《我將一位宅女變成女神，然後再將自己變成佢隻兵》: 下集 (14)

『咇.....咇....咇!!!!!』球證雞聲一響，依個雞聲我地等左好耐，明明係一分鐘時間，但感覺好似好耐咁，終於....終於聽到球證既雞聲。
 
比賽結束，我地最終守得住三比三既戰果，球證就拉埋我地係一邊，放低個波係十二碼位置，話就話射十二碼，其實7人埸個個係九碼點黎，姐係龍門仲難救過十二碼，幾乎係睇運氣。
 
『邊個去射先?』大佬問。
 
『阿明啦! 阿明好撚勁!』隊友說。
 
『下.....我?』
 




『係呀!你去射第一個啦! 你射失左都無人怪你! 加油!』
 
『嗯!』我正當轉身行上去時，大佬走黎拍一拍我 :『加油!』
 
個波係我面前，現埸氣氛沉靜哂，大家都好緊張，我就更加唔可以射失。
 
我吸一吸口氣，慢慢舒出黎，定一定神就一腳射埋去左邊，龍門捉錯路樸去右邊，第一球我就射入左!
 
我即刻大叫:『YES!!!!!!!!!!!!!』
 




埸邊都聽到好多掌聲，我行返去後面，靜靜地睇另一隊波射。之後隊友叫我:『喂!阿明!過埋黎啦!』
 
原來佢地大家互相搭住大家膊頭，一齊係後面支持射波既隊友，我就行埋黎一齊搭埋!
 
『我地嬴左我決定CUT J!!!!』隊友大叫。
 
『我又CUT!』
 
『我都CUT!』
 




『我CUT完又CUT呀!!屌你!!』
 
『嬴左我自含呀屌你!』
 
大家都為左嬴波都出哂魔咒，務求得到幸運之神既捲戀，我都忍唔住玩埋一份:『嬴左我一個月唔打J!』
 
後來對方真係射失左，連龍都唔中! 我地即刻大叫! 由於玩即時死亡，只要我地射入!就可以即時勝出! 而依球就係大佬踢!
 
『大佬!大佬!大佬!大佬!』我地係咁大叫。
 
之後大佬轉身示意我地唔好嘈，我地即時收哂聲，吞一吞口水，靜靜睇住大佬射依一球。
 
大佬摸一摸個波，慢慢放低，望住個龍門，慢慢退後幾步，再助跑一腳射埋去! 速度好撚快，龍門完全比唔到反應，我地就入左波! 正式勝出依埸比賽! 我地即時衝向大佬到，在埸既人都衝落球埸到攬住我地! 我地既反應就好似嬴左英超咁，個個都好HIGH! 個個都係到大叫咆哮!! 埸面好正!
 
我地抱起左大佬，係咁彈佢上天，之後隊友大叫:『仲有阿明呀! Con佢去門柱!』




 
之後班人捉起我，將我推向龍門柱到磨，大家都玩得好HIGH!好興奮! 我都唔介意佢地咁樣玩，依一刻大家都好開心，難以形容個種心情。
 
我企係球埸上，閉上眼，大大力吸一吸氣，過去半小時內簡直係我依年最開心最剌激既時間，係依到我得到隊友既信任，係依到我終於搵到我由邊到建立返我既朋友圈子，係依到我搵到....我既存在感。
 
『喂!阿明! 過黎影相啦!』有個女仔叫我。望真D，原來住我Hall個層既女仔，佢地帶左相機為我地影相留念，我就行埋去影，留低真正既回憶。
 
比賽完左，我地去打邊爐慶祝我地入到決賽，大家都好開心叫哂啤酒啤啤佢!
 
