，但當我講出穎兒既事後，大家都面色一沉，沉靜左落黎。
『所以.....下星期會舉殯，我地就約埋一齊去吧。』我說。
『嗯.....好吧。』阿仁沉靜地說，大家既心情都好沉重。
『對上一次見穎兒係Last day個日，本來大家都散水返屋企，係穎兒一早拎左個籃球比我地打......』范威說。
『係......個日我地玩到好開心，玩到好癲。』
『嘿....你仲打爛人地對窗，攪到我地成班跟住你走。』
阿靜企係到雖然唔知我地講緊咩事，但都為我地係到回憶感到安慰。
『雖然我同穎兒唔係好熟，但作為同學我都會出席。』
我望住阿靜:『唔該哂。』
『係呢.....點解你又知穎兒有事既?』阿仁問。
我無可能向佢地講返因為我失意，穎兒死前都要見我一面既事比佢地聽:『因為佢前男友搵我，所以我知道件事。』
『唉.....咁突然就走左。』
『都夜啦，麻煩各位可以既話，都叫多D同學仔出席，我諗穎兒都想見到大家。好啦.....就咁啦。』
『我同你走吧。』阿靜因為住我對面，所以當我話走時，佢都跟住我。
『嗯。』
我一直走在前面，而阿靜一直跟貼住我身後，我一望到阿靜就諗起佢同阿風上床既畫面，我諗起之前係阿靜屋企幫佢用相機影佢對腳放上高登既畫面，個刻係我開始對阿靜身體產生興趣，同時開始對阿靜有左感覺，如今......阿風可以享受阿靜既身體，親吻阿靜身體每一吋皮膚......
唉，我竟然在意依樣野，即使阿靜同阿風拍拖，我竟然在意佢有冇失身比阿風!原來依樣野對我黎講真係好重要，令我對阿靜既印象有好大影響。
『阿明。』阿靜突然說。
『嗯?!』我從思考中醒來。
『對唔住，係民主牆既野.....阿風做既野....令到你.....總之對唔住。』
『算吧，我都已經唔擺係心入面。』
『但依件事我知道對你做成好大傷害......我唔知應該點補償......』
我抬頭望一望天空，今晚既月光好圓好靚 :『你望下個天，今晚月光好靚。』
阿靜抬頭望左陣，覺得無咩特別，就接著說:『總之.....真係對唔住。』
『哈哈.....唔洗係咁講對唔住喎! 我真係無野呀! 咁阿風對你好唔好呀?』我問。
『嗯.....佢對我好好，好鍚我。』
『正常一個女仔，對住阿風依個咁好條件既男仔都會動心。最緊要佢對你好就得。』
『多謝.....』
『估唔到你會快先過我拍拖，哈哈。』
『其實你都有啦!』
『我都有?』
『咪扮野! 之前陪你黎捉棋個個女仔! 我見佢同你好好朋友.....人地又靚.....』
『哈.....你講緊個個係阿雪?』
『我唔記得左佢叫咩名....但應該係! 佢幾好丫! 』
『嗯.....佢係好好，但唔係我既女朋友。』
『下?』
『佢......已經有男朋友。所以.....同我無咩關係。』
阿靜聽到依句之後，呆住望住我，個腦好似諗緊好多野，處理緊好多野咁。
『你真係變左好多，一年前既你同依家真係好大分別，哈.....個陣我記得有一晚好夜叫你落黎依到陪我傾計....你仲記唔記得?』
『丫.....記得丫，你個晚好似好唔開心咁。』
『嗯，個晚真係唔開心，但見到你後心情好左好多。』
阿靜聽到之後有點面紅，大概估唔到我會講得咁曖味。
『哈哈! 其實諗落，你同阿風一齊，應該係我一手造成。』
『點解咁講?』
『係我帶你上高登，係我教你點樣收兵，係我幫你執正個Look，而你.....同阿風又係高登到識，之後更加開始慢慢發展，所以.....你話係唔係我一手造成呢?』
『嗯......』
『做咩好似咁唔開心既?』我見到阿靜個樣仍然有點唔開心。
『無呀!』
我坐左係草叢格離D石椅，慢慢說:『其實我唔想同阿風鬥，我都唔知點解無啦啦我同佢變左死對頭咁，大概我係擔心你吧。』
『擔心我?』阿靜唔明。
『始終阿風都係網上識返黎，個口仲好似浪過油咁，以佢既作風應該食女不數，佢有咁既條件有咁既能力做到，當佢行近你身邊時，我最擔心既人.....就係你。』
『阿風唔係你想像中咁差，佢好好人...佢好.....』
『我知! 阿風好鍚你，對你好好丫嘛! 哈哈! 我都係講我既感覺姐，始終我同佢唔熟，佢份人係點你自己最清楚。』
『嗯.......』
『個陣我仲白痴到工都唔返，走去戲院搵你，幾驚你比阿風食鬼左呀!』
『哈......嗯!』
『阿明......』
『咩?』
『其實......點解你咁緊張我?』阿靜問。
『因為我鐘意你。』我諗都無諗，就講左依句說話，因為個環境好舒服，係月光照射下，涼風吹來下，我真係感到好舒服，都唔想再收收埋埋，既然已經無法改變，何不享受一下係月光之下盡訴心中情?
