《我將一位宅女變成女神，然後再將自己變成佢隻兵》: 下集 (9)

有一日
 
個天一直落緊雨，天色昏暗，一片愁雲慘霧，完全乎合我依一刻既心情。
 
『黎緊有一個最後既小組報告要你地做，你地照舊係到分組，五個人一組，五分鐘後交份名單比我。』Tutor說。
 
各人聽到後都開始搵自己既FD做組員，而我呢? 我一直分組都係同阿龍佢地一齊，都無試過其他人，如今叫分組，我只好望一望阿龍佢地，但見到阿龍身邊已經有阿言同阿雪，仲有兩個同學。佢地咁快就組? 係咪無諗住預我?
 
阿言好似發現依個情況，就好似同阿龍佢地講，只見阿龍搖一搖頭就唔理阿言了。阿言都感到無奈，而阿雪好似默認左依個行為，佢真係對我非常失望，如果佢再對住我，真係感到好辛苦，而我......都好辛苦。
 




班房內開始形成幾個小組，大家都將D 椅搬去屬於自己既小組，慢慢地顯露左我既位置，一個無人肯同我同組既位置。
 
Tutor見到咁就問:『阿明，你既組呢?』
 
此刻，班上既人都突然靜左，大家既注意力都望左坐係班房中間既我身上。此刻，我感到非常難堪。
 
『我......無組。』我低著頭說。
 
Tutor就即時大叫:『有冇同學仔 肯同阿明一組呀?』
 




我聽得出Tutor對我既情況感到同情，好想幫我搵到組，但佢咁做其實間接咁將D刀插落我個心到，令我感到好痛苦。我更加覺得自己好柒同無地位，我終於明白D毒撚既感受，原來無人肯同我一組既感覺真係好難受，真係.....好難受。
 
『丫....寶兒!你就同阿明一組啦!就咁啦!』Tutor唔比人提出反對，就早點結束依個分組環節。
 
寶兒? 咩人黎?開左學咁耐，我一直都專注自己既事，莊務同阿雪阿靜既事，都好小參加班活動同埋認識一下同學仔，好多時都唔係好記得同學仔既名......
 
我將張椅慢慢移向寶兒個組。
 
『黎近我地就做依個題目......』個位寶兒慢慢向身邊既同學仔講解，但佢地其實一直都將我拒之門外咁，我只能一直坐係到呆呆咁望住佢地，沒有任何發言權，都無野想講.......
 




落堂後，見到阿龍同阿雪好開心咁拖住手走，從阿雪既臉容睇，似乎佢更加放手去愛阿龍，係因為我之前僅存既小小地位都消失左嗎?
 
天色已晚，雨愈落愈大，一路行到Hall樓下時，可能天一直落，都無咩人係條路到，只有我一個人，我無開遮，我一直都比雨淋住，好想藉著雨點舒發一下情緒。雨很大，雨聲更大，我實在忍唔住，我真係忍唔住，我對住個天大叫: 『丫!!!!!!!!!!!!!!!!!!!!!!!』
 
『丫!!!!!!!!!!!!!!!!!!!!!!!!!!!!』我力歇聲嘶地叫，狠狠地叫，一直叫.....一直叫到自己喊起上黎。我跪左係地下，我真係好痛苦，好後悔，點解成件事會發展到咁?
 
阿雪同阿靜都通通離我而去，一諗到阿靜同阿風一齊，一諗到阿雪同阿龍一齊，我個心真係好痛，我完全接受唔到依兩個月所發生既事，一下子將壓抑住既負能量一一發洩出黎，我真係頂唔順........
 
雨打落我身上，很痛，但我心更痛。
 
我唔記得左自己跪左係到喊左幾耐，只係突然驚覺我係條路上面，好驚一陣有學生經過見到我咁樣，於是想起身走人，但當我正想起身時，我發覺我身上無在比雨淋，係天色昏暗，燈光照射下，我望到地下既影子顯示出一把遮，將我遮住，令我無比雨淋。而且我仲發現我身後仲有一個人既影子
 
『阿明......』
 
依把聲? 依把聲音......依把聲音......咪係穎兒?




 
我即刻轉身一望，只見穎兒企係我身後，拎住把遮幫我擋雨，傷感地望住我。
 
『穎兒......』我驚訝得不能相信，一直失去聯絡既，好似消失左既穎兒，依一刻竟然出現係我面前。
 
我即時企起身，望真D眼前既人，的確係穎兒。
 
『穎兒.....你終於出現......』
 
穎兒微微笑說:『好耐無見，阿明。』
 
我望一望自己，覺得自己非常狼狽，即時整乾臉上既眼淚同雨水 :『哈....好失禮添。』
 
穎兒鬆容不迫咁係手袋中拎出紙巾比我，我接過紙巾說:『唔該......』
 




我定一定神，冷靜一下自己再問:『係呢.....你之前唔係話去外國讀書咩? 點解之後好似消失左咁，搵你又搵唔到，你又一直無出現到，你究竟去左邊呀?』 我一下子將心中一直收埋既問題慢慢講出黎。
 