『下次比阿明踢正選!有冇問題先!!』隊友問。
 
『拿! 我就好公道既! 阿明咁有料! 我實讓比佢踢!』阿傑搭住我膊頭說。
 
『阿傑.....得咩?』我感到有點驚訝，其實我已經好滿足，再出唔出埸既問題我已經唔再著緊。
 




『梗係得啦! 有左你隊波好踢左好多! 』
 
『嗯! 我一定會盡力踢好佢!』
 
『好!!!大家啤啤佢! 等決賽啦!!!』
 
大家都拎起支啤酒，大叫:『飲杯!!!!!』
 
*******************************************************************************
 
第二日
 
我去返地盤到睇下寶兒留左咩言比我，點知見到一張寫左Msn既Memo紙，再加左一句
 
" Add我傾，咁樣幾日一個留言，都唔知傾到幾時"




 
睇黎寶兒都好心急想同我有進一步既接觸，想知我係邊個，都想係佢黎近既生日會上面有"我"既出現，當我睇到佢留左Msn比我時侯，我係到諗，係咪應該繼續落去，眼看見我地關係慢慢一步一步有所發展，大家之間既距離慢慢一步一步走近，每當諗到依個位，我就諗起阿言，我好似背住阿言做好多野咁，突然有種內疚感覺，但係我又唔覺得有咩問題，我還我，寶兒還寶兒，阿言還阿言，大家無互相抵觸，我有我追，佢有佢追，只係差在大家未知大家有所行動咁解。
 
我整甩左張Memo紙後，拎返去圖書館，坐返原來既位置，打開Notebook，add左寶兒。唔怪得寶兒今日都帶左Notebook黎，原來佢都靜侯緊同"精靈"既Msn對話。
 
寶兒:
你好呀 XD
 
精靈: (我特登開個新既MSN去ADD佢，免得佢知我既身份)
你好
 
寶兒:
今日唔送咖啡黎既XD?
 
精靈:




廢事你成日飲咖啡，傷身呀!
 
寶兒:
哈哈! 你唔係話會守護住我咩? 我怕咩!
 
精靈:
可能係吧
 
寶兒:
喂喂! 你好快D講!
 
精靈:
講咩?
 
寶兒:
你係邊個囉 我生日會你黎唔黎呀?
 
精靈:
第一次見面就想我黎生日會? 你唔怕咩?
 
寶兒:
有咩好怕? 你咪又係一個讀緊中大既男仔，有咩怕唔怕，咁當然啦 你可以早D出現比我見 XD
 
精靈:
咁想見我做咩?
 
寶兒:
你唔想見到我咩?
 
精靈:
哈哈 我日日都可以見到你
 
寶兒:
唔公平! 點解你可以見到我 我唔可以見到你? 究竟你怕咩?
 
精靈:
信我 當你見到我後，你會後悔
 
寶兒:
我唔會後悔
 
精靈:
有冇聽Eason首『大開眼界』
 
寶兒:
有....做咩?
 
精靈:
總之....你唔想見到我，其實咁樣落去咪幾好，點解要改變呢?
 
寶兒:
你隨隨便便就走左入我既生活......有冇理過我感受?
 
精靈:
我......
 
寶兒:
隨隨便便走去地盤留言，隨隨便便每幾日留言同我對話，隨隨便便每朝早送我一罐咖啡，持續左咁耐.....你覺得我點諗?
 
精靈:
我唔知你想講D咩.....我只係想你明白，有人會比我更加對你好，更加珍惜你
 
寶兒:
咁點?
 
精靈:
咁你咪去多D留意身邊既人囉
 
寶兒:
咁你呢? 我係咪唔可以留意你?
 
精靈:
你.....見到我，一定唔會鐘意我
 
寶兒:
做咩? 你好樣衰咩? 你唔見得人咩? 咁我又可以見得人咩? 我又好靚咩?
 
精靈:
不如算啦
 
寶兒:
算咩算! 你地男人就係識得講算算算.....我同你講，就算我知道你係邊個，我都唔會改變我依家既諗法。總之.....生日會你就要出現。係咁。
 
之後寶兒就離左線，我再望向寶兒，見到佢好大力咁摺上手提電腦，再伏係張桌上面，係喊緊嗎? 係依個情況可以睇得到.....寶兒真真正正依賴左我，而且仲對我有很多既幻想同期待，仲慘過玩網戀，因為網戀只可以開電腦先可以同人接觸，依家我係實實在在出現係寶兒身邊，每日既留言，每日既咖啡，每日既浪漫手法，令到寶兒非常受落，已經對我有種唔應該有既愛意，愛情係盲目，連一個未見過既人，都可以咁大膽講 "就算我知道你係邊個，我都唔會改變我依家既諗法。"
 
大概寶兒認為我唔係D咩壞人，網戀黎講，對方可以係唔同身份，自自然然有左唔少憂慮同危險，但既然可以自出自入圖書館，應該都係中大學生，我諗佢唔會諗我係地盤佬吧?
 