但阿靜大概估唔到我會咁答，驚訝地望住我。
『你扮咩呀!哈哈! 你應該一早知我對你有興趣啦!阿靜!』我笑說，我盡量將個氣氛唔好攪到咁彊。
阿靜似乎比我講中左咁:『嗯......』
『不過我無用啦，自從大家升到大學後，都無咩點傾過咁，大家既關係好似變哂咁，冷淡得令我有點害怕......』
『對唔住......』阿靜說。
『哈哈.....無啦啦做咩講對唔住? 咁好正常既，大家都有唔同既圈子，你都脫左毒，大把男仔追你.....仲邊會記得我呀! 哈哈! 我OK喎!』
『我邊有大把男仔追!』
『係咩? 哈哈! 』
『朋友之嘛! 都無追我!』
『你話無就無啦! 哈哈! 講起朋友....你facebook既朋友list都過千人....多我幾倍! 以前既你邊有咁多朋友! 』
『咁....去下ocamp，識下人都差唔多啦......』
『係!係! 係! 哈! 幾好丫! 生活多姿多彩!』 我拍一拍對腳，就起身。
『夜啦! 我返上去了。行吧。』說罷，我就行前走。
阿靜見我走，忍唔住問:『阿明! 點解.....你今晚講咁多我同你以前既野?』
我停左腳步，數秒後，我轉身望住阿靜說:『因為......我好掛住以前既你。』
阿靜呆呆地望住我:『阿明.....』
『好啦! 真係夜啦，返屋企吧。』我就轉身離開。
『嗯.......』
去到屋企門口，就正式同阿靜講再見，而阿靜卻有野想同我講。
『阿明!』
『咩?』
『丫......其實.....』阿靜似乎有難言之隱，個樣怕怕羞羞咁。
『其實......我同阿風係屋企都係睇下碟，我地無做任何野。』阿靜低頭說。
我聽到之後有D唔明白，但個腦諗左幾秒之後，大概估到阿靜想同我講，佢同阿風"咩都無攪過"。
『係咩......』我低著頭說，似乎我既表現令到阿靜睇穿左我，佢認為我一定會懷疑佢同阿風上過床。
『我記得架! 你之前同我講過，女人如果同過男人上床之後，個價值就會大趺! 你叫我唔好亂咁同人上床! 我記得架!』
『丫.......』
阿靜知道自己失言，畫公仔畫出腸講埋上床依樣野，即時臉紅:『所以...我地無野架啦! 我返屋企先! 再見!』說罷，阿靜就拉上鐵閘關上大門。
我呆企門前，突然感到阿靜好似同我交代一樣，佢依然是清白之驅。內心不禁有少少喜悅，至少阿風仲未完全得到阿靜。
心情經過今晚之後，有少少轉好，雖然無發生過咩大事，但至少依次同阿靜既對話，係依一年內算係最多吧?
***************************************************************************
第二日
今日無堂上，但我依然返返中大，因為今晚將會踢聯Hall 7人足球比賽，雖然我唔識D人，但答應左Roommate參加，點都要出席，廢事放人飛機。時間尚早，突然間諗起寶兒係地盤寫既野，好奇心令我好想知道寶兒睇唔睇到個留言，於是就去返個到睇下咩環境。去到後，當日寶兒寫上『今日同左個可惡既人一齊做PROJECT><!好討厭!』，我再係隔離寫上一句『點解咁討厭個個可惡既人呢?』。依家睇返，發現寶兒真係有回應我，佢寫上一句『你係邊個? 點解會黎依到既? 討厭咪討厭! 無理由!』。 哈! 佢真係定期黎依到一次，好吧! 我就同你玩落去，我拎起地下既白板筆，再寫上『我係依面牆既精靈! 你成日係我身體上寫字! 我忍唔住要出黎同你講數! 回應返你既說話，可能佢有優點你未睇到呢!』。寫完後，放返支筆，不禁笑了，我真係幾無聊。
行去落地玻璃窗睇一睇出面既環境，突然感到好舒服，好自在。雖然依家返學無咩朋友，獨行獨往，幾乎可以成日都無講任何野，但唔知點解開始習慣左依種生活，都開始適應個環境，既然改變唔到既事，唯有默默接受。琴晚同阿靜既對話，令我舒服左好多，雖然佢同阿風一齊左，但我唔知點解感覺到阿靜仍然對我有些少感情，但所謂既感情可能建基於由細玩到大既歲月，畢竟我係將佢由一個宅女轉型成一個好多朋友，好多人追既『女神』。可能我諗多左，出現以上既事機會率好低，但至少我將心入面既野講左比阿靜聽，雖然都係婉轉間接咁講，但我覺得已經足夠了。