穎兒望一望周圍，然後問:『依到好大雨.....附近有冇地方可以避下雨?』
 
『丫.....有，前面無幾遠就到我Hall，但依家太夜我帶唔到你入去，不過我地可以係Hall樓下避一避雨。』
 
穎兒望一望前面條路，臉色好似唔太好，好似好苦惱咁，然後說:『嗯! 就去個到!你帶路!』說罷，穎兒將手上既遮遞比我:『依個時侯應該做返個真正既男人，幫我擋擋風雨啦! 哈哈!』
 
我覺得穎兒依句說話好似語帶雙關，但我一時之間比唔到咩反應，因為穎兒突然間出現令我有D不知所措咁，都唔記得應該用咩語氣同態度去對待穎兒，於是就成個恰熟狗頭咁笑笑口接過穎兒把遮。
 
『咁......我地行。』
 
『嗯!』
 
一路上，雨仍然很大，雨聲更大。我撐住把遮，好小心咁樣遮住穎兒，因為穎兒把遮唔大，只可以遮一個人，遮兩個人實在太勉強，於是我盡量將把遮既覆蓋範圍比哂穎兒，自己左邊手臂一直比雨淋住，但我依刻都無咩所謂了，反正本身都濕哂，但穎兒臉色唔太好，身型同臉型都比以前廋左好多，驚佢比雨淋病，所以一直好小心遮住佢。




 
我發現穎兒行路腳步有點慢，算係真正既雨中漫步，令我都調節自己腳步去遷就佢。同時間，我個腦海不斷回憶返中學時期同穎兒相處既時間，將一直沉睡左係我大腦入面既穎兒印象，經歷一一蘇醒。
 
穎兒，係一個性格非常樂觀既人，成日都笑笑口，係因為佢笑點易常地低，你求其攪個爛gag佢都可以笑餐死，以前既我一直都係佢搵一D自豪感覺，因為當佢笑個陣，你會覺得自己個gag真係幾好笑! 雖然穎兒係學校到比較向外少少，一放學就會好快閃人，好多班活動都唔會參加，但係班上，我諗我都算同佢玩得最多既人。
 
所以個陣我無咩追求對像，身邊只有穎兒一個，我同佢每晚都傾Whatsapp，晚晚都講笑話比佢聽，佢溫書溫到悶個陣，我又會攪下gag引佢笑比佢提下神，關係一直Keep得好好，什至我有個衝動想追佢，個陣既我，知道左穎兒無咩朋友，圈子好細，我諗我係佢唯一一個同佢傾Whatsapp既人，所以一直都奉行住"一淡沙糖一淡屎"既策略去對待佢。令到佢對住我依種有排成日搵佢，之後突然冷淡對佢既行為感到無所適從。
 
本來時機成熟時，正想同佢表達心意先發覺佢有男朋友，就係因為佢有男朋友，我都開始無咁多心神去哄佢，理佢，覺得唔應該再花"資金"去投資係穎兒身上，攪到穎兒當時好灰，好唔開心。過左幾個月後，直至中學Last day，佢突然同我講唔會溫AL，因為佢突然決定左去外國讀書，依個決定我從來未聽過，只怪穎兒一直搵我但我無理到佢，最深刻係穎兒係我張桌上，畫左一棵"感情樹"。之後穎兒就無再出現了，而且我地都唔知有咩方法可以搵到佢，加上大家都開始有自己既路要行，漸漸咁忘記左穎兒。
 
『丫......到左。就係依到。』我係袋到拎左幾張宣傳學生會既單張出黎，想放係地下墊住比我同穎兒坐。
 
但我拎出單張時，不禁令我諗依排所發生既事，都呆左一呆。
 
『依D單張.....睇黎應該幾重要，有冇其他紙代替?』穎兒見我猶豫咁，不禁問一問。
 




我大力握一握張野，笑笑口說:『唔重要既，隨便用都得!』說罷，就放左係地下墊住坐。
 
我同穎兒坐低左之後，視線一直望住出面，望住個天不斷落雨，周圍都傳出『啪啦，啪啦』既雨聲，一直都無見面既我地，突然見返面好似好陌生同客氣咁，明明有好多說話想問想知，都啞左咁。
 