中午時，我地一齊溫書。
 
見到寶兒雙眼紅腫，擺明就喊過黎，但我地都無咩點出聲，但組員們就出聲提依件事
 
" 個個咩鬼精靈，成日收收埋埋做咩姐! 佢估佢真係精靈咩"
 
我扮哂傻仔問:『咩精靈?』
 
『哦.....一路同寶兒玩既人，佢話自己係精靈! 其實就係讀緊中大既人!』組員答。
 
『喂.....做咩同佢地講姐!』寶兒睇黎唔想有其他人知，大概佢覺得我地男仔知道件事一定會笑佢白痴。
 
『無所謂啦!多個人知多個意見呀嘛! 唔講都講左啦! 喂!阿明! 條友唔想比寶兒見到，你覺得點解呢?』
 
『咁一個人唔想比佢見到.....有好多原因既，可能....可能怕寶兒嫌棄佢呢!』我突登講嫌棄依個主題。
 
點知寶兒反應好大，即時回應:『我唔會囉! 我更加唔係個種睇樣既人!』
 
依個說話，令到阿言有種安心既感覺，但同時間令到阿言好憂慮，因為佢岩岩知道佢有個對手叫"精靈"，而且仲令到寶兒咁依戀依個人，令到阿言有點心酸。阿言心諗，寶兒原來又比人Mark左。
 
但我唔可以只掛住阿言既野，我都要為自己著想，於是我就講:『OK!你唔睇樣! 但如果個個人係一D 你好討厭既人! 你又會唔會咁諗先?』
 
『我相信同識分邊個係好邊個係壞，我相信我地一定對佢有所誤會先覺得佢討厭。』
 
我心諗:『即係話......如果係我既話，你都會接受我吧?』
 
『咳..咳...依到好凍，我出去透透氣先!』阿言突然間說。
 
寶兒即刻關心地問:『我有帶件外套，你要唔要?』
 
阿言揮下手說:『唔洗了......』說罷就走左出去。
 
我望住佢離去，大概知道佢因咩事而失落，雖然唔想見到咁樣，但......我實在唔知點樣做。
 
夜晚，返到Hall後，正當想入房時，突然有人叫停我:『喂!!阿明! 今晚一齊食啦!!』
 
我轉頭望，見到Common room即刻有幾個人問:『邊個返左黎?』
 
之後伸個頭出黎望，當佢地見到我後就笑哂口咁講:『喂!我地準備打邊爐呀! 一齊黎啦!』
 
『丫.....好呀!』
 
住左咁耐Hall，從來都無咩點接觸過Hall既人，今日都算係第一次同佢地成班人一齊打邊爐食野，內心一直都有少少不安，大概係怕佢地知我學生會件事。
 
『喂喂! 其實呢! 選學生會係咪真係咁黑暗架?』
 
『係囉係囉! 好想知呀! 』
 
『仲有仲有! 你依家同個個女仔點呀?』
 
食飯之間，面對住佢地咁多問題，佢地將視線望落係我身上，好似想我講多D有關我既事，但佢地既語氣係好正面，句中無骨，只係發自真心好奇，令我有點受寵若驚。
 
『咩你地.....唔覺得係狗公行為咩?』 我笑說。
 
有個男仔突然回應:『咁就叫狗公? 痴線啦! 喂大佬! 追女仔就係咁架啦! 下下都話狗公咩!』
 
『係囉! 我都唔覺得有咩狗唔狗公囉!』一個女仔說。
 
『你地唔覺得有咩問題?』我問。
 
『咁有鐘意既人，就自自然然想識佢，咁SAY個HI，聊佢傾下計好正常，咁唔通又係狗公喎?』
 
『屌! 話人狗公個班人一定係上得高登多!』
 
『點呀!高登仔扮咩無上!』
 
『上高登多都比人洗哂腦，一諗起D女就諗起佢地係港女，專係收兵，個個都係淫賤! 講起D男仔!就講到D男仔下下為左扑野，叫雞咁，郁D就話狗公! 大佬! 女要追架嘛! 咁個個都狗公啦!』
 