望一望手提個時間顯示，時間仲早，轉身望住道牆，諗起寶兒講過自己一個人睇戲其實有另一番風味同感覺。
『好啦，既然都開始毒撚化，就試下自己一個去睇戲吧。』我對住道牆說。
於是就坐車出去馬鞍山，因為新港城有間細細地既戲院，企係顯示牌前，見到有唔少人排緊隊，望一望有咩電影上演，暫時最有興趣都係葉問2，話哂之前睇左葉問，無理由唔睇埋2，於是就膽粗粗走去買飛。排隊既人大多數係情侶，就算唔係情侶都係兩對兩對朋友咁黎睇，只有我一個人係到ON99黎睇。
『唔該......即埸葉問2既。』我對住賣飛既人講。
賣飛既人望一望我，從佢視線可以睇得到，佢對眼珠係向我左右移左幾野，應該想判斷一下究竟買兩張飛定係一張飛，但佢仍然都問一句:『幾多張?』
『一張。坐h19就得。』我指住螢光幕上既座位表，而且我聲量突登細聲d，廢事後面排隊既人聽到我一條友黎睇電影。
拎住張飛就入左去睇。
由於戲院唔係大，所有好多座位都吉左出黎，我搵返自己個座位坐低後，就唔敢亂郁，好似好驚比人發現自己一個黎睇咁，但坐低一陣，覺得其實一個人睇都唔係咩醜事，點解咁在意人地點睇自己，買飛又唔洗就黎就去，鐘意坐邊就坐邊，而且仲可以安靜咁睇戲，唔洗應酬身邊既人，寶兒就係鐘意依份自由既感覺?
一個人食飯，一個人買飛，一個人睇戲，一個人走。
突然有種感覺覺得自己似浪子，又或者說穿了，我只係一個毒撚。諗起古巨基首歌，比人惡攪歌詞既其中一句『其實毒撚一個更開心，洗撚你講。』
諗諗下，覺得我似係到自我安慰多過其他......
睇完之後，就返返去中大準備踢聯HALL 7人足球，膽粗粗去到球埸後，竟然無咩人黎睇，大概依d比賽都無咩吸引力，我都好耐無踢波了，以前讀中學時約踢波係一件好易既事，但依家各散東西後，唔好話踢波，見面都難。曾經入中大時，暗地裡想搵班波友一齊踢波，最後都不了了之，希望可以藉著今次比賽識多d波友，一齊享受踢波既樂趣。
『hi!』我行去roommate到，因為依到我只係識得佢一個。
『依? 黎左啦! 比賽就快開始! 聽下大佬講咩先!』我Roommate叫做傑仔，於是佢就帶我行去一個叫"大佬"既人到。
『依位叫阿明，都係我地隊波既!』傑仔介紹。
『hi!大家好!』我禮貌地說。
有人即刻說:『劉啟明呀嘛!係中大有邊個唔識你姐! 哈哈哈!』
那人句中有骨，令我心情一下子沉左落黎，大概佢講緊民主牆件事。
有人行埋黎我到搭一搭膊頭說:『收到風!你跑得好快喎!』
我一時之間比唔到咩反應，唔係好明佢講咩:『下? 我唔係跑得好快咋喎!』
『扮咩呀! 你狗黎架嘛! 四隻腳梗係跑得快啦!』
『哈哈哈哈!』現埸好多人都笑了，我明白到佢所講既"狗"係指狗公吧? 但我唔可以黑面，唯有跟住佢地扮下笑咁。
『講笑講笑! 我指跑狗咋! 唔好嬲呀!』
『哦....嗯!』我都唔知比咩反應好，只係覺得心裡有點難受，好想離開依個地方。
『啪啪啪!』有人拍了幾下掌聲，然後說:『照返我岩先所講既排陣出埸吧。』
之後成班人就轉身出埸，無人通知我應該要做d咩，我唯有行埋一邊換定波衫換埋鞋做定熱身。一路換，一路望住埸內既人，我地出埸既人有7個人了，係咪代表唔需要我?
比賽開始了，各人都小心咁踢波，猜下波，唔敢亂咁進攻，話哂第一埸波，都係小心d好。而我就企係埸邊，一直睇住埸波，個心好想落埸踢，眼見時間一分一秒咁過去，似乎佢地無換人既意欲。踢完上半埸，比數仍然零比零。當"大佬"再簡介一下一陣點踢時，我都行埋去聽埋一份，但佢地好似當我透明咁，估唔到我連球埸上既價值同存在感都沒有。
個刻真係好想走。
下半埸，我個隊射入左一球，比數暫時領先一比零。但都無意欲換人，而格離隊波就不斷換人，我只能呆企係到，我究竟係到做咩?
哨子吹響，比賽完結，我地嬴一比零。最後我都無出到埸，傑仔周身汗行埋黎:『我地嬴左啦!』
"我地"，係包括我嗎?