但我仍然都開口問:『係呢......頭先我問你既野，你都未答我。』
 
穎兒擰轉頭望住我，慢慢說:『阿明......你最近點呀?』
 
『我......』我個腦又即時回想返近來既事，實在唔知點講好。
 
『我最近......OK呀! 幾好呀! 我仲學人攪學生會，都幾充實!唔錯丫.....』我笑笑口回應。
 
穎兒將視線轉返去前面，呆呆說:『咁就好了。』
 
『其實你.....依大半年黎去左邊?』
 
『阿明，你知唔知我點解會黎搵你呀?』穎兒仍然無回應我既問題，反而突然問返我轉頭。
 
『丫......唔知呀，不過你都幾勁，竟然知我依個時間會返Hall。』
 
『其實我唔知架......我只係知道你住緊Hall，但唔知道你會返屋企定返Hall，我都係博一博，估唔到真係見到你。』
 
『你突登係到等我?』
 
『嗯。』
 
『你有事搵我?』
 
『算係......我留意到你最近真係好唔開心，所以我忍唔住要見一見你。』
 
『留意我?』
 
『哈.....我一直都有留意你Facebook同xanga動向，不過你好少會更新xanga，雖然資料唔算充份，但大概都估到你最近受左唔少委屈。』
 
原來穎兒一直都有留意住我，只係一直無出聲。加上我最近成日係Facebook呻下D負能量，可能令到穎兒發覺我最近出左問題。
 
『傻啦!我......Ok 呀!幾好呀!』
 
穎兒望一望我說:『阿明......唔好呃我，好嗎?』
 
當我見到穎兒個傷感既聲線同個樣，加上個句"唔好呃我"，突然間令內心岩岩壓抑住既負面情緒慢慢湧出黎。
 
我吞一吞口水，然後低著頭說:『嗯......我......好辛苦。』當我講到好辛苦既時侯，我發覺我開始忍唔住想喊，一直忍住淚水，但嗚咽既聲線都已經好明顯咁出賣左我。
 
『嗚....我唔知做錯左咩，我只係.....我只係想搵一個鐘意既人，同佢起埋一齊，開開心心咁過。但係........但係我唔知點解會攪到今時今日咁既地步......好辛苦.....好想好想返返轉頭。』我雙眼發熱，淚水都開始流下來，但我仍然強忍住，因為我無咩點試過係女仔面前喊。
 
穎兒一直望住我，我都唔敢正面望住佢，我嗚咽左一陣，我望住前方繼續講 :『你記唔記得邊個係阿靜? 何妍靜，之前同我地讀同一班.......我鐘意左佢，但係.....自從入左大學之後，可能大家......都有自己圈子，關係突然淡左好多，淡到.....淡到好陌生，好陌生。』
 
『無論.....我點做都好，都已經放低自己既理性，已經開哂自己張底牌.......但係阿靜依然對我無動於衷，感覺上已經......返唔到轉頭。依家.....全世界都知道我係一個狗公，去攪人地既女朋友，攪學生會攪到不知所謂，日日返去比人歧視......無人肯同我一齊玩，連分組.....都無肯我一組。係到讀書，變左行屍走肉.....好辛苦，真係好辛苦，我究竟做錯左D咩....我，究，竟，做，錯左D咩呀!!!!我無哂朋友，我無哂大學生活....我咩都無哂。』說罷，我已經忍唔住喊出黎，雙手握住拳頭，我唔甘心，我唔甘心自己竟然淪落咁既地步，我究竟做錯左D咩?
 
面對住咁既我，穎兒依然好冷靜，一直由我慢慢喊，直至數分鐘後，我既嗚咽聲開始減弱，穎兒就開口說:
 
『阿明，你仲記唔記得感情樹呀?』
 
『嗯.......』
 
『感情樹係一棵專收集感情作養份既樹，當你同某一個人感情好好既時侯，感情樹既樹枝就會生長，感情愈好，樹枝就會生得愈長。』
 
『嗯.....我記得。』我盡量將我嗚咽既聲線消除。盡量冷靜返自己。
 
『哈哈，我仲記得......我係你隻手掌到，畫個我同你既樹支。個樹支仲係唔係到呀?』穎兒望一望我。
 
其實當日穎兒用筆畫上我手掌既線，個晚返屋企沖涼都沖甩左，仲點可能Keep到? 但我仍然情不自禁咁，伸出隻手掌出黎，只見手掌上除左我既淚水同雨水散佈係掌心之中，再無其他野。
 
『哈哈.....我同你條感情樹枝無左lu。』穎兒說。
 
『咁梗係啦.....上年既野，點可能Keep到依家呢?』
 
穎兒望住我，幾秒後，慢慢說出:『感情既野，點可能Keep唔到? 只係.....睇你想唔想Keep姐。』
 
我呆左一呆，突然間好似有一種叮一聲既感覺，大概穎兒所講既，唔係當日畫既樹枝，而係我同佢真真正正既"感情"。
 
穎兒伸出自己隻手，望住隻手說:『感情好既時侯，手掌上既感情線就會好深色，就好似當日我畫上去你隻手一樣咁深色。但係.....感情係需要每日都去培養，每日都要去用心去打理，如果有一日，或者有一段時間唔去好好打理棵樹，唔去投入感情......咁我同你既樹枝就慢慢淡，最後咩顏色都無，成條樹枝都會消失左。』說罷，穎兒就指向我手掌，一隻咩都無既手掌。
 
『穎兒........』我似乎明白到穎兒所表達既野，雙眼再次發熱。
 
『哈，有冇筆係身呀?』穎兒問。
 
我定一定神，慢慢係袋到搵，但發覺我無帶筆係身。
 
『丫.....無呀，唔緊要，我即刻上Hall拎。』隨即我就起身準備上Hall。
 
穎兒聽到我話要走，就即時捉住我隻手:『唔.....唔好走，留係到。』
 
當穎兒捉住我隻手時侯，我感到佢隻手非常凍，凍得異常。而且我見到佢個身有少少震。
 
『你隻手咁凍既? 你係咪病左? 一定比雨淋親! 可能會感冒!』我半跪左係穎兒面前，此刻，係充足既燈光下，我終於清清楚楚望到穎兒既樣，一副憔悴，廋削既樣，臉無血色。同以前既穎兒大大不同。
 