睇黎大家對依個討論非常有興趣，而我都無公開我係高登仔既身份，只係一路聽住，但發覺佢地所講既野都幾有道理，連我自己都比高登影響左，上高登就係毒撚，聊你傾計，拎你聯絡就係狗公，睇漫畫都係毒撚。睇得多追女仔POST，收兵POST，好多時攪到我開始猜測對方，每做一件事都會諗黎諗去，去平衡之間既利弊，諗下自己會唔會係兵仔，仲會怕人地討厭自己，係到怕依樣怕果樣，最後咩都唔敢做，女仔都唔敢去追，一直收收埋埋扮哂情聖咁，其實就係一條暗戀人既淆底獸。
 
而且，係我叫阿靜上高登，係我將高登文化思想植入左阿靜身上，我唔知道影響左阿靜幾多，但我知道阿靜已經無左之前個種純真，反而變得成熟，唔再似個妹妹仔咁，咁樣對佢黎講係好事定壞事呢?
 
『其實女仔好簡單既姐，只係想有人鍚有人關心下就已經OK!』一位女仔表達自己想法。
 
『咁需要關心咪搵男朋友囉! 做咩要搵朋友姐! 咁樣同收兵有咩分別?』
 
『咁搵朋友唔一定係收兵架嘛!唔通男同女之間唔可以有純友誼咩?』
 
『得! 一定有! 但條件係對方一定係好豬或者性格同心地好惡頂啦!』
 
『妖! 又係睇樣! 膚淺!』
 
『阿明! 你話啦! 男同女之間有冇純友誼 ? 』各人都將視線放落係我身上。
 
『丫.....我覺得....男同女之間真係無純友誼。我覺得男同女之間只要達到咁一個程度就會一齊，而男同女既關係如果開始時侯係朋友，當佢地關係慢慢上升，去到某個位既時侯，就出現"有冇得發展"既念頭，當你地有左依個念頭時侯，你地之間就唔再有純友誼。』
 
『嗯........』
 
『但係做唔做兵仔，又唔可以亂咁定義。我識得一個男仔，雖然佢同個女仔分左手，但知道對方有病，都一直陪住佢，那怕自己現任女朋友唔鐘意，連個女仔最後死左，佢都落手落腳幫佢打點一切，其實佢好傻，只係一個廿幾歲仔，中學拍拖都可以咁認真，外人睇佢...覺得佢唔需做咁多野，但佢依然去做，去鍚依個女仔，去守護依個女仔，即使佢死左，佢依然堅持為佢做事，咁我地.....係咪都當佢係兵仔呢? 為自己鐘意既人做事，即使無回報，都堅持去做，我地係唔係應該話佢傻仔呢? 係咪要下下計到咁盡....計下自己有冇得益呢? 』
 
全埸人都沉靜左落黎，我見氣氛好似彊左咁，就笑笑口話:『我都係9UP下姐!唔洗認真! 哈哈!』
 
『唉! 唔好講依D! 我地開心D! 飲杯!』之後我地都拎起手上既杯一齊豪飲。
 
『拿! 黎緊我地不如攪多D活動啦...例如糖水會...單車團....踢波團.....』
 
我一路係身旁聽住佢地提議好多活動出黎，而每個活動佢地都預左我參加，雖然依家已經三月幾，住HALL既時間得返好少，但總算我都可以正式開始我既Hall life，同時都可以重新建立返我既大學朋友圈子。
 