『嗯!』我苦笑地說回應。
『今晚返hall嗎?』傑仔再問。
『丫....好呀!』
『今日大家踢得ok! 大家要keep住! 加油!』大佬說。說罷，各自都散band。我一身踢波LOOK，波皮都無掂過，我係到諗下次仲黎唔黎，我依個大後備或許諗多左，人地成班都識既，佢地仲好似睇我唔起咁，句句有骨，雖然佢地話講笑，但我仍然心裡唔多好受。
傑仔要係到沖埋涼先走，我無出過汗，由一個興奮期待既心情黎到球埸，帶住心酸無奈既心情離開。心內不斷安慰自己，其實都無咩野姐! 都慣左架啦! 無野架喎!
但我唔想再自己呃自己，我有點受不了生活只有我一人，直到今晚，我講左有冇超過十句說話? 我心入面真係好難受。一直行返上hall既路，係天色昏暗下，微弱既街燈照射下，令我諗起當日同穎兒一齊行上hall，同埋揹住佢跑落黎既畫面，穎兒拼死黎見我，好想我振作，但我真的頂唔順。
我望住個天暗暗地說:『我已經好努力了，但我真係怕辜負你既心意。』
**************************************************************************************
『丫!!!我唔記得帶隻手指返黎呀!!』寶兒大叫。
『下? 我地仲有一個鐘就要Present啦! 不如你返屋企拎啦!』組員急著說。
我地今日要present份project，我地每個人都做左自己個part，之後send比寶兒作最後整理，當我地今日拎哂電腦出黎時，寶兒先發現無帶隻usb手指返黎。
『唔得啦! 我住得遠! 來回都要個幾鐘!』
『下! 咁點算呀!』
『唉.....我都唔知點算.....sorry 呀!!』
我望一望個鐘，都仲有一個鐘時間，就開聲 :『唔洗急，我地仲有時間，我地依家再整合一下大家既野，重新整一份就ok!』
『唔得呀.....我係用學校電腦做，做完放落隻手指到，我負責個part仲未做呀......』寶兒急得想喊咁。
『你負責個part我都有睇，不如咁，我同你一齊做，其他人再整合住d power point，好嗎?』我說。
『好啦!』組員隨即整合其他人既資料。
而我就拎住部電腦行去寶兒隔離坐低，依一刻寶兒失去方寸，大概估唔到自己成為罪人。
『唔洗急，仲有時間既，我地一齊夾手夾腳整好份power point佢吧。』我邊望住電腦邊說。
『唉! 我份稿連埋手指都放左屋企......就算整好份野我都無信心講得好。』
『咁啦，一陣你有野講少左或者唔明，我就出聲幫你補充一下吧。』
『你咁有信心既? 你準備過黎?』寶兒問。
『少少啦! 唔好講咁多! 快d開始做!』
『好好好!我地加油!』寶兒對我既態度明顯轉左。
而事實上，我係無睇到佢個part既野，都無信心可以幫到佢，只係係依個緊急關頭，作為男人，應該冷靜咁處理，唔可以急埋一份，要比到女人一種安全，可靠既感覺，這就是女人所說的『安全感』。而我一直搵資料砌power point時，一陣暗地裡諗緊點講，雖然未能盡善盡美，但總算可以過到骨。
終於，我地成功係限時內整好份project，而且present時，都講到所需要既野，一切都好美滿咁完結。大家都鬆左一口氣，因為Year1 最後一個present已經完結了，剩落黎只係考試。
『真係唔該哂你呀!!!!』寶兒合起雙手，低頭向我說。
『哈哈! 唔洗，我地組員黎架嘛!』
『等你成日串阿明! 依家人地救左你呀!』組員笑說。
『係啦係啦! 我錯啦! 以後我一定好好咁對你!』寶兒拍一拍我膊頭說，睇黎寶兒既心情真係幾好。
『咁我地去唔去high tea呀?』組員說。
『我有野做呀! 下次呀!』寶兒邊收恰東西邊說。
『阿明呢?』
我見寶兒唔係到，其他組員又唔係真係好fd，廢事dead air，就推左。拜別左佢地之後，又無所事事，望住個天，吸了吸一淡新鮮空氣，終於都完哂所有Paper work同present，黎緊考埋個exam就正式完左個Year1既生涯。或許我需要假期好好反思同放鬆一下自己，這大半年內發生太多事令我消化唔到。
行左陣，遠處見到寶兒，原來佢仲未離開中大，佢行既方向正正去緊地盤區，我就靜靜雞跟住佢，大概佢又去左個道牆上留言吧? 為左唔想比佢見到，我專登企係遠處呆等，等佢離開我先入去。
唔洗幾個字，寶兒就出黎，我就帶住期待既心情去睇下佢寫d咩，不知不覺間，我地係牆上既互相留言，令我係平淡生活之中帶點一絲既期待。起碼我活著仲有事情要我去做。