穎兒抬頭望一望我，微微笑說:『我無事呀，你放心。』說罷，穎兒係袋到拎左支唇膏出黎，再捉住我隻手，慢慢將支唇膏當係筆咁，係我手掌既感情線上，慢慢畫深佢。
 
『穎兒.......』
 
『哈.....我地今日見返面......我地條感情線又深返色。』
 
我望住手掌上既深紅色線印，望住穎兒個種憔悴但又強行笑出黎既樣，內心不禁心酸。
 
『我又幫你畫。』說罷，我就拎左穎兒支唇膏幫佢畫，但穎兒好抗拒，我以為佢怕痕，於是笑笑口咁捉住佢隻手再畫。係拖拉之間，我發現穎兒隻手有好多針孔筒，而且好多一達達既紫血印。
 
『穎兒.....你隻手.....』我驚訝地說。
 
穎兒即時將佢既衣袖拉返長，蓋住隻手 :『我無事......』
 
『唔係.....你係有事! 你依大半年黎究竟發生咩事!你講我知啦!!』我激動地說，因為依大半年黎，穎兒一定發生左事，如果唔係佢唔會攪成咁。
 
電話鈴聲響起，穎兒係袋到拎出手機 :『嗯......我好快就落黎。』
 
由於太近距離，我大概聽到伯母既聲音。
 
穎兒收線後笑笑口說:『我地繼續。』
 
『你屋企人係下面等緊你?』
 
『嗯......係佢地車我黎。』
 
『丫.......』我實在攪唔清依家咩情況。
 
穎兒捉住我隻手，用心地說:『阿明......你唔係咩都無，你仲有我，我一直都會支持你，一直都會。』
 
我實在委屈得太耐，過住D非人生活得太耐，已經好耐無得到別人既安慰，依家聽到穎兒咁用心去講依番說話時，雖然穎兒隻手好凍，但我深深感受到個種"溫暖"，一種感情上既溫暖。已經唔會再猜測穎兒係用咩身份去講依句說話，依一刻我只係忍唔住再一次係穎兒面前喊起黎，狠狠地喊起來，一發不可收恰地喊起來。
 
雨仍然無情地落下。
 
『嗚嗚.....』我半跪咁係穎兒面前喊。
 
穎兒用手摸一摸我塊臉說:『男人滴血...唔淮喊。你以後都要堅強D，知唔知呀?』
 
我抬頭望住穎兒，原來佢都已經雙眼痛紅，眼淚都流下來了。我盡我最大努力想鼻涕，鼻水，眼淚一一收起，大大力索左一下鼻，吞一吞口水說:『我答應你，我一定會撐住落去!』
 
穎兒再說:『其實感情既野......無分岩定錯，如果真心鐘意對方，見到對方開心就得，有時真係唔需要強求同人一齊......』
 
『我知...我知...但真係好難做到丫.....』我心知依個老套說話，但真係好難做到，依句說話只係失敗者安慰自己既說話。
 
『阿明.....你有冇諗過，中學時期既你同你依家.....有咩分別?』
 
我諗左一陣，唔係好明穎兒所表達D咩 :『有咩分別......?』
 
『個陣既你，成日都嘻嘻哈哈，日日返黎都好開心同人玩，成日都宣揚青春主義思想比我地，係你身邊真係唔怕悶，而你都日日講笑話比我聽.....』
 
穎兒既說話令我腦海充滿中學回憶既片段，個陣既我日日返學都好開心，讀書無壓力既我，日日戲如人生，無咩大起大落。
 
『但係你依家.....攪到自己咁委屈，咁唔開心，有冇諗過點解咁?』
 
『我......』我腦海只諗到阿雪同阿靜依兩個人，但我講唔出口。
 
『追女仔追到淪落到咁既地步，為左咩? 點解要攪到自己人唔似鬼唔似鬼? 點解要成日攪到自己咁唔開心.....你明唔明呀?』穎兒說。
 
穎兒講得無錯，自從我追阿雪同阿靜開始，我真係無開心過，日日都係到猜測對方諗緊咩，每做任何事係關於佢地既野，我都會左諗右諗，好多顧忌，限死左自己，令到係佢地面前都做唔返自己，以前對住阿靜可以輕鬆自然面對佢，依家都係佢面前就好似綁住自己手手腳腳咁，係佢面前都抬唔起頭咁，原因只係一個，就係我鐘意左佢。
 
有人講過，追女仔千其唔好當對方係女神，所謂既女神，身份猶如神一般，高高在上，高到連你都好難去觸摸到佢既距離，所以當你視對方為女神時，你就注定永遠都得不到對方。
 
諗深一層，選學生會都係因為阿靜，為左可以得到佢歡心而參選。如果無選學生會時，我仲會淪落到咁既臭朵地步嗎? 如果無選學生會，我就唔會同阿雪有更多既共事時間，如果無既話，我或許唔會對佢有意思，更加唔會去到表白依個地步。
 
自此，我試過自暴自棄，夜晚以淚洗臉，以前我唔會感到寂莫，更加唔會咁易就喊，但依家........
 