『阿明，過過黎!』HALL TUTOR突然叫左我出去。
 
『做咩事?』
 
『我想推薦你下次組HALL莊，想唔想做P? 』
 
『下?點解搵我既?』
 
『你選過學生會既P，你有一定既經驗同才能，你帶住班人應該攪得好成功!』
 
『但我對HALL既認識唔係好深....我只係岩岩...』
 
話未說完，佢拍一拍我說:『咁咪岩囉! 就藉個機會比你去重新認識一下HALL既文化! 就咁啦! 』
 
對於Hall tutor既邀請同支持，令我有點安慰，內心既對HALL既不安都慢慢減退，我返返入Common room，見到一大班人好開心咁打邊爐，我就對自己講:『依家開始，我要好好珍惜佢地。』
 
『喂!阿明!你地幾點決賽呀?』
 
『係囉...我地組團去撐埸......!』
 
.............
......
...
 
過左一星期後。
 
當我開Msn時，發現寶兒留左一個OFFLINE MSG比我
 
內容係 " 今日係我生日，我一定要知你係邊個，一陣我會五點鐘去地盤等你。如果你再唔話我聽你係邊個，都唔再出現既話，你以後都唔再搵我，我都唔會再去搵你，我地之間就咁就算吧。"
 
睇黎寶兒想認認真真，決決斷斷咁去處理件事，同埋想逼我現身......我即時係到R哂頭，究竟我好唔好現身，究竟我好唔好同佢講，我就係精靈呢?
 
正當我諗緊時侯，手提Whatsapp響起，原來係阿言
 
阿言:
對唔住，我今日唔同你地一齊溫，我自己溫算
 
阿明:
係返之前個到?
 
阿言:
嗯
 
阿明:
我黎搵你
 
我收起電話，執好野就行左去搵阿言，一眼睇落去，阿言好殘，精神好差，情緒好低落，而且唔肯同我地溫書，好明顯唔想再面對寶兒，摺埋一角係到溫書。
 
『你真係唔同我地一齊溫?』
 
『唔溫啦.....有咩用.....佢個心都唔係我到，佢鐘意個個係咩精靈.....』
 
『傻啦，咩春精靈，依家個個人係邊個都唔知，但係你真係實實在在係寶兒身邊! 你應該加把勁!』 事實上，我一方面同寶兒聯繫，一方面叫阿言加把勁去追寶兒，我覺得自己好狗。見到阿言既樣，同意志都消沉，我實在唔想見到咁。
 
『我都係算吧.....之前婉澄話想見我，到最後....我都無勇氣去見佢.....今次，我估....我都係無勇氣去面對寶兒，我依個性格，邊有人肯要?』
 
『婉澄係之前你話網上追個個?』
 
『嗯....』
 
眼見阿言咁樣，我實在唔想再係咁，於是我拉起阿言話:『 我帶你去一個地方!』
 
『下? 我唔去見寶兒呀!』
 
『唔係見佢，係去....見精靈。』
 
『下?』
 
接著，我就帶阿言去到地盤個道牆上，阿言見到整道牆都貼滿Memo紙，而且好明顯係兩個人既對話，依道牆令到阿言O哂咀。
 
『依個就係精靈同寶兒既對話。』
 
『下.....真係有精靈架?』
 
『妖你.....精靈假架!人黎架!』
 
『咁係邊個?』
 
我無答到阿言問題，只係靜靜地行前拎起地下既Memo紙，再拎起支筆，轉頭向阿言說:
 
『個答案.....就係依張Memo紙到。』
 
接著，我就將阿言個名寫上Memo紙到。
 
『做咩寫我名上去?』
 
『由依家開始，精靈就係你，你要睇熟依道牆所有既對話，我一陣會再send埋我同寶兒之間既MSN對話比你，你.....可以係寶兒面前話佢聽，你，就係精靈。』我認真地說。
 
『原來精靈就係你.....你一直都對寶兒有興趣.....咁...咁你算咩意思? 讓比我咁解呀? 你可憐我呀?』
 
『我估到你會咁講.....無錯，我係對寶兒有D興趣，但係.....個種興趣遠遠比唔上我鐘意阿靜個種感覺，既然寶兒咁鐘意精靈，又唔介意佢係一個點樣既人，你.....就最岩既人選。』
 