去到個道牆見到自己之前所寫既 『我係依面牆既精靈! 你成日係我身體上寫字! 我忍唔住要出黎同你講數! 回應返你既說話，可能佢有優點你未睇到呢!』
寶兒就係隔離寫上 『車! 扮咩精靈! 你係邊個! 快d講! 』
之後再寫上 『你講得好岩呀! 今日個個討厭既人救左我一命><原來佢幾好架! 不過我仍然有保留! 始終我對感情唔認真既人唔係咁鐘意! 』
我笑了。
我拎起支筆回應 『咁你又係邊個呢? 我讀year1!』
我再寫上 『精靈講既野係唔會錯! 都話佢有佢優點! 你唔好標籤左人地架啦! 至於感情上既野，你認識對方好深? 如果唔係就唔好再一次標籤人! 好好了解對方。』
寫完後，見到道牆就快比我地寫滿，鬼叫我地d字寫到鬼咁大粒。
我寫上『下次帶d紙黎寫! 道牆寫滿啦!』
放低支筆，心情真係唔錯，好想寶兒快d睇到，快d回應。
***************************************************************************
入到班房，班上一個人都無，大概放左學D人走哂吧? 見到阿靜自己一個坐埋一邊睇漫畫，於是我就行埋去聊下佢傾計。
『又睇埋D 重口味BL漫畫呀?』 我從後一手搶走阿靜手上既漫畫。
阿靜即刻好嬲咁伸手黎搶，仲大叫:『衰人! 比返我!』
我邊避阿靜邊睇下本漫畫 :『嘩.....兩個男人係到Kiss! 咩你地D女仔咁鐘意睇埋Gay野架!不得了不得了! 比返你!!』
阿靜搶返本野，坐返埋位淡淡地說:『BL唔係Gay囉!』
『嘿，你重口味就重口味啦!扮咩野!』
『哼!』阿靜無望我，專注咁望住本漫畫。
我企係佢身旁，望住佢，有一種說不出的感覺，阿靜依一刻好乖，好靜咁自己一個睇書，唔知點解比到一種安穩既感覺比我，如果，我係佢男朋友既話，依一種感覺算唔算係安全感呢? 至少我唔洗擔心佢比人追，唔洗擔心佢成日出街玩，唔洗擔心佢變心。因為佢總是係我身邊。
阿靜依一刻係宅女，我係到笑緊佢，什至全班都認為阿靜係一件重口味的貨色，係男人Talk之內，更加唔會將阿靜列入為追求既List上面。但依一刻既阿靜卻比我一種安穩，舒服既感覺。依一刻既阿靜無咩朋友，諗野仲係好單純，係阿靜既世界入面，佢活著自己既世界，享受自己鐘意做既野，雖然我地睇阿靜好似有問題，覺得佢係『宅』係一件錯事，係一個問題，但其實係我地將自己既思想強加於佢身上。
我望住阿靜，班上只有我同佢兩個人，一陣風迎面吹來，好舒服。我行近窗口，望住出面既景像，真的很舒服。
『阿靜，如果你一直都係咁就好。』我對住窗外說。
『咩呀? 平時又係到笑我，依家又叫我一直都係咁。莫名其妙。』
『因為我認識既你，已經變成一個好多人追，好多朋友，好多節目既一個女仔。已經變到觸摸唔到，估唔到既女仔。』我對住窗外感慨地說。
『你係到講緊咩呀?』
我正想轉身向阿靜說時，埸景突然變左阿靜間房，眼前只見阿靜，企左係我面前，著住條短褲，露出一對白滑既雙腳，怕怕羞羞咁望住我。
『點呀?係咪幫我影相放上高登呀?』阿靜說。
『下?』
阿靜慢慢將身體挨近我到 :『我話係 唔 係 將 我 放 上 高 登 到。』
『下?』
『.............』
張開眼，即刻彈起身，定一定神後，原來我係自己間房到，頭先原來係發夢。我擰轉頭望望側邊既窗，吹來陣陣涼風，將窗簾吹到飄下飄下。我再訓落床到，呆呆望住天花板，伸手摸一摸自己額頭說:『最近成日發夢見到阿靜.....點解咁。』
拎起床邊既手提電話，不自覺地打開阿靜既Whatsapp，顯示"上線中"，同阿風對話緊嗎? 再望一望手提顯示既時間，時間為八時二十分，諗左一陣，即刻彈起身梳洗一下。因為今日係穎兒出殯既日子。
梳洗時，對住塊鏡，望一望自己，穎兒離世已經差唔多二星期，內心對佢既思念都開始慢慢冷卻，雖然掛念既情緒慢慢減少，但我知道穎兒係我心目中仍然有一定既位置。有人話，有親人或重要既朋友離世，如果你好快就回復得到，開心返，人地會話你唔尊重對方，什至覺得你冷血，點解死左重要既人可以咁快好返? 亦有人說，依個係一件好事，至少唔洗日日以淚洗臉，永遠活在於傷感灰暗既情緒入面，回復開心，係一件好事。
雖然我唔係好開心，只係我打從心裡已經接受左依件事，我有我自己條路要行，穎兒以死都要黎同安慰，同我對話，我更加唔想辜負佢既心意。睇好多電視劇講到，死去既人都唔想係天堂見到自己親人為自己傷心流淚，但係我又諗，當身邊既人唔再為你離去而傷心，即代表『你』既地位或者印象都隨著日子慢慢減退，死去既人係天堂到見到身邊既人慢慢忘記自己，咁會唔會又想佢地睇到呢?