我低著頭說:『我明...我明....』大概我應該要想通一點事情。
 
『你明就好.....』穎兒說。
 
我感覺到穎兒隻手係到震抖，我感到不安既感覺:『穎兒.....你係咪好凍?』
 
我摸一摸穎兒額頭，發覺熱得好勁，佢係到發緊燒。
 
『你發緊燒.....我同你去睇醫生。』
 
穎兒揮一揮隻手示意唔洗，但我見到佢揮手都力氣都無咩，嘴唇蒼白，個樣好累好累，而且個身仲有好多汗，但我唔清楚係汗定係雨水，穎兒整個人都好憔悴，成身都發抖。
 
穎兒無出聲，用手指一指自己個袋，好似叫我係袋到拎D野咁。我就即刻係佢個袋到搵下有咩野，當我搵緊時，我再望一望穎兒，佢閉上眼，個人挨住背後既牆，一副好辛苦既樣。同我數十分鐘前見到佢既樣仲更加差，估唔到短短既十幾分鐘，穎兒無論臉色同身體都差左好多好多。
 
我係到袋到搵到兩封信。
 
『係咪依兩張? 穎兒!』
 
『........』穎兒無回答。
 
『穎兒!!』我再大聲D叫佢。
 
穎兒隨即張開雙眼，慢慢望住我手上既信，再說:『係依兩封信.....比你架......』
 
我望一望兩封信，一封無寫主題，但另一封就寫住"生日快樂，阿明!"好明顯係一張生日卡。
 
於是我就拆開封生日卡黎睇
 
To 阿明:
 
阿明!!生日快樂呀!!!哈哈!!我諗左好耐寫唔寫張生日卡比你!!但我最後都決定要送比你!我要
阿明你要知道我既心意!所以寫張生日卡比你作為留念!你呀!你好耐無搵過我啦!
不過!其他人都話你成日係自修室溫書，我Whatsapp你又唔應人><!哼!不過我明白架!你要上大學!
所以呢!實會支持你架!!生日喇wo! 又大一歲啦! 有咩計劃呀? 係咪係時侯搵返個伴呀XD? 雖然你好耐無搵我，我真係好想同你傾計，我成日時不時都會重覆睇返我同你既Whatsapp對話......
其實我真係…..好掛住你對我講既笑話，但唔知點解自從上次打邊爐之後.....你就無咩點理我......我仲諗緊..係咪你超唔鐘意我定係我講錯左說話令你討厭左我! 如果係既話! 我係到向你道歉><!!其實我今日仲整左一碟好正意大利麵比你做禮物，因為我之前聽過你講你好鐘意食意大利天使麵，所以琴晚用左好多時間去整比你食! 希望你鐘意啦! 丫....係咪寫左好多字，唔似生日卡呀? 哈哈!
 
我太耐無同你講野啦! 所以唔知點解生日卡都講左好多無謂野.....希望你會明白。
最後最後....生日快樂^^祝你AL考得順利，升上一間心儀既大學!
 
同學-穎兒
15/2/2009
 
我一路讀住生日卡既內容，個腦浮現住穎兒既聲音，就好似穎兒一直讀緊卡上既內容我聽咁，而且係一把充滿活潑，開朗既聲音，對比依家既穎兒，聲音沙啞，而且聲音好微弱，就好似用左好多力氣先可以講到野咁，真係一個好強烈既對比。
 
一路讀住卡上既內容，令我諗起當時我已經對冷理穎兒，唔想再花心神係佢身上，突然間令我有一種內疚感。望一望卡上既日子，原來寫住2009年，即係上年既事，依張卡竟然留到依家先比我? 點解當時穎兒唔比我?
 
『穎兒......點解你個陣無比到我既?』
 
穎兒微笑說:『Sorry.....我個朝早，去左醫院.....所以......無比到你。』
 
『醫院? 做咩去左醫院既? 點解無聽你......』我本來想講點解無聽你講過，但我最後都係收埋係心內，因為唔係我無聽過，而係我無用心去聽同理穎兒。
 
『都過左去......唔好再提，最緊要你依家收到。』
 
穎兒依然唔肯講佢發生咩事，我都感到無奈，我唯有再拆另一封信。但當我想拆既時侯，穎兒Fing一Fing隻手，我再問:『咩事?』
 
『依封.....你遲D先睇....我.....要夠鐘走。』
 
我見到穎兒個樣真係好辛苦咁，我怕會出事，於是我就扶起穎兒，咁岩雨勢都無咁大，我就揹起左穎兒，準備帶佢走。
 
當我揹起穎兒時，覺得穎兒個身真係好輕....好輕....竟然會輕成咁?
 