『但係.......』
 
『唔洗但係，我唔係將寶兒送比你，女人講野唔好盡信，佢介唔介意只有佢自己先知，你係精靈都唔例外，可唔可以一齊到都要睇你造化。』
 
『嗯......』
 
『你始終都要跳出自己框框，好好地真真正正咁追寶兒。』我望一望個手提顯示時間，然後再說:『一陣五點鐘，寶兒就黎依到，依家就兩點幾，你就係到慢慢睇熟佢，做一個真真正正既精靈。』
 
『多謝你阿明......我唔知點講好....我今次一定會努力做好自己，唔再咁內外同收收埋埋，我....一定做到。』
 
『嗯! 你係先好講呀! 好啦....唔阻你啦! 我要走!』
 
『你要去邊?』阿言問。
 
『我呀.....依一刻....好想....好想見一個人。係咁啦! 我地....都要一齊加油!』說罷，
 
我就揮手離去，踏出地盤後，望一望個天空，今日天氣好好，涼風依舊，我想見既人......就係阿靜。
 
我係袋到拎部Ipod tocuh出黎，隨意點上一首歌曲，就睇下抽到有咩歌岩我依一刻既心情，一聽到音樂之後，原來係鄭秀文首《感情線上》，我閉上眼，吸一吸一口氣，再開眼，然後我唔知點解，竟然跑起黎，一直跑.....一直跑，恨不得想即刻見到阿靜，感覺自己好似日劇既男主角一樣，咩春都跑，一路跑，一路聽住首歌，原來真係好有Feel....
 
"一個獨自在發燒　另外那位唇上結冰　負負得正
各取需要　多玄妙　也許　上天不給我的
無論我兩臂怎緊扣　仍然走漏給我的
無論過去我怎失手都會擁有"
 
一路跑，我諗起中學時期既阿靜，一個非常非常宅既女仔，一個好鐘意活係自己世界既女仔，雖然佢一直比人視為重口味，但我從來都唔介意，我仲經常同佢一齊返學，一齊放學，晚晚去佢屋企食飯，本來中學時期，後生仔梗係鐘意D靚女，正既學生妹，但阿靜比我既感覺好舒服，係佢面前我可以做返自己，唔洗收收埋埋，唔洗呃呃哄哄，舒舒服服咁面對住佢。
 
"一個恨浪漫太少　另外那邊期望太多　實現不了
結果將會　多微妙　也許　上天的一對手
移動你與我的分寸　行前或留後這對手
其實正要送我給你不要鬥"
 
跑到去火車站，我依舊地跑，係人群之中左穿右插，心情竟然好左好多，已經仲好興奮同期待。我諗起我點樣幫阿靜脫離宅女行列，教佢上高登，教佢點樣收兵，教佢點樣控制男人，教佢行旺角，教佢好多好多野....我仲好記得係旺角，我故意放甩佢，嚇到佢即刻攬住我係咁喊，不斷大叫" 衰人呀!衰人呀" 。個陣既佢.....非常可愛。
 
"分叉的感情線　正等我為你蔓延
彼此的感情線　交錯發展　怎麼捨得去剪
心在你身邊　就算隱形亦有一天遇見
那些感應　多靈驗　也許　被喜歡的女人
從自信散發的光線
朦朧或明豔　不太難望見 "
 
聽到感情線依句歌詞，我又諗起穎兒所講既感情樹，穎兒講過，一個人同另一個人之間既感情係需要每一日培養，每日都要去用心去打理，如果有一日，或者有一段時間唔去好好打理棵樹(大家之間既關係)，唔去投入感情......咁大家之間手上代表大家既感情線，最後就會咩顏色都無，成條感情線都會消失左。穎兒依番說話令我明白到，我同阿靜之間既關係之所以變得咁快，由一個熟人變成陌生人，在於我唔去用心去打理我地之間既感情，放左榜後，我只掛住返工，完全無理到阿靜，直到開學都無落力去修補返我同佢已經漸漸消失既感情，直至大家關係淡了，再補償既時侯已經太遲。
 