套用返愛情上面，一個岩岩比男友/女友飛既人，好快從情傷中回復過來，慢慢開始新既生活，什至開始新既戀情，作為朋友，唔洗見到自己朋友活係情傷之中，開心見到佢可以重新振作，但作為外來人，見到一個咁快從情傷中回復過來既人，依段所謂既戀情都應該不外如事，都係D十幾歲MK妹妹仔既感情事，對於鐘意對方既程度真係大極有限。但事實又會唔會咁呢?
我換了恤衫，西褲，套上一條黑色既領呔，穿上一套黑色西裝褸就正式出發。
依套西裝，中學時期既謝師宴會著到，大學既上莊時著到，估唔到連舉殯時侯都會用得著。
出門時侯，阿媽問我著成咁做咩野。
『無，今日係朋友既喪禮，我出席姐。』
阿媽聽到之後，即刻走入房拎個三角符比我 :『放係褲袋到! 百無禁忌!』
『媽呀，個個係我朋友黎架，唔需要啦!』
『袋住袋住! 又唔會阻到你!』之後阿媽就將對三角符放係我褲袋，我都無好氣咁接受。大概喪禮依D埸合令到老人家特別有顧忌吧!?
『叮噹。』我禁了阿靜屋企既門鐘。
阿靜開了門，一身OL既裝束，穿上黑絲，係我第一次見到佢咁樣著，以前既佢，係衣著上只係Tee恤牛仔褲，唔好話黑絲，裙都唔會點著。比我既感覺顯得阿靜大過左好多，改變左好多。
『出發吧，同學仔係樓下等緊，有D去左紅勘火車站等。』
『嗯。』
同阿靜一齊搭LIFT時，不其然諗起琴日發既夢，雖然無咩點接觸到阿靜，見面既次數都好少，但估唔到連夢都可以見到佢，唔係日有所思，夜有所夢嗎? 我對阿靜有掛念既心嗎?
落到樓下，見到阿仁同范威佢地，大家寒暄幾句後就正式出發，一路上大家都問大家一陣有咩做，話哂都係第一次去朋友既喪禮，免得一陣有點失禮。
『其實無咩野，都係見穎兒既最後一面姐。』事實上，我都唔係好知要做D咩，只係見到電視劇上面都係去到靈堂拜下就走人，我諗我去為左穎兒，其他既細節我唔想去理，都無必要去理，我對自己有所交代，對穎兒有所交代就得。』
『唉，我覺得成件事好唔知點咁，上年我地仲同穎兒一齊玩得好開心，一年之後就.....』阿仁看來有點情緒，大概事情黎得太快，好多人都接受唔到。
『係......真係估唔到。』
『唉，穎兒係個好女仔，點解會遇到咁既事。』范威說。
說罷，我地都沉默著，看來大家都開始有點情緒出現，但依一刻既我反而無咩感覺，係之前因為穎兒既死流了太多眼淚，傷了太多心而麻目了? 我不知道。
到左紅勘火車站，見到好多中學同學都著哂西裝，感覺有點似謝師宴個一晚咁，大家都柴娃娃咁出黎，係到自我享受著西裝既日子，大概顯得自己終於變成上班族既大人。由火車站行去九龍殯儀館個段路程，同學們之間既話題唔再係" 你最近點呀?" 而係關於穎兒。
『雖然我同穎兒相處經歷好少，但係突然間好似消失左一個朋友咁，我覺得.....好似好唔知點咁。』一位同學說。
『係丫.....雖然穎兒唔係班到好活躍，但都係我地班一份子，突然離開左.....唉!』
一路上大家既話題都係圍繞住穎兒，雖然大家對穎兒既認識唔深，但都有同一個感覺，就係突然間有一個人從你圈子之中消失，你永遠都唔可以再同佢對話同見面，這個感覺很怪。
黎到九龍殯儀館，阿Ray已經係門口等緊我地，帶住我地行。
『阿明! 依面!』阿Ray揮揮手。
我望一望間野，發覺除左穎兒之外，仲有好多人都擺緊靈堂，我仲以為一日只出殯一個人。