雖然雨勢唔大，但雨仍然落緊，我無手撐遮，但望一望穎兒，我無理由要佢撐起遮，個一刻內心突然好蕉急.....
 
『穎兒，你夠唔夠力氣拎遮?』
 
『嗯....我Ok....』穎兒說。我見佢OK，加上真係無辨法之下，唯有比穎兒拎住遮。
 
於是我就用九秒九既速度衝落大學火車站到，但由於地下路滑，我都行得比較笨重。
 
『穎兒! 你究竟發生咩事? 點解會咁?』 我邊跑邊問。
 
『我無事......』
 
我一直跑一直跑，突然間好嬲自己點解要住Hall，好嬲點解條路咁鬼長，攪到我依家要跑咁耐。
 
突然間，我感覺到雨打落我塊臉到，我再望一望衣服，見到雨慢慢滲透。我再望一望穎兒，只見穎兒雙手放下，把遮已經趺左落半路。
 
 
『........』
 
穎兒閉上眼，個頭訓左落我膊頭到，好似無左知覺咁。我內心即刻驚左一驚，於是大叫:『穎兒!!穎兒!!』
 
『.........』
 
我以為穎兒可能死左，但我仍然聽到穎兒既微弱呼吸，可能佢依家昏迷左，究竟發生咩事!!!!點解會變成咁，我唔理了，我發哂力咁去跑，希望盡快到目的地。
 
當我見到火車站時，見到出面有架車泊左係到，車前有對夫婦撐住遮等緊人咁，係穎兒父母嗎?
 
果然，個對夫婦見到我跑黎時，即刻跑黎接我。
 
『穎兒佢點呀?』個個男人一臉緊張地問。
 
『我.....我唔知，佢好似發緊燒，依家叫極都唔應。』
 
『即刻扶佢上車!!!!』個個男人大叫。
 
我對住佢有點怯，都無出聲咁行去佢架車到，慢慢將穎兒放係後座。
 
個個男人即刻上車，而個女人喊住口咁衝入車後座，係到睇住穎兒，仲大叫:『快D開車去醫院呀!快D呀!』接著，佢就關上車門，而個個男人即刻開車走左。
 
而我企左係到，呆呆咁企左係咁。咩都唔知咁，腦海充滿問號，究竟發生咩事?
 
我一直企係到呆呆望住架車走左之後，驚慌既心情仍然未能平息，始終一切都黎得太快，我咁大個仔第一次遇上人命悠關既事，以前睇電視劇睇得多，成日見D男主角揹住垂死既女主角跑去醫院，個陣覺得幾假，叫白車咪得囉! 點解要跑!? 估唔到當件事真係發生係我身上時，原來係非常真實，個刻真係好擔心穎兒個身體狀況，真係好怕佢就咁就離開我。我摸一摸我自己既膊頭，岩岩揹住穎兒時侯，佢就係訓左落我膊頭，而佢既體溫仍然係我身上，仲未消散。究竟發生咩事? 

丫!! 信! 仲有封信未拆，頭先正想拆黎睇個陣比穎兒阻止左，於是我就即埸拆埋另一封黎睇。當我打開封信時，未睇內容已經覺得d字好潦，而且寫得好核突，位置又唔對稱，同生日卡個種清清楚楚既字體簡直差天共地，係咪穎兒身體差到連寫信既力氣都無? 

由於夜晚關係，燈光都唔係好充足，都唔係好清楚睇到D字講緊咩，於是就跑返Hall，諗住返到hall先睇。 

返到Hall後，坐係書桌前，吸一吸口氣，冷靜自己再睇封信，由於字體好亂好潦，我都讀左好多次先解讀到佢想寫d咩。 

" 阿明，之前我講過，我好想見你，但醫生同屋企人都反對，因為我既白血球數量已經降到零，基本上我已經無哂抵抗力，隨時會有病發症同離開依個世界。就係因為咁，我先好想見你，我什至唔食飯唔打針黎威脅佢地，逼佢地答應我黎見你。今次我想親手比封信你，如果你睇到依封信時，我估我成功左了。阿明，我好辛苦，我已經唔想再生存落去，見完你之後，我諗我心願達成了，我都可以放心離開了。" 

睇到依到，我拎住張封信，呆左咁望住信既內容，一時之間我都唔知可以有咩反應。穎兒果然有病，而且係一個好嚴重既病，相信係絕症無得醫，特別見到最後個幾句，"我已經唔想再生存落去"，以穎兒既開心性格，竟然會講依番說話，可想而知個種痛苦係幾大，而且穎兒話可以放心離開? 即係話佢生存意志已經無哂，姐係隨時會死?
 
我企起身，拎起手提再睇下穎兒既Whatsapp，發現上線時間依然係好耐之前，佢仲係未上過線，但信入面既內容令我好在意。 例如第一句" 阿明，之前我講過" ，咩係之前? 佢幾時有同我講過話想見我? 點解我唔知? 我上facebook同Check email都唔見穎兒比野我或留個MSG比我，咁穎兒所講既"之前既信"係去左邊?
 