"分叉的感情線　正等我為你蔓延
彼此的感情線　早佈滿對方雙手
你的感情線　看出我下個十年
分叉的感情線　總會有某天一起發展
 
等適合時候孤男寡女會連線
深呼吸等適合時候一場交戰
深呼吸等適合時候孤男寡女去連線
深呼吸等適合時候一場交戰"
 
我知道阿靜已經係屬於阿風，但唔緊要，因為我知道，係我心目中，阿靜係無可代替，我會一直係阿靜身邊好好守護住佢，好好咁將我同佢之間既感情線慢慢填上顏色，好好咁將我地之間既關係變返以前咁。可能好多人覺得我好傻，但當我一諗起阿Ray，我就唔覺得咁介懷人地點睇我，最緊要係我自己點睇自己，去為自己鐘意既人去做既事，我唔覺得有咩問題，可能我係兵，可能我係狗公，但我唔再Care，我只係唔想令自己後悔，即使同阿靜最後都做唔成情侶，我都無遺憾，至少我可以做到阿靜心目中一個好重要既朋友，這樣，就已經足夠。
 
踏出火車，一路跑，一路狂重覆首歌，愈聽愈起勁，愈聽心情愈開朗，不知不覺間已經到左阿靜屋企門口，我除低耳機後，關上ipod tocuh，吞了吞口水，就禁左幾下鐘。
 
開門既就係阿靜，一個我想見到既人，一個我甘願默默守護佢既人。
 
阿靜見到我成身汗，個樣好似有急事搵佢咁，就好驚訝咁問:『嘩....你攪咩黎?』
 
我一手拍落大門，氣喘喘地說:『我....我....今晚....係到食飯!』
 
阿靜先係呆左一呆，之後忍唔住笑出黎:『 哈哈哈哈! 你突登跑黎講依D野呀?』
 
我大大力吞一吞口水，然後說:『仲有......我下星期要踢足球比賽.....你記得要黎!』
 
『好好好! 我一定黎，你呀! 快D去沖涼呀! 好臭呀你! 我依家去買餸呀!!快D 快D!』阿靜邊說邊推我返自己屋企，看來阿靜心情都好好。
 
然而，我既心情都不知不覺好左好多，這樣我同阿靜既關係，就好似一個砌圖一樣，一個已經散哂既圖，由今日開始，由我對手慢慢將已散左既拼圖慢慢一塊一塊去修補返。
 
我，係唔會後悔。
 
*************************************************************************
 
一星期後。今日係我地Hall同另一間Hall進行7人足球比賽既決賽。可能係中午舉行既關係，現埸竟然有百幾人黎睇，氣氛非常強勁，天氣都好好，完全係一個比賽日子。
 
『加油呀!!!!!!我地HALL既足球隊係無敵架!!!!!!!!!!!!』
 
我換上衫後，同班隊友伸出一隻手，大家搭埋一齊，然後大佬大叫:『唔講咁多廢話! 打佢老母啦!!』
 
我地都和應大叫:『打佢老母! 打佢老母! 打佢老母!』
 
準備出埸時，我見到阿靜同阿風黎左，我行埋去，笑笑口說:『依，阿風都黎左呀。』
 
阿風:『阿靜話黎睇波，我都O左咀，估唔到佢有興趣，原來係你.....加油啦!』
 
『嗯，下年記得住Hall，咁我就可以同你踢返埸比賽。』
 
阿風笑說:『又唔洗等到下年既，我地平時約出黎踢都得架!』
 
『好呀! 輸左既話，就比返阿靜我!』
 
『好呀! 有本事你就過黎拎!』
 
『喂呀!你地講咩呀! 你地當我咩呀!』阿靜即時插把咀埋黎。
 
我揮揮手:『我要出賽啦! 記得叫大聲D!』 之後阿風就伸出一隻大拇指比我，阿靜就即時大叫:
 