『你地同學仔呀?』阿Ray說。
『係呀。』
『跟我上去吧，今日好多人出殯，唔好阻到人。』阿Ray說。
我地同阿Ray一齊搭LIFT上去時，阿Ray見到我地好似有點緊張同傷感，都笑說:『唔洗咁樣喎，正常心去對待就得，唔洗咁沉重既。』
范威細細聲對我說:『原來香港真係好多人死!』
『係呀係呀，下個到你!』我笑說。
『哈哈! 係呀! 依一行好好搵架，唔憂做!』阿Ray都笑說埋一份。
同學們你眼望我眼咁，大概估唔到點解我地可以咁輕鬆，我都估唔到自己會咁輕鬆。
『一陣唔洗同穎兒父母佢地講節哀順變個類說話，依D說話好廢，已經列入左十大喪禮垃圾句子之一。』阿Ray說。
『咁我地應該講D咩?』
『有時侯.....唔出聲都係一種支持。你明嗎?』阿Ray說。
我幾同意，有陣時侯一D安慰說話都係廢，如果我有傷心失意時，有人講"加油"，"唔好灰心" ，"我撐你!" 係我地眼中佢地根本唔會明白個一刻既感受，只係覺得佢地講既野都係廢，但如果佢地靜靜拍一拍我博頭，唔出聲咁，已經令我感受到佢既體諒和安慰。
入到靈堂，氣氛都好沉重，靈堂中央放左穎兒既一張相，張相好明顯係學生相黎，因為我隱若見到校服領，相中既穎兒笑住口咁，好似同在埸人士都帶以微笑。個一刻我見到穎兒既樣，不禁開始有D心酸，心入面既情緒都開始蘊釀緊，只要一見到穎兒既樣，入面既思念同情緒都開始蠢蠢欲動。
『你地去裝住香比穎兒。』阿Ray拎左袋香比我地，再慢慢派比我地。
我拎住支香，點起佢，再慢慢一步一步行緊靈堂中央，穎兒父母見到我後，都點頭示意，佢應該知道我係邊個，因為我地唔係第一次見。
行近穎兒張相面前，心裡說一句:『穎兒，我一定會重新振作，唔會令你失望。』說罷就鞠躬再裝香。
我地同學仔裝完香後，阿Ray說:『你地坐係個邊吧。我去做埋其他野。』阿Ray說罷就走了，大概整個喪禮都由佢話事，穎兒父母都對佢加以依靠，唔講以為阿Ray係穎兒男朋友，真係估唔到阿Ray同穎兒分左手後，仲會堅持做埋依D工作，依份心意唔係一般人做到，佢本來根本唔需要做到咁，但佢仍然堅持。
一直坐住既我地，心情都好沉重，不斷見到唔少穎兒既親戚黎到拜穎兒，同時見到穎兒父母喊成淚人，特別係穎兒既媽媽，得穎兒一個女，如今白頭人送黑頭人，加上一直以來都咁鍚穎兒，心入面一定唔好受。你叫佢老人家點樣接受依個結果? 叫佢點樣接受失去女兒之痛?
見到穎兒既爸爸媽媽，令我想起自己既爸爸媽媽，做仔既我，一直都無點特別對佢地好過，有時侯仲會埋怨佢地煩，成日為點小事而嘈交，但實質上，我好愛我父母，而我父母都好愛我，有時侯人大了，自尊心愈黎愈強既時侯，對父母既肉麻行為都愈黎愈少做，唔知幾時開始我唔會鍚媽媽，唔知幾時開始無同媽媽一齊買餸，唔知幾時開始無同阿媽行街市，更加唔會同屋企人講早晨晚安。但最好笑既係，我對人地父母就客客氣氣，好有禮貌，但對自己父母卻呼呼喝喝，大概父母對我地所做既野，我地一直視為理所當然，但從來無真正關心佢地，體諒佢地，人愈大愈覺得父母思想守舊，固執，但父母卻供你讀書，令你變成思想新潮，開明既人。當你改變後，係咪就開始厭棄父母?
我望一望身旁既阿靜，我將阿靜由宅女變成女神，對方變成一個萬千寵愛在一身既女仔，會唔會對於我依個一無事處，錢又唔多，樣又唔靚仔既我有一種厭棄既感覺嗎?