而且白血球數量降到零? 正常黎講，白血球好似係免疫系統既一部份，用黎抵抗傳染病同外來既野，但如果數量係零既話，基本上個人同無任何抗體一樣，好快會染病而死。以我所知，白血球數量減少，以大病黎講.....只有愛滋病先有，唔通穎兒有愛滋病? 但以我所認識既穎兒唔會係性濫交既人，點會染上愛滋病!!?!?
 
穎兒知道自己無抗體，仍然係大風大雨既時侯黎見我......佢仲好似等左我好耐，唔怪得突然間發燒同咁快昏迷.....穎兒走黎見我.....根本同自殺無分別!!穎兒見到我依排陷入低潮，所以想見我黎安慰我? 估唔到穎兒.....咁關心我，寧願死都要見一見我......
 
信......穎兒之前一定比過信我而我係唔知，而聽穎兒口吻，佢好似再在意我有冇睇佢既信，會唔會佢都唔想我知佢有病? 但佢信入面又提到佢有病....丫...好亂....究竟穎兒諗緊咩? 不過唔好諗依d住....最緊要係搵到之前既信，佢會唔會寄去我屋企呢?
 
於是我即刻換衫執野返屋企訓，好好運仲有車返屋企，係的士上，雨水不斷打落門窗，唔知道穎兒依家點呢? 送左去醫院後應該暫時無生命危險吧? 定係送到醫院後都救唔返? 唉..... 我拎起手提打比穎兒試一試，果然照舊都係號碼已經停止既留言錄音。究竟穎兒依半年經歷過D咩? 受過咩苦呢? 一日都係我，如果我當初一直關心住佢，唔會因為佢有男朋友而冷落佢，什至避佢，成年事既發展根本唔會變成咁......
 
我伸出隻手，望住穎兒岩岩係我手掌上畫既感情線，消失左大半年多既感情線重現返我手中，我緊緊地握緊拳頭，今次我絕對唔會再令我同穎兒既感情再突然間消失。
 
的士到左我樓下，我即刻衝向信箱睇下，發現箱內咩都無，唔通穎兒唔係經依個途徑比信我? 心情突然間一下子灰左了，究竟穎兒既信去左邊?
 
時間唔早了，我唯有係屋企訓住先，聽日再打比范威佢地傾下件事。返到屋企後，攤左係梳化到，呆呆望住天花板，我諗我需要時間去消化一下成件事。
 
突然房門開了，阿媽走出黎:『嘩! 做咩無啦啦返左黎?』
 
『無.......我留左D野係到，返黎拎姐。』我胡亂作一個理由，因為我實在無心神去應酬我阿媽。
 
『係咪D信呀? 積左好多日係信箱到都無人去拎!』阿媽邊說邊走向電視機到，再向電視機上面拎住一疊信。
 
我大驚，我即刻衝上前奪走阿媽手上既信，之後就衝返房到關上門。果然，有幾封信係無主題，無郵票，好明顯係"有人"就咁放係我信箱到。我即刻打開所有信，果然係穎兒筆跡，我再將日期次序慢慢排列，然後再由最早個封信開始讀起。字體唔係好好，但總算係好過岩先個封信，大概身體仲未去到最壞既情況吧?
 
 
" 阿明，收到我封信後，係咪覺得好突然呢? 哈哈! 唔知道你仲唔記得我呢，我係穎兒呀!我地好耐無聯絡啦，唔係.....應該話係我好耐無聯絡你，對唔住，我其實無去到外國讀書，我一直都留係香港到休養。因為.....我染上左愛滋病，但你唔好誤會，我唔係經性交感染，我自細有先天性血友病，
後來發現所輸既血係受到污染既血製品，最後成為愛滋病患者......我一直都唔知道我係愛滋病患者，直至上年驗血時發現，如果你唔知咩係血友病…..可以睇一套電影叫地久天長，個個男主角同我一樣情況! 哈哈! 估唔到今次到我做女主角。咁岩撞正AL，於是屋企人就叫我留係屋企休養，而我就呃你地話去外國讀書，對唔住.....我知道"
 
後來穎兒就無再寫落去，"我知道"? 知道D咩? 係咪寫寫下身體出現問題? 但已經唔係重點，重點係穎兒果然染上重病，感染左愛滋病，以我認識既愛滋病，好似係無得醫，點都係死路一條.....激氣....激氣.....穎兒會死嗎?
 
我再睇另一封信。
 
" 阿明，我既白血球數量已經得返100。身體一日比一日差，我最近好累，我屈左係屋企好耐，真係好想出去行下，但屋企人都反對，因為怕我出去會感染左D細菌，所以我唯有係屋企睇返以前寫既Xanga，睇下讀書時期既相，睇下你地既Facebook，好好回憶同懷念一下以前既經歷，以前真係好開心......最近你好似選學生會吧? 究竟大學既學生會係點呢? 大學既生活又係點呢? 我真係好想聽你分享比我聽，可惜.....我無得讀大學，感受唔到你成日講既青春......好累......"
 