『加油呀!!!!』
 
我再望到阿言同寶兒佢地黎左，而且身旁仲有阿龍阿雪佢地。
 
我再行埋去說:『你地.....都黎左呀。』
 
阿龍說:『係阿言叫我地黎既! 你呀! 記得要嬴呀! 我地買重你架!』
 
『哈哈...好呀好呀! 你地開咩盤先! 第一隊入球...主容和定係咩呀!哈哈』我笑說。
 
『總之你就要嬴啦! 唔係唔放過你架!』
 
『我平時就唔鐘意賭既! 但今次為左你就破例一次啦! 哈哈! 加油呀!阿明!』阿雪笑說。
 
『中大三子係到，係咪仲差一位呢!』阿Sam說。
 
『好耐無見。』
 
『突登帶埋條女都黎撐埸架!』阿Sam介紹身旁既女朋友。
 
『好好好.....總之就多謝你地啦!』
 
『你.....有冇嬲過我地?』阿龍問。
 
當阿龍咁問既時侯，阿Sam同阿雪都碌大隻眼望住我，好期待我既答案。
 
『屌! 嬲咩春姐! 男人梗係屌黎屌去架啦! 係咪先! 我屌你呀! 哈哈哈!』
 
『我屌你呀!!!』阿龍即刻笑住屌!
 
『我屌你呀!!』阿Sam都屌埋一份。
 
『你地痴左線呀!』阿雪笑說。
 
我拍一拍佢地，然後認真說:『多謝你地。』
 
『嗯!』
 
我再望一望阿言，見到帶住寶兒黎，應該得米呀?
 
阿言好似知道我想問D咩，就笑笑口揮下手:『未得住!未得住!』
 
『哈哈! 明白! 明白!加油啦!』我笑說。
 
寶兒唔知我地做咩，就問:『你地講咩呀?』
 
『無呀!無呀!』阿言即刻回應。
 
『快D講呀! 係咪想死呀!快D講呀!』寶兒好惡咁問阿言。
 
我無再聽落去佢地對話了，只係覺得好好笑，睇黎阿言有排比寶兒恰，今日心情好好，面對百幾人既觀眾，我慢慢踏入球埸，大家都等待球證既雞聲，只要雞聲一響，比賽就會開始。
 
我望一望埸邊，阿Sam有女朋友，阿言有寶兒，阿龍有阿雪，阿靜有阿風......雖然每個人都一雙一對，但我依一刻竟然一D心酸都無，反而為佢地更加開心，希望佢地可以幸福長久落去。
 
我望住個天，暗暗地說:『如果每個人都有一個守護天使既話，我就係阿靜既守護天使，而穎兒你....就係我既守護天使，你要好好睇住我呀! 穎兒。』
 
『咇.....咇......咇.....』
 
比賽正式開始.......
 
**************************************************************************************
 
2012年10月8日
 
係Hall入面。
 
『阿明你仲唔訓覺?』阿傑問。
 
『丫，Sorry!D燈光整到你訓唔著呀? 我打埋篇故事就訓!』我說。
 
『又係高登到貼你篇故事呀? 仲未寫完咩?』
 
『貼埋今篇就寫完!』我望住個電腦邊打字邊說。
 
『唉.....因為你寫個故事，已經令你一身蟻，你仲失去左......』
 
『得啦得啦! 唔洗講啦，我好清楚都好明白，唔好再提依D事。』
 
『你有冇後悔過寫依篇故事?』
 
我貼埋最後一篇上高登後，就關上部notebook，然後說:『唔知點解，可能後悔，但....依D既然發生左既，我都無計，唯有順其自然。同埋短期內都唔會再出現係講故台，由時間去沖淡成件事吧。』
 
『嗯.....』
 
『訓啦!』我關上燈後，就訓左落床，呆呆望住天花板。
 
『係呢，問多你一條問題，我記得依篇文好似寫阿靜....係咪呀? 件事都差唔多係二年前...依家阿靜佢都..』阿傑仲未問完，我就叫停佢。
 
『你再咁多野講，我又開返燈寫paper架啦!』
 
阿傑即刻回應:『得得得! 唔問! 訓覺!』
 
我係床上呆呆望住天花板，閉上眼對自己說:『終於都....寫完個故事，再見了，我心愛既讀者，希望你地將來都會記得有我孔明既存在吧。』
 
((((((((((((((我將一位宅女變成女神，然後再將自己變成佢隻兵(完)))))))))))))))