過左一段時間，阿Ray就說:『你地可以排住隊，一個跟一個瞻仰遺容。』
我地慢慢起身排隊出去，一個接一個地向靈堂中央既棺材上既穎兒，見最後一面，因為我知道最後穎兒一陣就要火化，依次真係真真正正既最後一面。
當我行近棺材，見到穎兒時，穎兒好靚，大概化妝師做了很大的工程，因為我印像中穎兒死前發腫得好緊要，而且塊臉仲好黃，如今臉卻廋了很多，而且很白，一個美人就這樣訓左係個棺材入面。
我盡量將依一刻既畫面記入腦海入面，我對自己說千其唔好忘記依一刻，我唔想我既腦海隨著日子增長而對穎兒既事慢慢減少，至少比我記下穎兒既樣，將來十幾年後，廿幾三十年後，當提到穎兒時，我都可以記得佢既樣。
儀式完成後，之後既事都交比阿Ray同佢家人去處理，我地唔需要睇佢出殯同去睇佢火化，我地要做既野都已經做完了。這樣，真係同穎兒正式告別了。
我地一班同學仔一齊離開時，都沉默著。
行左一段路後，我轉身望一望阿靜係邊，發覺我地人群之中少左幾個人，於是問:『阿靜佢地呢?』
大家你眼望我望，睇黎都唔知佢地係邊。
『頭先出黎個陣，阿靜同范威好似行開左。』阿仁說。
『下? 攪咩佢地? 』
『唔知呀.....依家點呀? 各自返屋企?』阿仁說。
『其他人呢? 返屋企?』我說。
『我地約左人呀，我地要走啦。』
『嗯! 咁下次再見吧。』
『喂! 我地不如出去打波啦。』突然阿靜既聲音突然出現。
我地視線全部轉向後面，只見范威同阿靜，而阿靜手上拎住一個籃球。
依個畫面，依個動作，就好似Last day穎兒拎住籃球對住我地一樣。
『做咩有個波既?』阿仁問。
『我記得之前你地Last day同穎兒打過籃球! 於是我就叫范威陪我去揀籃球，因為我唔熟應該買咩籃球岩你地打。我地既然Last day同穎兒打過籃球，今日我地都要打籃球向穎兒道別!』阿靜微笑地說，接著就邊拍個籃球，但唔熟識籃球既佢，顯得雞手鴨腳，埸面有D好笑。
『嘩.....阿靜你....好有心思。』阿仁說。
『仲企係到? 前面有個球埸呀! 我地去打啦!』范威拎左阿靜個籃球就叫我地出發去。
其他同學都感動了，都紛紛跟住去。
『你地唔係話約左人咩?』我問。
『唔理啦! 穎兒梗要D! 去啦!』
望住佢地身影，明明球埸距離離我地好近，行幾步就到，但班友仔仍然好青春咁跑上去，令我感覺好似返返去中學時期咁，大家動不動就跑，即興既情緒依舊，後生仔話做就做，根本唔需要照慮任何野。Last day個日，正當大家好無癮咁，準備返屋企時，穎兒突然出現話落去操埸打籃球，大家都係咁......
『穎兒 ? 你唔係走左咩? 』眾人都好驚訝地問。
『一打鐘我就衝左落去體育室拎個籃球返黎啦，廢事比人搶左去! 同埋今日last day 喎! 咁樣完結既話，你班熱血男兒點會滿足呀? 一齊落去玩啦。』穎兒興奮地說。
『穎兒!!!我愛你!!!!喂!!!我地拎埋書包落去球埸啦!!』阿仁講完，即刻收恰書包。
『接住!』 穎兒拋個籃球比我。 我接過後，就行近穎兒到。
『仲以為你走左。』我說。
『我走架啦，不過……過埋今日啦。哈哈! 我打波好渣架，你唔好笑我呀!』
『嗯! 一定唔會笑你，至多.....串你!』
『喂呀!!死人阿明!』
『仲講!!落去啦!!喂!!大家!!出去啦!!』各人保持住一個興奮既心情，拎住書包由六樓衝落去操埸。
一路衝落去既時侯，大家不斷閃避人群，雖然過程好驚險，仲差D趺倒，但我地都好開心，好好笑。大家平時係學校都扮乖乖仔女都扮到夠，今日就比我地趁Last day好好放縱一下。一路跑時，學校既同學仔都見到我地咁，都以一個葡萄既目光望住我地，就好似同我講” 頂……我都好想好似你地咁玩呀!” 。
『企係到諗緊咩呀? 行啦! 大少!』阿靜說。
『嗯!』我微笑回應。
來到球埸，范威正想開波時，我突然諗到一樣野，就大叫:『等陣等陣!』
『點呀你!』阿仁問。
我係銀包到拎出一張穎兒既學生相出黎，再行去籃球框到慢慢撐起張相 :『拿! 穎兒真係同我地一齊打波架!』
『死仔!你收埋穎兒張相做咩呀?』 阿仁笑說。
『咩呀! 你地每一個人既相我都有收埋! 你地無儲學生相既習慣咩? 將來你地死左我可以揀張靚既比你地屋企人做車頭相!』我笑說。
『你食屎啦! 你死我都未死呀!』
『咪講啦! 開波! 嗚呀!』范威除低掉西裝褸，好型咁掉埋一邊，而我地成班男仔見到咁，都好型好一致咁，一齊除低件西裝褸掉埋一邊。
女仔見到我地咁，都扮出一副嘔心既樣:『點呀你班男仔?』
『開波!!!!!!!!!!!!』范威一聲令下，我地就開始玩樂了。
今日天氣好好，我不時都望向籃球框下既穎兒，彷彿穎兒好開心咁，睇住我地打波。
我不自覺地，我慢慢說:『再見啦，穎兒。』
************************************************************************************