我再睇另一封信。
 
"阿明....我依排甩左好多頭髮.....我真係唔敢照鏡.....你知我不嬲都好貪靚，如果我甩哂頭髮時，我真係咩人都唔想見，唉......我既白血球數量已經趺到得返50，我前晚仲因為肺感染入左醫院，醫生幫我打左好多針，但我已經打針打到麻目左了，見到屋企人為我走黎走去，我真係過意唔去......好想就咁死左去算......"
 
我再睇另一封信。發現字體已經好潦.....
 
"阿明......睇到你FACEBOOK，你最近係咪受到好委屈? 你近來好嗎? 我未見過你咁灰.....係咪發生左D事呢? 我白血球數量已經趺到零，醫生話我隨時會死，叫我屋企人有心理準備.....我知道我好快就會死，所以好想黎見你.....但我屋企人唔肯比我走.....我唔想同佢地理論，因為我每講一句說話我都好痛苦.....但為左見你，我一定會諗計去見你.....你好似住緊HALL嗎? 你幾時會返HALL架?..."
 
當我見到"我每講一句說話我都好痛苦"時，諗起今晚穎兒講左好多句說話，姐係話佢一直都忍住痛苦黎見我，忍住痛苦黎同我傾計，而且穎兒虛弱到連企係身既力都無，佢仍然撐住黎見我。我諗返起，今晚落雨時，我話不如返HALL避雨，佢好無奈咁望住條長長既路，為左我......佢又撐住咁行上去。一諗到依到，我眼淚就忍唔住流落黎.....我劉啟明何德何能可以令到一位女仔受住隨時會死既威脅黎見我? 我劉啟明當日咁樣對穎兒，佢一D都無怪我，反過黎安慰我......激氣.....點解個天要咁殘忍......我一諗起過去一年穎兒受既痛苦，我就好痛心，好辛苦，好心酸。
 
我係袋到拎出今晚收到穎兒既信，將所有信放哂係桌面，依堆信就係穎兒比我既最後遺物，點解我唔返屋企Check下信箱呢? 如果我一早收到D信，我一定唔會比穎兒黎探我，我一定會搵穎兒。我有好多說話想同穎兒講，我唔想就咁就結束我地之間既事，我見返穎兒只係數十分鐘.....我唔想就咁完呀! 天呀! 求下你!! 救下穎兒!!好嗎?
 
我伏左係張書桌上，狠狠地喊出黎，面對咁既事，我真係無能為力，除左喊之外，我仲可以做D咩? 我望一望信入面既字，每一隻字都係穎兒辛辛苦苦咁寫出黎，我劉啟明愧對穎兒......
 
突然間，我好似見到生日卡上，有一句文字令我好在意，我再拎出黎慢慢睇，發覺穎兒寫左一句說話比我......
 
阿明!!生日快樂呀!!!哈哈!!我諗左好耐寫唔寫張生日卡比你!!但我最後都決定要送比你!我要
阿明你要知道我既心意!所以寫張生日卡比你作為留念!你呀!你好耐無搵過我啦!
不過!其他人都話你成日係自修室溫書，我Whatsapp你又唔應人><!哼!不過我明白架!你要上大學!
所以呢!實會支持你架!!生日喇wo! 又大一歲啦! 有咩計劃呀? 係咪係時侯搵返個伴呀XD? 雖然你好耐無搵我，我真係好想同你傾計，我成日時不時都會重覆睇返我同你既Whatsapp對話......
其實我真係…..好掛住你對我講既笑話，但唔知點解自從上次打邊爐之後.....你就無咩點理我......我仲諗緊..係咪你超唔鐘意我定係我講錯左說話令你討厭左我! 如果係既話! 我係到向你道歉><!!其實我今日仲整左一碟好正意大利麵比你做禮物，因為我之前聽過你講你好鐘意食意大利天使麵，所以琴晚用左好多時間去整比你食! 希望你鐘意啦! 丫....係咪寫左好多字，唔似生日卡呀? 哈哈!
我太耐無同你講野啦! 所以唔知點解生日卡都講左好多無謂野.....希望你會明白。
最後最後....生日快樂^^祝你AL考得順利，升上一間心儀既大學!
 
 
當我將第一隻字慢慢打斜讀落去，竟然發現一句" 阿明其實我好鐘意你"。
 
點解會出現依一句說話? 係穎兒突登寫比我嗎? 我再讀一次生日卡上既內容，發覺有幾句說話好明顯有少少暗示" 但我最後都決定要送比你!我要阿明你要知道我既心意!”，仲有”所以唔知點解生日卡都講左好多無謂野.....希望你會明白。”，穎兒所表達既既野.....就係想同我講鐘意我? 原來穎兒個陣時鐘意左我........
 
我呆呆地拎住張生日卡，不禁大叫:『嗚呀!!!!!!!!!!!!!!!』 求下你，天呀....求下你....放過穎兒....我好想對佢好，我好想比到幸福佢，我好想日日講笑話佢聽，我好想見佢笑....我好想....我好想.......
 
企係房門外的母親，一直聽住阿明係房到哭泣，不禁嘆息起來。整間屋內都充滿住阿明的喊聲。
 
*************************************************************************